ວັນທີ 13 ຕຸລາ ຜ່ານມາ, ກອງບັນຊາການ ປກສ ເມືອງສິງ ແຂວງຫຼວງນ້ຳທາ ໄດ້ຈັດກອງປະຊຸມລົງຕິດຕາມຊຸກຍູ້ການຈັດຕັ້ງ ແລະ ການເຄື່ອນໄຫວວຽກງານຕ້ານການຄ້າມະນຸດ ຂອງຄະນະກຳມະການຕ້ານການຄ້າມະນຸດຂັ້ນແຂວງ, ໂດຍມີ ທ່ານ ປອ ຈັນພິພັກ ກອງຈຳປາ ເຈົ້າເມືອງສີງ, ມີ ພັທ ນາງ ມະລິຈັນ ແກ້ວມະນີວົງ ຮອງຫົວໜ້າຫ້ອງຕຳຫຼວດ ປກສ ແຂວງ, ຫົວໜ້າກອງເລຂາຄະນະກຳມະການ ຕ້ານການຄ້າມະນຸດຂັ້ນແຂວງ, ພ້ອມດ້ວຍກຳມະການພັກເມືອງ, ຫົວໜ້າກອງບັນຊາການ ປກສ ເມືອງສີງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ພັຕ ເນັ່ງ ສຸກວົງສັກ ຫົວໜ້າພະແນກຕຳຫຼວດກອງບັນຊາການ ປກສ ເມືອງສິງ ໄດ້ຂຶ້ນລາຍງານການເຄື່ອນໄຫວວຽກງານຕ້ານການຄ້າມະນຸດ 1 ປີ ຜ່ານມາ,ເມືອງສິງ ມີພົນລະເມືອງ ສ້າງຄອບຄົວນຳຄົນຕ່າງປະເທດ 165 ຄົນ, ອາໄສຢູ່ເມືອງສິງ 71 ຄົນ.ໃນນີ້, ບຸກຄົນທີ່ປະກອບເອກະສານຖືກຕ້ອງ 5 ຄົນ, ກຳລັງປະກອບເອກະສານ 6 ຄົນ, ມີຄະດິເກີດຂຶ້ນ 7 ເລື່ອງ,ມີຜູ້ຖືກຫາ 17 ຄົນ,ຍິງ 7 ຄົນ.ໃນນີ້, ມີຄະດີຂົ່ມຂືນທຳສຳເນົາ 1ເລື່ອງ, ຜູ້ຖືກຫາ 1ຄົນ.
ຄະດີທຳມິດສະຈານ 4 ເລື່ອງ,ມີຜູ້ຖືກຫາ 8ຄົນ,ຍິງ 4 ຄົນ, ຄະດິີຄ້າມະນຸດ 1ລາຍ, ຜູ້ຖືກຫາ 7 ຄົນ, ຍິງ 3ຄົນ ແລະຄະດີອື່ນໆ. ສາເຫດທີ່ມີພົນລະເມືອງສິງ ລັກລອບແຕ່ງງານກັບຄົນຕ່າງປະເທດຫຼາຍ ກໍເນື່ອງຈາກວ່າເມືອງສິງ ມີຊາຍເເດນຕິດກັບ ສປ ຈີນ, ມີນັກລົງທືນເຂົ້າມາປະກອບທຸລະກິດຫຼາຍ ເຮັດໃຫ້ການຄົບຄ້າສະມາຄົມ ແລະ ເຮັດທຸລະກິດມີຫຼາຍຮູບແບບ.
ໃນໂອກາດນີ້, ທ່ານ ປອ ຈັນພິພັກ ກອງຈຳປາ ໄດ້ສະແດງຄວາມຊົມເຊີຍຕໍ່ຜົນງານທີ່ຍາດມາໄດ້ ພ້ອມທັງຮຽກຮ້ອງໃຫ້ຄະນະອະນຸກຳມະການຕ້ານການຄ້າມະນຸດຂັ້ນແຂວງ, ຂັ້ນເມືອງ ສືບຕໍ່ເຄື່ອນໄຫວຕ້ານ ແລະ ສະກັດກັ້ນບັນຫາດັ່ງກ່າວໃຫ້ດີຂຶ້ນກວ່າເກົ່າ.