ຂ່າວຕ່າງປະເທດລາຍງານໃນວັນທີ 20 ທັນວາ ນີ້ວ່າ: ເຈົ້າໜ້າທີ່ຕຳຫຼວດໂມນາໂກ ຈັບຊາຍ 4 ຄົນເປັນສະມາຊິກກຸ່ມກໍ່ການຮ້າຍ ISIS ທີ່ຖືກສົງໄສຮ່ວມກັນກໍ່ເຫດຄາດຕະກຳຕັດຄໍຍິງຊາວຕ່າງຊາດຈາກດານມາກ ແລະ ນອກແວ.
ຂ່າວລາຍງານຄວາມຄືບໜ້າເຫດຄາດຕະກຳຄັ້ງນີ້ ໃຫ້ຮູ້ວ່າ ເຈົ້າໜ້າທີ່ຕຳຫຼວດຂອງໂມນາໂກ ກຳລັງສືບສວນ-ສອບສວນກຸ່ມຕິດອາວຸດລັດອິດສະລາມ ຫຼື ISIS ອາດກ່ຽວຂ້ອງກັບການຄາດຕະກຳຕັກຄໍຜູ້ເຄາະຮ້າຍຍິງທັງສອງຄົນ, ເຈົ້າໜ້າທີ່ໄດ້ຈັບກຸມຜູ້ຖືກສົງໄສຊາຍ 4 ຄົນທີ່ຮ່ວມກັນກໍ່ເຫດແລ້ວ, ເຊິ່ງພວກຖືກສົງໄສທັງ 4 ຄົນ ເຄີຍສາບານຕົນເຂົ້າຮ່ວມເປັນພັນທະມິດກັບກຸ່ມ ISIS. ປັດຈຸບັນ, ທາງການໂມນາໂກ ໄດ້ດຳເນີນການສອບສວນເຫດຄາດຕະກຳໃນຖະນາເປັນການກໍ່ການຮ້າຍ.
ນັກທ່ອງທ່ຽວຍິງຜູ້ເຄາະຮ້າຍ 2 ຄົນ ທີ່ຖືກຄາດຕະກຳຢ່າງຮ້າຍແຮງ ຄົນທຳອິດຊື່ນາງ ລຸຍຊ່າ ເວດສະທີຣາເກີ ເຈສເປີເຊ່ນ (Louisa Vesterager Jespersen) ຊາວດານມາກ ອາຍຸ 24 ປີ ແລະ ອີກຄົນໜຶ່ງຊື່ນາງ ມາເຣນ ອູແລນ (Maren Uekand) ອາຍຸ 28 ປີ ມາຈາກປະເທດນອກແວ ຖືກພົບສົບໃນສະພາບຖືກຄາດຕະກຳຕັດຄໍໃກ້ກັບບ້ານອິມລິນ, ເຊິ່ງເປັນບ້ານທີ່ນັກທ່ອງທ່ຽວມັກໄປພັກຄ້າງຄືນ ເພື່ອກຽມຂຶ້ນພູ Mount Toukal,ເຊິ່ງເປັນຈອມພູສູງທີ່ສຸດໃນທະວິບອາຟຣິກກາຕອນເໜືອ.
ພາບຈາກກ້ອງວົງຈອນປິດ ຖືກນຳມາເຜີຍແຜ່ສົ່ງຕໍ່ກັັນໃນສື່ອອນລາຍ ສະແດງໃຫ້ເຫັນວ່າ ກຸ່ມຊາຍຖືກສົງໄສກຳລັງຍ່າງໄປບໍລິເວນທີ່ແມ່ຍິງຊາວຕ່າງຊາດທັງສອງຄົນກຳລັງນອນຫຼັບຢູ່ໃນເຕັ້ນ. ຈາກນັ້ນ, ໃນວັນທີ 17 ທັນວາ, ນັກປິນພູຊາວຝຣັ່ງ ໄດ້ພົບສົບຜູ້ເຄາະຮ້າຍນັກທ່ອງທ່ຽວຍິງ 2 ຄົນ ໂດຍຄົນໜຶ່ງຖືກທຳຮ້າຍຮ່າງກາຍຕົນເສຍຊີວິດຢູ່ພາຍໃນເຕັ້ນ ແລະ ອີກຄົນໜຶ່ງເສຍຊີວິດຢູ່ນອກເຕັ້ນ, ເຊິ່ງຄົນໜຶ່ງຖືກຂ້າຕັດຄໍ, ສ່ວນອີກຄົນໜຶ່ງຖືກມີດປາດຄໍ ຈົນເຮັດໃຫ້ເສຍຊີວິດ.