ສຳນັກຂ່າວ ເດລີ ສະຕາ ລາຍງານ ໃນວັນທີ 8 ພຶດສະພາ ທີ່ຜ່ານມາ ວ່າ: ເຮືອບິນຂອງສາຍການບິນ ພິມານ ສາຍການບິນແຫ່ງຊາດຂອງບັງກຼາເດດ ໄຫຼອອກນອກຣັນເວ ຂະນະລົງຈອດທີ່ສະໜາມບິນນາໆຊາດ ນະຄອນຫຼວງຢາງກຸງ ປະເທດມຽນມາ ສົ່ງຜົນໃຫ້ຜູ້ໂດຍສານ ແລະ ພະນັກງານ ລວມ 33 ຄົນ ໄດ້ຮັບບາດເຈັບ.
ຝ່າຍປະຊາສຳພັນຂອງສາຍການບິນ ພິມານ ລະບຸວ່າ:
ເຮືອບິນບອມບາເດຍ ແດສ 8 ຄິວ 400 ຖ້ຽວບິນບີຈີ 060 ເດີນທາງອອກຈາກສະໜາມບິນນາໆຊາດ ຈາລານ ຂອງບັງກຼາເດດ ໃນເວລາປະມານ 15:45 ໂມງ ຕາມເວລາທ້ອງຖິ່ນ ແລະ ປະສົບອຸບັດຕິເຫດໄຫຼອອກນອກຣັນເວ ທີ່ສະໜາມບິນນາໆຊາດ ນະຄອນຢາງກຸງ ໃນເວລາປະມານ 18:20 ໂມງ ເນື່ອງຈາກສະພາບອາກາດບໍ່ດີ, ສ່ວນຕົວເຮືອບິນ ແມ່ນໄດ້ຮັບຄວາມເສຍຫາຍໜັກ ເຊັ່ນກັນ.
ທັ້ງນີ້, ຜູ້ໂດຍສານ ແລະ ພະນັກງານ ລວມ 33 ຄົນ ໄດ້ຮັບບາດເຈັບ ແຕ່ບໍ່ມີໃຜຢູ່ໃນອາການວິກິດ. ແນວໃດກໍຕາມ, ໃນຈຳນວນນີ້ມີ 15 ຄົນ ຖືກນຳສົ່ງໂຮງໝໍແລ້ວ ແລະ ຂະນະນີ້, ສະໜາມບິນນາໆຊາດ ນະຄອນຢາງກຸງ ກໍໄດ້ຢຸດຕິການບິນຫຼັງເກີດເຫດແລ້ວ.
