ໃນວັນທີ 6 ພຶດສະພາ, ສຳນັກຂ່າວ ເອພີ ລາຍງາຍ ຄະດີຄາດຕະກຳສະເທືອນຂວັນ ໃນປະເທດໄຊປຣັສ ທີ່ເປັນຂ່າວໃຫຍ່ໃນເອີຣົບ ຈາກການທີ່ຜູ້ເຄາະຮ້າຍສ່ວນຫຼາຍເປັນຜູ້ຍິງ ແລະ ເດັກຍິງຕ່າງຊາດ ພ້ອມທັງກາຍເປັນເລື່ອງໂຈມຕີເຈົ້າໜ້າທີ່ໄຊປຣັສ ຢ່າງກວ້າງຂວາງ ວ່າ ບໍ່ສອບສວນເພື່ອຢັບຢັ້ງເຫດຢ່າງຈິງຈັງ ເນື່ອງຈາກຜູ້ເຄາະຮ້າຍເປັນຜູ້ຍິງດ້ອຍສະຖານະທາງສັງຄົມ.
ຫຼ້າສຸດ, ເຈົ້າໜ້າທີ່ ພົບສົບທີ 2 ຖືກຍັດໃສ່ຖົງ ແລະ ຖິ້ມໄວ້ໃນທະເລສາບທີ່ນໍ້າປົນເປື້ອນພິດ ໃນວັນທີ 5 ພຶດສະພາ ທີ່ຜ່ານມາ ຕາມຄຳໃຫ້ການຂອງຜູ້ຖືກສົງໄສ ເຊິ່ງເປັນນາຍທະຫານ ສາລະພາບວ່າ:
ສັງຫານຜູ້ຍິງ ແລະ ເດັກສາວ 7 ຄົນ ໃນຈຳນວນນີ້ຍັດໃສ່ຖົງໄປຖິ້ມລົງທະເລສາບ 3 ຄົນ.
ທະເລສາບດັ່ງກ່າວ ສ້າງຂຶ້ນໃນເຂດເໝືອງແຮ່ ທີ່ໝູ່ບ້ານມິດເຊໂຣ ຫ່າງຈາກນະຄອນຫຼວງນິໂຄເຊຍ ປະມານ 32 ກິໂລແມັດ ຖືກຖິ້ມໄວ້ໃນສະພາບທີ່ນໍ້າປົນເປື້ອນ ສານໄພໄຣ ທອງແດງ; ເຈົ້າໜ້າທີ່ ພົບສົບທຳອິດໂດຍບັງເອີນ ໃນວັນທີ 28 ເມສາ ທີ່ຜ່ານມາ ເນື່ອງຈາກເກີດນໍ້າຖ້ວມ ຈາກນັ້ນຈຶ່ງສອບສວນ ແລະ ພົບວ່າ ເປັນຄະດີຄາດຕະກຳຕໍ່ເນື່ອງ ຄະດີທຳອິດຂອງປະເທດ ແລະ ສະຢອງຂວັນທີ່ສຸດ ຕັ້ງແຕ່ເຈົ້າໜ້າທີ່ພົບມາ.
ຜູ້ຖືກສົງໄສ ເປັນນາຍທະຫານຊັ້ນຮ້ອຍເອກ ອາຍຸ 25 ປີ ໃຫ້ການສາລະພາບວ່າ:
ສັງຫານຜູ້ຍິງ 5 ຄົນ, ເດັກຍິງ 3 ຄົນ ແລະ ນຳຮ່າງທີ່ເນົ່າເປື່ອຍແລ້ວ 3 ຄົນ ໃນຈຳນວນນີ້ ເປັນຍິງຊາວຟິລິບປິນ 1 ຄົນ ແລະ ຍິງຊາວຢິບຊີແມ່ລູກ 2 ສົບ ໄປຖິ້ມລົງທະເລສາບ.
ດ້ານເຈົ້າໜ້າທີ່ນິຕິເວດວິທະຍາ ຈະສັນນະສູດສົບເພື່ອພິສູດລັກສະນະບຸກຄົນ, ສ່ວນທີມນັກດຳນໍ້າ ຍັງຄົງໃຊ້ອຸປະກອນຄື້ນໂຊນາ ກວດຫາຖົງອີກອັນໃຕ້ກົ້ນທະເລສາບ.
ຄະດີນີ້ ເຮັດໃຫ້ ລັດຖະມົນຕີ ກະຊວງຍຸຕິທຳ ແລະ ຜູ້ບັນຊາການຕຳຫຼວດແຫ່ງຊາດ ຕ້ອງລາອອກຈາກຕຳແໜ່ງ ຫຼັງຈາກຖືກຕຳນິ ແລະ ກ່າວຫາວ່າ:
ລະເລີຍການສອບສວນມາດົນນານ ເມື່ອມີຜູ້ເຄາະຮ້າຍຫາຍຕົວໄປຕັ້ງແຕ່ 2 ປີເຄິ່ງ ທີ່ຜ່ານມາ ແລະ ສົງໄສວ່າ ຄາດຕະກອນຍັງຄົງລົງມືຕໍ່ ເນື່ອງຈາກຍັງມີຜູ້ຍິງຫາຍຕົວໄປຢູ່ ແຕ່ເນື່ອງຈາກເປັນຊາວຕ່າງຊາດທີ່ມີສະຖານະດ້ອຍທາງສັງຄົມ ຕຳຫຼວດຈຶ່ງບໍ່ສົນໃຈຈະແກ້ໄຂຄະດີ.
ທ່ານ ນີໂອໄພຕອສ ຊາໄອລອສ ຫົວໜ້າພະແນກສືບສວນ-ສອບສວນ ຄະດີອາຊະຍາກຳ ແຈ້ງຕໍ່ສານໃນນະຄອນຫຼວງນິໂຄເຊຍ ວ່າ:
ພົບຫຼັກຖານໃນໂທລະສັບຂອງຜູ້ຖືກສົງໄສ ບົ່ງບອກວ່າກໍ່ຄະດີຕັ້ງແຕ່ຕົ້ນປີ 2017 ໂດຍຜູ້ຖືກສົງໄສຕິດຕໍ່ຫາຜູ້ເຄາະຮ້າຍທາງອອນລາຍ ໃນຈຳນວນນີ້ມີການຮັບຜູ້ເຄາະຮ້າຍຊາວຕ່າງຊາດ ອາຍຸ 19 ປີ ຂຶ້ນລົດໄປຂົ່ມຂືນ.
ຕໍ່ມາ, ຜູ້ເຄາະຮ້າຍ ໂທຫາຜູ້ເປັນເມຍຂອງທະຫານຄົນນີ້ ແລະ ເລົ່າວ່າເກີດຫຍັງຂຶ້ນ ແຕ່ບໍ່ແນ່ໃຈວ່າ ຈາກນັ້ນຜູ້ເປັນເມຍຂອງຜູ້ຖືກສົງໄສ ມີປະຕິກິລິຍາແນວໃດ ຫຼື ບໍ? ປັດຈຸບັນ, ຜູ້ເປັນເມຍ ຢ່າຂາດຈາກຜູ້ຖືກສົງໄສແລ້ວ ໂດຍມີລູກນໍາກັນ 2 ຄົນ.
ໃນວັນທີ 5 ພຶດສະພາ ທີ່ຜ່ານມາ, ຜູ້ຖືກສົງໄສ ຖືກນຳຕົວຂຶ້ນສານ ໂດຍໃສ່ເສື້ອເກາະກັນລູກປືນ, ສານອະນຸຍາດໃຫ້ເຈົ້າໜ້າທີ່ກັກຕົວໄວ້ສອບສວນອີກ 8 ມື້, ຂະນະນີ້ ຍັງບໍ່ມີການເປີດເຜີຍຊື່ ນາຍທະຫານຜູ້ຖືກສົງໄສຄົນນີ້ ເນື່ອງຈາກຍັງບໍ່ໄດ້ຕັ້ງຂໍ້ຫາຢ່າງເປັນທາງການ.
ສຳລັບຜູ້ເຄາະຮ້າຍທີ່ມີການເຜີຍຊື່ແລ້ວ ຄື ແມ່ລູກຊາວຢິບຊີ ນາມສະກຸນ ບູເນຍ ແລະ ອີກສອງຄົນ ຊື່ ແມຣີ ໂຣສ ອາຍຸ 38 ປີ ແລະ ແອຣຍນ ປາລານາສ ອາຍຸ 28 ປີ ທັງສອງເປັນຊາວຟິລິບປິນ ສົບຖືກພົບທີ່ເມືອງຮ້າງ ໄລຍະເວລາຫ່າງກັນ 6 ມື້.
ທາງດ້ານ ປະທານາທິບໍດີ ນິກອສ ອະນາສຕາເຊຍເດສ ກ່າວວ່າ:
ຜູ້ຖືກສົງໄສ ເປັນຄາດຕະກອນຕໍ່ເນື່ອງ ແລະ ກ່າວຂໍໂທດຕໍ່ນັກການທູດ ຂອງປະເທດທີ່ຕົກເປັນຜູ້ເຄາະຮ້າຍ ໃນຄະດີນີ້ແລ້ວ ພ້ອມກັບປະກາດເພີ່ມມາດຕະການເບິ່ງແຍງດູແລ ແຮງງານຕ່າງຊາດ ໃນປະເທດໃຫ້ດີຂຶ້ນ.
