ກອງປະຊຸມໃຫຍ່ ຄັ້ງທີ VIII ຂອງສະຫະພັນແມ່ຍິງຮາກຖານ ພະແນກສາທາລະນະສຸກ ນະຄອນຫຼວງວຽງຈັນ ຈັດຂຶ້ນທ້າຍອາທິດຜ່ານມາ, ເຂົ້າຮ່ວມໂດຍສະຫາຍ ນາງ ຫຼຽນຄໍາ ວິລະພັນ ຮອງປະທານສະຫະພັນແມ່ຍິງ ນະ ຄອນຫຼວງວຽງຈັນ; ສະຫາຍ ດຣ ບຸນທະວີ ເດດບັນດິດ ຮອງ ເລຂາພັກຮາກຖານ ຮອງຫົວໜ້າພະແນກສາທາລະນະສຸກ ນະຄອນຫຼວງວຽງຈັນ, ມີບັນດາຄະນະສະຫະພັນແມ່ຍິງ, ພ້ອມດ້ວຍສະມາຊິກ ແລະ ແຂກຮັບເຊີນເຂົ້າຮ່ວມ.
ສະຫາຍ ດຣ ນາງ ວົງຈັນ ພານຸວົງ ຄະນະບໍລິຫານງານ ສະຫະພັນແມ່ຍິງ ນະຄອນຫຼວງວຽງຈັນ ປະທານສະຫະ ພັນແມ່ຍິງພະແນກສາທາລະນະສຸກ ໄດ້ຜ່ານບົດສະຫຼຸບຕີລາຄາໄລຍະຜ່ານມາວ່າ:
ຄະນະສະພັນແມ່ຍິງຮາກຖານໄດ້ຕັ້ງໜ້າປັບປຸງການຈັດຕັ້ງ ຕິດພັນກັບວຽກງານການສ້າງໜ່ວຍພັກປອດໃສ ເຂັ້ມແຂງໜັກແໜ້ນ, ວຽກງານຂໍ້ແຂ່ງ ຂັນຮັກຊາດ ແລະ ພັດທະນາ ແລະ ຂໍ້ແຂ່ງຂັນ 3 ດີຂອງ ສະຫະພັນແມ່ຍິງລາວຢ່າງເຂັ້ມງວດ, ເອົາໃຈໃສ່ປຸກລະດົມ ສະມາຊິກແມ່ຍິງ ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ, ແກ້ໄຂປະກົດການຫຍໍ້ທໍ້ ໃນຖັນແຖວແມ່ຍິງ; ຄອບຄົວ ແລະ ສັງຄົມ. ຈາກການ ຈັດຕັ້ງປະຕິວຽກງານທີ່ກ່າວມາຂ້າງເທິງນັ້ນ ຍັງໄດ້ຮັບການຍ້ອງຍໍບຸກຄົນດີເດັ່ນຂັ້ນສູນກາງສະຫະພັນແມ່ຍິງ ຈໍານວນ 50 ສະຫາຍ, ຂັ້ນສະຫະພັນແມ່ຍິງ ນະຄອນຫຼວງວຽງຈັນ 2 ສະຫາຍ. ຄຽງຄູ່ກັນນັ້ນ, ຍັງໄດ້ຖືເອົາວຽກງານສຶກສາອົບຮົມການເມືອງແນວຄິດເປັນວຽກງານສໍາຄັນ ໃນການຈັດຕັ້ງປະຕິບັດວຽກງານວິຊາສະເພາະເຮັດໃຫ້ສະມາຊິກແມ່ຍິງມີຄວາມອຸ່ນອຽນທຸ່ນທ່ຽງ, ມີຄຸນສົມບັດສິນທໍາປະຕິວັດ.
ໃນກອງປະຊຸມໄດ້ມີການມອບໃບຍ້ອງຍໍຂັ້ນສະຫະ ພັນແມ່ຍິງ ນະຄອນຫຼວງວຽງຈັນ ຈໍານວນ 33 ສະຫາຍ, ໃບຊົມເຊີຍ 21 ສະຫາຍ ໃຫ້ກຽດມອບໂດຍ ສະຫາຍ ດຣ ບຸນທະວີ ເດດບັນດິດ ຮອງເລຂາພັກຮາກຖານ ຮອງຫົວ ໜ້າພະແນກສາທາລະນະສຸກ ແລະ ປ່ອນບັດເລືອກເອົາ ຄະນະສະຫະພັນແມ່ຍິງຮາກຖານຊຸດໃໝ່ມີຜູ້ລົງສະໝັກ 7 ສະຫາຍ; ເລືອກເອົາ 5 ສະຫາຍ ຜ່ານການປ່ອນບັດສາມາດເລືອກໄດ້ ສະຫາຍພະຍາບານຕີ ນາງ ວານຄໍາ ທໍາທອງ ເປັນປະທານສະຫະພັນແມ່ຍິງ, ສະຫາຍ ດຣ ນາງ ຄໍາຫຼ້າ ເພົ້າດາວັນ ເປັນຮອງປະທານ ທັງເປັນຜູ້ກວດກາ ແລະ ອີກ 3 ສະຫາຍ ເປັນຮອງປະທານ.
