ໃນທ້າຍອາທິດຜ່ານມາ, ພະແນກສະກັດກັ້ນ ແລະ ຕ້ານອັກຄີໄພ ກອງບັນຊາການ ປກສ ແຂວງອັດຕະປື ໄດ້ລົງຝຶກອົບຮົມວຽກງານສະກັດກັ້ນ ແລະ ຕ້ານອັກຄີໄພ ໃຫ້ພະນັກງານ ແລະ ເຈົ້າຂອງປ້ຳນ້ຳມັນເປໂຕຼລາວ ຢູ່ບ້ານສົມບູນ ເມືອງຊານໄຊ ແຂວງອັດຕະປື, ນໍາພາໂດຍ ຮອ ແສງຈັນ ນິນວົງສັກ ຮອງຫົວໜ້າພະແນກສະກັດກັ້ນ ແລະ ຕ້ານອັກຄີໄພ ກອງບັນຊາການ ປກສ ແຂວງອັດຕະປື, ມີເຈົ້າຂອງປ້ຳ ແລະ ພະນັກງານເຂົ້າຮ່ວມ.
ຮອ ແສງຈັນ ນິນວົງສັກ ໄດ້ຜ່ານເນື້ອໃນການຝຶກອົບຮົມໃນວຽກງານສະກັດກັ້ນ ແລະ ຕ້ານອັກຄີໄພຄັ້ງນີ້, ເຊິ່ງທຸກຄົນແມ່ນໄດ້ຮຽນກ່ຽວກັບຄວາມຮູ້ພື້ນຖານສະກັດກັ້ນ ແລະ ຕ້ານອັກຄີໄພ, ການນຳໃຊ້ອຸປະກອນມອດໄຟ, ການກູ້ໄພ, ການຊ່ວຍເຫຼືອຜູ້ປະສົບໄພ, ການປະຖົມພະຍາບານຜູ້ບາດເຈັບ, ການສາທິດຕົວຈິງຕາມແຕ່ລະຂັ້ນຕອນ ເພື່ອໃຫ້ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈເຖິງວຽກງານການສະກັດກັ້ນ ແລະ ຕ້ານອັກຄີໄພໄດ້ຢ່າງວ່ອງໄວ.
ພາຍຫຼັງໄດ້ຝຶກອົບຮົມຮໍ່າຮຽນພາກທິດສະດີສໍາເລັດແລ້ວ, ກໍໄດ້ໃຫ້ຜູ້ເຂົ້າຮ່ວມຝຶກອົບຮົມໄດ້ຜັດປ່ຽນກັນຝຶກແອບ ແລະ ປະຕິບັດຕົວຈິງຢູ່ສະຖານທີ່ດັ່ງກ່າວ; ເຊິ່ງການຝຶກອົບຮົມໃນຄັ້ງນີ້ ເຮັດໃຫ້ຜູ້ເຂົ້າຮ່ວມສາມາດຮັບຮູ້ ແລະ ເຂົ້າໃຈເຖິງຄວາມໝາຍ-ຄວາມສຳຄັນຂອງວຽກງານສະກັດກັ້ນ ແລະ ຕ້ານອັກຄີໄພ, ຄວາມອັນຕະລາຍຂອງອັກຄີ ໄພ, ສາມາດເຂົ້າໃຈເຖິງຄວາມຮູ້ພື້ນຖານອັນຈຳເປັນ ເພື່ອສາມາດປ້ອງກັນການເກີດອັກຄີໄພ ແລະ ສາມາດແກ້ສະຖານະການສຸກເສີນເມື່ອເກີດອັກຄີໄພ.
