ສະກຸນເງິນລີຣາ ຂອງຕວັກກີ ຫຼຸດລົງເຖິງລະດັບຕໍ່າທີ່ສຸດ ໃນຮອບ 7 ເດືອນ ໃນວັນທີ 7 ພຶດສະພາ ທີ່ຜ່ານມາ ຫຼັງຈາກ ຄະນະກຳມະການການເລືອກຕັ້ງ ຕວັກກີ ປະກາດຈັດການເລືອກຕັ້ງຄັ້ງໃໝ່ ໃນນະຄອນຫຼວງອິສຕັນບູ ຕາມຄວາມຕ້ອງການຂອງ ພັກຄວາມຍຸຕິທຳ ແລະ ການພັດທະນາ (AKP) ເຊິ່ງເປັນພັກລັດຖະບານຂອງຕວັກກີ ທີ່ໄດ້ລະບຸວ່າ:
ມີການທຸຈະລິດໃນການເລືອກຕັ້ງດັ່ງກ່າວ.
ທັ້ງນີ້, ລີຣາ ຫຼຸດລົງເຖິງ 6,1944 ທຽບກັບໂດລາ ທ່າມກາງຄວາມກັງວົນຂອງນັກລົງທຶນກ່ຽວກັບ ການແຊກແຊງທາງການເມືອງ ແລະ ທຶນສຳຮອງເງິນຕາຕ່າງປະເທດທີ່ຫຼຸດໜ້ອຍລົງ ລວມທັງການຂາດດຸນບັນຊີເງິນກະແສລາຍວັນທີ່ສູງຂຶ້ນ ໂດຍ ຄະນະກຳມະການເລືອກຕັ້ງ ກຳນົດການເລືອກຕັ້ງຄັ້ງໃໝ່ ໃນວັນທີ 23 ມິຖຸນາ.
ທາງດ້ານນັກວິເຄາະ ໃຫ້ຄວາມເຫັນວ່າ:
ນັກລົງທຶນຕ່າງປະເທດ ຈະມີຄວາມກັງວົນກ່ຽວກັບ ພາວະໄຮ້ສະຖຽນລະພາບທາງການເມືອງ ເຊິ່ງຈະເຮັດໃຫ້ການໄຫຼອອກຂອງເງິນທຶນ ໄປຍັງສິນຊັບປອດໄພ ລວມທັງສ້າງຄວາມບໍ່ໝັ້ນໃຈຕໍ່ຄວາມເປັນອິດສະຫຼະພາບ ແລະ ຄວາມໜ້າເຊື່ອຖືຂອງສະຖາບັນຕ່າງໆ ໃນຕວັກກີ.
ກ່ອນໜ້ານີ້, ຄະນະກຳມະການການເລືອກຕັ້ງ ລະບຸວ່າ: ທ່ານ ອີເຄຣມ ອິມາໂມກູນ ເຊິ່ງເປັນຜູ້ສະໝັກຈາກພັກຝ່າຍຄ້ານ ສາມາດຊະນະການເລືອກຕັ້ງ ໃນນະຄອນຫຼວງອິສຕັນບູ ດ້ວຍຄະແນນ 14.000 ຄະແນນ, ຂະນະທີ່ ພັກເອເຄພີ ສູນເສຍຕຳແໜ່ງເຈົ້າຄອງນະຄອນ ຫຼັງຈາກທີ່ຄອງອຳນາດໃນນະຄອນຫຼວງອິສຕັນບູ ເປັນເວບາ 25 ປີ.
