ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະຂດ ພ້ອມດ້ວຍຄະນະ ໄດ້ລົງກວດກາ ແລະ ຊີ້ນຳໃຫ້ເພີ່ມທະວີການເຮັດໜ້າທີ່ວຽກງານປ້ອງກັນການແພ່ລະບາດໄວຣັດໂຄວິດ-19 ຢູ່ບັນດາຈຸດສາຍທາງເລກ 9 ສະຫວັນນະເຂດ ຫາຊາຍແດນລາວບາວ ແລະ ຢູ່ເມືອງນອງ ແຂວງສະຫວັນນະເຂດ ໃນວັນທີ 10 ເມສາ 2020.
ສາຍທາງເລກ 9 ສະຫວັນນະເຂດ ໄປຫາຊາຍແດນລາວບາວມີ ຈຸດກວດກາຂອງໜ່ວຍສະເພາະກິດຕ້ານ ແລະ ເຝົ້າລະວັງຂອງການແພ່ລະບາດຂອງໄວຣັດໂຄວິດ-19 ທັງໝົດ 12 ຈຸດກວດກາ; ເຊິ່ງປະກອບດ້ວຍກຳລັງປກຊ-ປກສ, ແພດ, ໝໍ ສົມທົບກັບອຳນາດການປົກຄອງບ້ານ ຕາມທິດແຈ້ງການຂອງນາຍົກລັດຖະມົນຕີ, ແຈ້ງການຂອງການນຳແຕ່ລະຂັ້ນ ແລະ ຄຳສັ່ງເພີ່ມເຕີມ ຂອງທ່ານເຈົ້າແຂວງສະຫວັນນະເຂດ ເລກທີ 782/ຈຂ.ສຂ ລົງວັນທີ 9 ເມສາ 2020 ວ່າດ້ວຍບັນດາຂໍ້ຫ້າມ ແລະ ມາດຕະການ ແນໃສ່ສະກັດກັ້ນ, ປ້ອງກັນການລະບາດຂອງໂຄວິດ-19; ໃນນີ້, ມີບັນດາບາງຂໍ້ຫ້າມທີ່ຈະຕ້ອງຈັດຕັ້ງປະຕິບັດຢ່າງເຂັ້ມງວດພາຍໃນແຂວງ ຄື: ຫ້າມບໍ່ໃຫ້ມີການສັນຈອນໄປ-ມາພາຍໃນແຂວງຫຼັງຈາກ 20:00 ໂມງ ຂອງແຕ່ລະວັນເປັນຕົ້ນໄປ ຈົນເຖິງເວລາ 5:00 ໂມງ ຂອງວັນຕໍ່ໄປ (ຍົກເວັນໃນກໍລະນີຈຳເປັນຕ້ອງໃຫ້ມີການຢັ້ງຢືນຈາກພາກສ່ວນກ່ຽວຂ້ອງ).
ຫ້າມເຮືອທຸກປະເພດທີ່ຢູ່ຕາມລຳແມ່ນໍ້າຂອງອອກເຄື່ອນໄຫວໂດຍບໍ່ໄດ້ຮັບອະນຸຍາດ, ຫ້າມບໍ່ໃຫ້ໄປເຄື່ອນໄຫວຢູ່ນອກເຂດຊາຍແດນ ສປປ ລາວ; ຕະຫຼາດສົດໃນທົ່ວແຂວງ ໃຫ້ເປີດບໍລິການແຕ່ເວລາ 5:00 ໂມງ ຫາ 16:00 ໂມງຂອງແຕ່ລະວັນ, ບັນດາຮ້ານຂາຍເຄື່ອງຍ່ອຍ, ຮ້ານອາຫານ, ໃຫ້ເປີດບໍລິການແຕ່ເວລາ 5:00 ໂມງ ຫາ 16:00 ໂມງ ຂອງແຕ່ລະວັນ, ຫ້າມທຸກຄົນອອກຈາກເຮືອນໂດຍບໍ່ມີຄວາມຈໍາເປັນ, ຫ້າມຈຳໜ່າຍເຄື່ອງດື່ມທີ່ມີທາດເຫຼົ້າທຸກປະເພດ, ຫ້າມບໍ່ໃຫ້ຮ້ານອາຫານ ເປີດໃຫ້ບໍລິການລູກຄ້າຢ່າງເດັດຂາດ ແຕ່ສາມາດຂາຍອາຫານໃຫ້ລູກຄ້າເອົາກັບເມືອເຮືອນໄດ້, ຫ້າມຈັດກິດຈະກຳ, ປະຊຸມ ຫຼື ໂຮມຊຸມນຸມເກີນຄວາມຈໍາເປັນ ຖ້າຫາກພາກສ່ວນໃດ ຫຼື ບຸກຄົນໃດຕໍ່ລະເມີດຂໍ້ຫ້າມໃນຄຳສັ່ງ ແມ່ນຈະຖືກປັບໃໝຕາມລະບຽບການໃນແຕ່ລະຄັ້ງ.
ທ່ານເຈົ້າແຂວງສະຫວັນນະເຂດ ໄດ້ເນັ້ນ ແລະ ແນະນຳໃຫ້ເອົາໃຈໃສ່ຢ່າງເຂັ້ມງວດຕໍ່ກັບບັນຫາຕ້ານ ແລະ ປ້ອງກັນການແພ່ລະບາດໄວຣັດ ໂຄວິດ-19 ເປນຕົ້ນແມ່ນການກວດກາການສັນຈອນໄປ-ມາລະຫວ່າງເມືອງຕໍ່ເມືອງ, ບ້ານຕໍ່ບ້ານຢ່າງເຄັ່ງຄັດ, ການເຂົ້າ-ອອກຕ້ອງມີການກັ່ນກອງຂ້າເຊື້ອ, ພົ່ນນໍ້າຍາຂ້າເຊື້ອໃສ່ຢາງລົດ, ໃສ່ຜ້າອັດປາກ, ວັດແທກອຸນນະພູມຢ່າງຄັກແນ.
ຈາກນັ້ນ, ທ່ານເຈົ້າແຂວງ ກໍໄດ້ໄປກວດກາໂຄງການກໍ່ສ້າງຮ່ວມໃຈສາຍໃຍໂລມາຄຳ (ຝາຍນໍ້າລົ້ນ), ຢ້ຽມຢາມການຕຳຫູກແບບພື້ນເມືອງ, ການປູກຝັງກະສິກຳ, ເຮັດໄຮ່ຂອງປະຊາຊົນບ້ານຄຳປາແໜ ແລະ ບ້ານຕາຍົງເຂດຊາຍແດນຫາງໄກຊອກຫຼີກເມືອງນອງ ແລະ ເຂົ້າກວດກາສູນກັກກັນ 14 ວັນ ຢູ່ໂຮງຮຽນປະຖົມເມືອງນອງ ແລະ ກວດກາຈຸດປະສານງານຂອງເຈົ້າໜ້າທີ່ຕຳຫຼວດ ຕມບ້ານດົງສະຫວັນ ເມືອງເຊໂປນ; ເຊິ່ງທ່ານໄດ້ເນັ້ນໃຫ້ທຸກພາກສ່ວນ ເປັນເຈົ້າການໃນການກວດກາຕິດຕາມເຝົ້າລະວັງການແພ່ລະບາດໄວຣັດໂຄວິດ-19 ຢ່າງເຄັ່ງຄັດ, ເອົາໃຈໃສ່ຕາມລະບຽບແຈ້ງການຕ່າງໆຢ່າງເຂັ້ມງວດ.
