ກອງສິລະປະກອນ ກົມໂຄສະນາອົບຮົມ ກົມໃຫຍ່ການເມືອງ ກະຊວງ ປກສ ໄດ້ຮັບຜົນສຳເລັດ ແລະ ມີການພັດທະນາ ເປັນກ້າວໆ ຕະຫຼອດໄລຍະ 16 ປີ (14 ກັນຍາ 2007-14 ກັນຍາ 2023) ເພື່ອຫວນຄືນເຖິງຜົນງານ ແລະ ໄຊຊະນະທີ່ກອງສິລະປະກອນປ້ອງກັນຄວາມສະຫງົບ ທີ່ໄດ້ທຸ່ມເທເຫື່ອແຮງສະຕິປັນຍາຢ່າງຕັ້ງໜ້າ ປະກອບສ່ວນເຂົ້າໃນວຽກງານປ້ອງກັນຄວາມສະຫງົບ ເວົ້າລວມ, ເວົ້າສະເພາະແມ່ນວຽກງານໂຄສະນາການອະນຸລັກຮັກສາຮີດຄອງປະເພນີ, ສິລະປະວັດທະນະທຳຂອງປະຊາຊົນລາວບັນດາເຜົ່າ ໃຫ້ຄຽງຄູ່ກັບຊາດລາວ-ຄົນລາວ ຕະຫຼອດໄປ.
ການກຳເນີດ ແລະ ການເຕີບໃຫຍ່ຂະຫຍາຍຕົວ ຂອງກອງສິລະປະກອນປ້ອງກັນຄວາມສະຫງົບ ແມ່ນໄດ້ຮັບການສ້າງຕັ້ງຂຶ້ນ ໃນວັນທີ 14 ກັນຍາ 2007 ເປັນວັນທີ່ມີຄວາມໝາຍສຳຄັນດ້ານປະຫວັດ ແລະ ມີການກໍາເນີດເຕີບໃຫ່ຍຂະຫຍາຍຕົວເປັນແຕ່ລະໄລຍະ; ກອງສິລະປະກອນປ້ອງກັນຄວາມສະຫງົບ ມາຮອດປັດຈຸຸບັນແມ່ນໄດ້ໝູນວຽນ ຄົບຮອບ 16 ປີ ຍ້ອນຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ແນໃສ່ເຮັດໃຫ້ຂະບວນການປຸກລະດົມຂົນຂວາຍວຽກງານການເມືອງແນວຄິດໃຫ້ນາຍ ແລະ ພົນຕໍາຫຼວດ ໃຫ້ມີຫຼາຍຮູບຫຼາຍສີ, ສາມາດເຊື່ອມຊຶມກຳແໜ້ນແນວທາງນະໂຍບາຍຂອງພັກ-ລະບຽບກົດໝາຍຂອງລັດ ໂດຍສະເພາະແມ່ນແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ທີ່ໄດ້ວາງອອກ ໃນແຕ່ລະໄລຍະ.
ພ້ອມກັນຈັດຕັ້ງຜັນຂະຫຍາຍຢ່າງມີປະສິດທິຜົນ ໂດຍຜ່ານດ້ານສິລະປະການສະແດງ, ໂຄສະນາເຜີຍແຜ່ມູນເຊື້ອຕໍ່ສູ້ຢ່າງພິລະອາດຫານ ຂອງກຳລັງປ້ອງກັນຄວາມສະຫງົບ, ເຊິ່ງຍາມໃດກຳລັງຂອງພວກເຮົາ ກໍມີນໍ້າໃຈເສຍສະຫຼະເພື່ອຊາດ, ເພື່ອປະຊາຊົນ, ໂຄສະນາຜົນງານ ແລະ ໄຊຊະນະອັນໂດດເດັ່ນ ເພື່ອເຮັດໃຫ້ປະຊາຊົນລາວບັນດາເຜົ່າຮັບຮູ້ ແລະ ເຂົ້າໃຈຕໍ່ວຽກງານປ້ອງກັນຄວາມສະຫງົບ ແລ້ວຕັ້ງໜ້າປະກອບສ່ວນເຂົ້າໃນວຽກງານດັ່ງກ່າວຢ່າງກວ້າງຂວາງ.
ເພື່ອສ້າງບັນຍາກາດເບີກບານມ່ວນຊື່ນໃຫ້ແກ່ນາຍ ແລະ ພົນຕໍາຫຼວດ ທົ່ວກຳລັງປ້ອງກັນຄວາມສະຫງົບ ທັງເປັນການປຸກລະດົມຂົນຂວາຍນໍ້າໃຈຟົດຟື້ນປະຕິວັດ ແລະ ສ້າງໄດ້ຂະບວນການແຂ່ງຂັນຕ່າງໆທີ່ຕິດພັນກັບໜ້າທີ່ການເມືອງ ໃນໄລຍະໃໝ່ ຢ່າງເປັນຂະບວນຟົດຟື້ນ ແລະມີໝາກຜົນຕົວຈິງ. ພ້ອມທັງເຄື່ອນໄຫວສະແດງຮັບໃຊ້ປະຊາຊົນ, ສ້າງໃຫ້ປະຊາຊົນມີຄວາມເບີກບານມ່ວນຊື່ນ ໃຫ້ສົມກັບຄຳເວົ້າທີ່ວ່າ: ກຳລັງປ້ອງກັນຄວາມສະຫງົບປະຊາຊົນລາວ ເປັນກຳລັງທີ່ມາຈາກປະຊາຊົນ,ໂດຍປະຊາຊົນ ແລະ ເພື່ອປະຊາຊົນ, ເຊິ່ງຍາມໃດກໍຮັບໃຊ້ປະຊາຊົນຢ່າງບໍ່ມີຂອບເຂດ ແລະ ບໍ່ມີເງື່ອນໄຂ.
ການເຕີບໃຫຍ່ຂະຫຍາຍຕົວ ຂອງກອງສິລະປະກອນປ້ອງກັນຄວາມສະຫງົບ: ມີການເຕີບໃຫຍ່ໃນແຕ່ລະໄລຍະ ບໍ່ວ່າຈະເປັນທາງດ້ານບຸກຄະລາກອນ, ວຽກງານວິຊາສະເພາະ, ການສົ່ງນາຍ ແລະ ພົນຕໍາຫຼວດສຶກສາຮໍ່າຮຽນດ້ານສິລະປະ, ວັດຖຸອຸປະກອນທາງດ້ານຕ່າງໆ ໃນການຮັບໃຊ້ສະແດງ ເຊິ່ງລະແດງອອກ ຄື:
+ ດ້ານຈຳນວນພົນ ແມ່ນມີ 5 ໄລຍະ:
- ໄລຍະທີ 1: ແມ່ນໄລຍະຂອງການເລີ່ມຕົ້ນສ້າງຕັ້ງ ກອງສິລະປະກອນ ປກສ ມີຈຳນວນພົນ 24 ສະຫາຍ ຍິງ 12 ສະຫາຍ, ມີຄະນະກອງ 2 ສະຫາຍ.
- ໄລຍະທີ 2: ແຕ່ປີ 2008-2010 ມີ 48 ສະຫາຍ ຍິງ 21 ສະຫາຍ, ປະກອບມີຄະນະກອງ 2 ສະຫາຍ.
- ໄລຍະທີ 3: ແຕ່ປີ 2010-2014 ມີຈໍານວນພົນ 61 ສະຫາຍ ຍິງ 27 ສະຫາຍ, ມີຄະນະກອງ 2 ສະຫາຍ.
- ໄລຍະທີ 4: ແຕ່ປີ 2014-2018 ມີຈໍານວນພົນ 66 ສະຫາຍ ຍິງ 33 ສະຫາຍ, ມີຄະນະກອງ 3 ສະຫາຍ.
- ໄລຍະທີ 5: ແຕ່ປີ 2023-ປັດຈຸບັນ ແມ່ນໄລຍະແຫ່ງການຍົກສູງຄຸນນະພາບ ແລະ ປະລິມານຢ່າງຮອບດ້ານ ເຊິ່ງມີຈໍານວນພົນທັງໝົດ 61 ຍິງ 36 ສະຫາຍ, ມີຄະນະກອງ 5 ສະຫາຍ ຍິງ 2 ສະຫາຍ.
+ ດ້ານການພັດທະນາບຸກຂະລາກອນ ໄປສຶກສາຮໍ່າຮຽນ:
ແມ່ນເປັນກອງສິລະປະທີ່ໄດ້ຮັບການສ້າງຕັ້ງໄດ້ພຽງ 16 ປີ, ເມື່ອເວົ້າເຖິງປະສົບການ ແລະ ພຶດຕິກຳຕົວຈິງ ແມ່ນຍັງບໍ່ທັນກວ້າງຂວາງເທົ່າທີ່ຄວນ, ວິຊາການດ້ານການປະດິດແຕ່ງ, ບົດຟ້ອນ, ບົດເພງ, ການປະດິດດົນຕຣີ ແມ່ນຍັງມີຄວາມຈຳກັດ, ນັກສະແດງຈຳນວນໜຶ່ງ ກໍບໍ່ໄດ້ຜ່ານວິຊາສະເພາະດ້ານການສະແດງ. ສະນັ້ນ, ຕໍ່ໜ້າສະພາບການດັ່ງກ່າວ, ຄະນະພັກ-ຄະນະກົມໂຄສະນາອົບຮົມ ກໍຄື ຄະນະກອງສິລະກອນ ປກສ ກໍໄດ້ເອົາໃຈໃສ່ປະສານສົມທົບກັບ ໂຮງຮຽນສິລະປະແຫ່ງຊາດ, ວິທະຍາໄລສິລະປະສຶກສາ ເພື່ອຍາດແຍ່ງການຊ່ວຍເຫຼືອສ້າງເງື່ອນໄຂໃຫ້ພະນັກງານພາຍໃນກອງ ໄດ້ໄປຍົກລະດັບວິຊາສະເພາະໄລຍະສັ້ນ ແລະ ໄລຍະຍາວ ເຊິ່ງກໍມີຫຼາຍສະຫາຍໄດ້ໄປຍົກລະດັບ ເຊັ່ນ:
- ຍົກລະດັບລະບົບຕໍ່ເນື່ອງຊັ້ນສູງ 4 ເດືອນ ຢູ່ໂຮງຮຽນສິລະປະສຶກສາ ຈໍານວນ 8 ສະຫາຍ ຍິງ 2 ສະຫາຍ
- ຍົກລະດັບລະບົບບຳລຸງຊັ້ນສູງ 1 ປີ ຢູ່ວິທະຍາໄລສິລະປະແຫ່ງຊາດ 16 ສະຫາຍ ຍິງ 4 ສະຫາຍ
- ຍົກລະດັບເຊື່ອມຕໍ່ປະລິນຍາຕີ 2 ປີ ຢູ່ວິທະຍາໄລສິລະປະສຶກສາ 2 ສະຫາຍ ຍິງ 1 ສະຫາຍ
- ຍົກລະດັບຊັ້ນສູງກໍ່ສ້າງ 2 ປີ ວິຊາສະເພາະຂອງກໍາລັງ ປກສ ມີ 3 ສະຫາຍ ຍິງ 1 ສະຫາຍ
- ຍົກລະດັບເຊື່ອມຕໍ່ປະລິນຍຕີເຊື່ອມຕໍ່ 2 ສະຫາຍ
- ຍົກລະດັບລະບົບບໍາລຸງຊັ້ນກາງ 3 ເດືອນ ວິຊາສະເພາະກໍາລັງ ປກສ ມີ 2 ສະຫາຍ ຍິງ 1 ສະຫາຍ
- ຍົກລະດັບລະບົບບໍາລຸງຊັ້ນສູງ 6 ເດືອນ ວິຊາສະເພາະກໍາລັງ ປກສ ມີ 1 ສະຫາຍ ຍິງ 1 ສະຫາຍ
ພ້ອມນີ້, ກໍໄດ້ຝຶກອົບຮົມວຽກງານວິຊາສະເພາະໄລຍະສັ້ນ ແຍກປະສານດົນຕຣີ 15 ວັນ ຈຳນວນພົນເຂົ້າຮ່ວມ 13 ສະຫາຍ ຍິງ 2 ສະຫາຍ, ຝຶກອົບຮົມເຕັກນິກພື້ນຖານການຟ້ອນ 2 ຄັ້ງ, ຝຶກອົບຮົມເຕັກນິກແສງສີ-ສຽງ 2 ຄັ້ງ ແລະ ຝຶກອົບຮົມວຽກງານພິທີກອນ 1 ຄັ້ງ.
+ ດ້ານການເຄື່ອນໄຫວແລະຜົນງານ:
ພາຍຫຼັງທີ່ກອງສິລະປະກອນ ໄດ້ຮັບການສ້າງຕັ້ງຂຶ້ນຢ່າງເປັນທາງການ ໃນວັນທີ 14 ກັນຍາ 2007, ຄະນະພັກ-ຄະນະບັນຊາ ກົມໂຄສະນາອົບຮົມ ກໍຄື ກົມໃຫຍ່ການເມືອງ ປ້ອງກັນຄວາມສະຫງົບ ໄດ້ເອົາໃຈໃສ່ສຶກສາອົບຮົມການເມືອງນຳພາແນວຄິດໃຫ້ແກ່ນາຍ ແລະ ພົນຕໍາຫຼວດພາຍໃນກອງສິລະປະກອນຢ່າງເປັນລະບົບຕໍ່ເນື່ອງ ແລະ ມີຫຼາຍຮູບຫຼາຍສີ, ສ້າງໃຫ້ພະນັກງານພາຍໃນກອງມີຄຸນສົມບັດສິນທຳປະຕິວັດ, ມີຄຸນທາດການເມືອງໜັກແໜ້ນ, ມີສະຕິຕໍ່ການຈັດຕັ້ງ, ມີລະບຽບວິໄນເຂັ້ມງວດ.
ພ້ອມກັນຈັດຕັ້ງປະຕິບັດທຸກມະຕິຄຳສັ່ງຂອງຂັ້ນເທິງ, ຕັ້ງໜ້າເຮັດໜ້າທີ່ວຽກງານວິຊາສະເພາະ ດ້ວຍຄວາມຮັບຜິດຊອບສູງ ໂດຍສະເພາະແມ່ນໄດ້ຈັດຕັ້ງການຝຶກຊ້ອມຫັດແອບຢ່າງເປັນລະບົບຕໍ່ເນື່ອງ, ໄດ້ຈັດຕັ້ງການເຄື່ອນໄຫວສະແດງຮັບໃຊ້ໜ້າທີ່ການເມືອງ, ຮັບໃຊ້ງານຕ່າງໆທີ່ສຳຄັນຂອງພັກ-ຊາດ ແລະ ສາກົນ, ໄດ້ເຄື່ອນໄຫວສະແດງຮັບໃຊ້ມວນຊົນ ໃນຂອບເຂດທົ່ວປະເທດຢ່າງກວ້າງຂວາງ; ຜ່ານການສະແດງຕົວຈິງ ເຫັນວ່າມີບັນຍາກາດເບີກບານມ່ວນຊື່ນ ແລະ ໄດ້ຮັບຄຳຍ້ອງຍໍຊົມເຊີຍຈາກຜູ້ຟັງ ແລະ ຜູ້ຊົມເປັນຢ່າງດີ. ນອກຈາກນັ້ນ, ກໍຍັງໄດ້ໄປເຄື່ອນໄຫວສະແດງຢູ່ຕ່າງປະເທດອີກຈຳນວນໜຶ່ງ.
ຕະຫຼອດໄລຍະ 16 ປີຜ່ານມາ, ຜ່ານການເຄື່ອນໄຫວຕົວຈິງ ສາມາດສັງລວມຜົນງານທີ່ພົ້ນເດັ່ນ ເປັນຕົ້ນແມ່ນໄດ້ຮັບໃຊ້ສະແດງອ້ອມຂ້າງກະຊວງ 589 ຄັ້ງ, ຮັບໃຊ້ສະແດງຕ່າງແຂວງ 23 ຄັ້ງ, ສະແດງຮັບໃຊ້ຢູ່ຕ່າງປະເທດ 20 ຄັ້ງ; ໃນນັ້ນ, ຢູ່ ສສ ຫວຽດນາມ 10 ຄັ້ງ, ປະເທດໄທໄທ 4 ຄັ້ງ, ປະເທດອິນໂດເນເຊຍ 1 ຄັ້ງ, ປະເທດບຣູໄນ 1 ຄັ້ງ, ປະເທດຍີ່ປຸ່ນ 2 ຄັ້ງ, ປະະເທດລັດເຊຍ 1 ຄັ້ງ, ປະເທດຈີນ 2 ຄັ້ງ, ປະເທດສະຫະພາບມຽນມາ 1 ຄັ້ງ, ສ້ອມແປງເຄື່ອງສຽງ 164 ຄັ້ງ, ປະດິດບົດຟ້ອນໄດ້ 91 ບົດ, ປະດິດບົດເພງ-ບົດລຳໄດ້41 ເພງ ແລະ ແຍກປະສານດົນຕຣີ 37 ເພງ.
ຈາກຜົນງານ ແລະ ໄຊຊະນະທີ່ຍາດມາໄດ້ ໃນໄລຍະທີ່ຜ່ານມານັ້ນ, ກອງສິລະປະກອນ ປກສ ໄດ້ຮັບການຍ້ອງຍໍຈາກຂັ້ນເທິງ ຄື: ໄດ້ຮັບໃບຍ້ອງຍໍ ຈາກ ສສ ຫວຽດນາມ2 ໃບ, ໄດ້ຮັບໃບຍ້ອງຍໍຈາກແຂວງຜົ້ງສາລີ 1 ໃບ, ໃບຊົມເຊີຍຈາກເຈົ້້າເມືອງສັງທອງ 1 ໃບ (ວັນສ້າງຕັ້ງເມືອງສັງທອງ ຄົບຮອບ 20 ປີ), ໄດ້ຮັບຫຼຽນກາແຮງງານ 3 ໜ່ວຍ, ໄດ້ຮັບຫຼຽນໄຊແຮງງານຊັ້ນ II ຈຳນວນ 5 ໜ່ວຍ ແລະ ໄດ້ຮັບຫຼຽນໄຊແຮງງານຊັ້ນ III ຈຳນວນ 2 ໜ່ວຍ.
ທິດທາງຕໍ່ໜ້າ, ເພື່ອປັບປຸງ ແລະ ຍົກລະດັບຢ່າງຮອບດ້ານຂອງ ກອງສິລະປະກອນ ປກສ ໃຫ້ມີຄວາມເຕີບໃຫຍ່ເຂັ້ມແຂງເທື່ອລະກ້າວ ກຽມພ້ອມຮັບໃຊ້ໜ້າທີ່ການເມືອງ ໃນສະເພາະໜ້າ ແລະ ຍາວນານ, ກອງສິລະປະກອນ ຈະສືບຕໍ່ສຶກສາອົບຮົມວຽກງານການເມືອງນຳພາແນວຄິດໃຫ້ນາຍ ແລະ ພົນຕໍາຫຼວດ ພາຍໃນກອງສິລະປະກອນ ປກສ ຢ່າງເປັນລະບົບຕໍ່ເນື່ອງ ແລະ ຫຼາຍຮູບຫຼາຍສີ, ສ້າງທັດສະນະແນວຄິດໃຫ້ມີຄຸນສົມບັດສິນທຳປະຕິວັດ, ມີຄຸນທາດການເມືອງໜັກແໜ້ນ ແລະ ມີລະບຽບວິໄນເຂັ້ມງວດ.
ເອົາໃຈໃສ່ປັບປຸງລະບົບກົງຈັກການຈັດຕັ້ງໃຫ້ພຽງພໍກັບຄວາມຮຽກຮ້ອງຕ້ອງການ ໃນການຊີ້ນຳບັນຊາຂອງແຕ່ລະໜ້າວຽກຕົວຈິງ, ຕ້ອງສ້າງວິຊາການດ້ານຕ່າງໆ ໃຫ້ມີຄວາມເຂັ້ມແຂງຢ່າງຮອບດ້ານ, ເພື່ອພ້ອມກັນປັບປຸງລາຍການສະແດງໃຫ້ມີຄຸນນະພາບ, ມີຫຼາກຫຼາຍສີສັນ ແລະ ມີການປະດິດແຕ່ງລາຍການສະແດງໃໝ່ຢູ່ເລື້ອຍໆ ແລະ ສືບຕໍ່ຈັດຕັ້ງການຝຶກຮົບຮົມວຽກງານວິຊາສະເພາະໄລຍະສັ້ນ, ລົງເກັບກຳຂໍ້ມູນເພື່ອມາຄົ້ນປະດິດລາຍການໃໝ່ໆ ກະກຽມຮັບໃຊ້ງານສະເຫຼີມສະຫຼອງ ວັນສ້າງຕັ້ງກຳລັງປ້ອງກັນຄວາມສະຫງົບ ແລະ ວັນສຳຄັນຂອງພັກ-ຂອງຊາດ.