ໃນລະຫວ່າງວັນທີ 22- 24 ພະຈິກ 2021 ຜ່ານມາ, ເຈົ້າໜ້າທີ່ພະແນກສືບສວນ-ສອບສວນຄະດີອາຍາ ຫ້ອງຕໍາຫຼວດ ປກສ ນະຄອນຫຼວງວຽງຈັນ ສາມາດມ້າງກຸ່ມແກ້ງປອມແປງເອກະສານ 5 ຄົນ ພ້ອມຂອງກາງໄປສອບສວນ ເຊິ່ງໄດ້ແກ່:
- ທ້າວ ນ້ອຍ ອາຍຸ 19 ປີ ຢູ່ບ້ານຈອມມະນີ
- ທ້າວ ຈິດອານັນ ອາຍຸ 24 ປີ ຢູ່ບ້ານຄໍາສະຫວາດ
- ທ້າວ ສົມສັກ ຫຼື ກົບ ອາຍຸ 27 ປີ ຄ້າຂາຍ ຢູ່ບ້ານໂນນສະຫວ່າງ ທັງສາມບ້ານຢູ່ເມືອງໄຊເສດຖາ
- ທ້າວ ອານຸສິດ ຫຼື ເລ້ ອາຍຸ 43 ປີ ຢູ່ບ້ານພະຂາວ ເມືອງໄຊທານີ
- ນາງ ອໍາພອນ ອາຍຸ 35 ປີ ຢູ່ບ້ານສີໄຄທ່າ ເມືອງສີໂຄດຕະບອງ
+ ຜ່ານການສືບສວນ-ສອບສວນ ຜູ້ຖືກຫາທັງ 5 ຄົນ ຮັບສາລະພາບວ່າ:
ໄດ້ສົມຮູ້ຮ່ວມຄິດໂດຍການແບ່ງຄວາມຮັບຜິດຊອບກັນ ຕິດຕໍ່ພົວພັນກັບບັນດາບຸກຄົນ ແລະ ເຮັດທະບຽນປອມ ທີ່ຕ້ອງການແລ່ນເອກະສານຂຶ້ນທະບຽນໃບຂັບຂີ່ ແລະ ເສຍຄ່າທາງ ພາຍຫຼັງມີຄົນມາໃຊ້ບໍລິການ ພວກກ່ຽວໄດ້ພາກັນມາຜະລິດກາປະທັບ (ກາຈໍ້າ) ແລະ ກາຊື່ທີ່ບໍ່ມີໃບອະນຸຍາດນໍາໃຊ້, ປອມແປງດ້ວຍການຮຽກເກັບຄ່າແຮງງານ ລົດຈັກຄັນໜຶ່ງ 1.200.000 ກີບ ແລະ ເອກະສານລົດໃຫຍ່ 3.300.000 ກີບ.
ຜ່ານມາ, ພວກກ່ຽວໄດ້ຜະລິດທະບຽນລົດຈັກປອມ ຈໍານວນ 15 ຄັນ, ທະບຽນລົດໃຫຍ່ ຈໍານວນ 15 ຄັນ, ບັດປະຈໍາຕົວປອມ 2 ບັດ; ສໍາລັບການເຮັດແມ່ນ ທ້າວ ອານຸສິດ ຫຼື ເລ້ ເປັນຜູ້ເຮັດ, ສ່ວນ ທ້າວ ສົມລັກ ຫຼື ກົບ, ນາງອໍາພອນ, ທ້າວ ຈິດອານັນ ແລະ ທ້າວນ້ອຍ ເປັນຜູ້ເອົາຂໍ້ມູນລາຍຊື່ບຸກຄົນທີ່ຕ້ອງການເຮັດເອກະສານ ສົ່ງໃຫ້ ທ້າວອານຸສິດ ຫຼື ເລ້.
ການມ້າງຄະດີຄັ້ງນີ້, ເຈົ້າໜ້າທີ່ຍັງສາມາດເກັບກູ້ຂອງກາງຄະດີມາໄດ້ ລວມມີ:
- ປ້າຍທະບຽນປອມ 5 ແຜ່ນ
- ໃບຂັບຂີ່ພາຫະນະປອມ 14 ໃບ
- ໃບທະບຽນພາຫະນະປອມ 8 ໃບ
- ບັດປະຈໍາຕົວປອມ 2 ໃບ
- ໃບເສຍຄ່າທາງປອມ 2 ໃບ
- ໃບກວດກາເຕັກນິກປອມ 4 ໃບ
- ປຶ້ມເຫຼືອງປອມ 3 ຫົວ
- ໃບພີວີຊີກາດບໍ່ທັນໄດ້ພິມຕົວໜັງສື 40 ໃບ (ມີໄວ້ເພື່ອເຮັດ ແລະ ພິມຕົວໜັງສືໃສ່ ປະເພດໃບຂັບຂີ່ຍານພາຫະນະປອມ, ໃບທະບຽນຍານພາຫະນະປອມ, ບັດປະຈໍາຕົວປອມ),
- ກາປະທັບປອມກອງຄຸ້ມຄອງພາຫະນະ ແລະ ກາຂັບຂີ່ ນວ 1 ກາ
- ກາປະທັບກອງຄຸ້ມຄອງພາຫະນະ ແລະ ການຂັບຂີ່ແຂວງຄໍາມ່ວນ ບໍ່ມີອະນຸຍາດໃຫ້ນໍາໃຊ້ ຫຼື ເອີ້ນວ່າ ກາປະທັບປອມ 1 ກາ
- ກາຊື່ບຸກຄົນປອມ 3 ກາ
- ກາຈໍ້າວັນທີ 1 ອັນ
- ຄອມພີວເຕີຕັ້ງໂຕະ 1 ຊຸດ
- ເຄື່ອງປິ່ນເຕີ 2 ໜ່ວຍ
- ເຄື່ອງລີດບັດແຂງ 1 ໜ່ວຍ
- ເຄື່ອງຕັດເຈ້ຍ 1 ໜ່ວຍ
ປັດຈຸບັນ, ຄະດີດັ່ງກ່າວຍັງຢູ່ຂັ້ນຕອນສືບຕໍ່ເກັບກໍາຂໍ້ມູນຫຼັກຖານ ແລະ ຂະຫຍາຍຜົນສືບຄົ້ນຫາຜູ້ທີ່ຖືກຊັດທອດ ເພື່ອນໍາຕົວມາດໍາເນີນຄະດີຕາມກົດໝາຍ.
