ວັນທີ 29 ພຶດສະພາ 2019 ກອງບັນຊາການ ປກສ ແຂວງເຊກອງ ໄດ້ຈັດພິທີປະກາດການ ເລື່ອນຊັ້ນໃຫ້ນາຍຕໍາຫຼວດ ທັງ ໝົດ 7 ສະຫາຍ, ທີ່ມີຜົນງານດີເດັ່ນ ແລະ ຄົບເງື່ອນໄຂຂອງການເລື່ອນຊັ້ນ ໂດຍການປະດັບຊັ້ນ ຂອງ ພັທ ສົມສັກ ຂັດຕິຍະວົງ ຮອງຫົວໜ້າກອງບັນຊາການ ປກສ ແຂວງ ມີບັນດາຄະນະພັກ, ຄະນະຫ້ອງ, ຄະນະບັນຊາ, ຕະຫຼອດຮອດພະນັກງານຫຼັກແຫຼ່ງ ທີ່ໄດ້ຮັບເລື່ອນຊັ້ນໃໝ່ເຂົ້າຮ່ວມ.
ພັທ ອາພັບ ຖິ່ນອົງແກ້ວ ຫົວໜ້າຫ້ອງການເມືອງ ປກສ ແຂວງ ໄດ້ຂຶ້ນຜ່ານຂໍ້ຕົກລົງຂອງ ກະຊວງປ້ອງກັນຄວາມສະຫງົບ ເລກທີ 930/ປກສ ວ່າດ້ວຍການເລື່ອນຊັ້ນໃຫ້ນາຍຕຳຫຼວດ ກອງບັນຊາການ ປກສ ແຂວງເຊກອງ, ເຊິ່ງມີພະນັກງານໄດ້ຮັບການເລື່ອນຊັ້ນ ໃນຄັ້ງນີ້ທັງໝົດ 7 ສະຫາຍ ຍິງ1 ສະຫາຍ, ເລື່ອນຊັ້ນ ພັນຕີ ຂຶ້ນ ພັນໂທ ມີ 5 ສະຫາຍ, ຮ້ອຍເອກ ຂຶ້ນ ພັນຕີ 2 ສະຫາຍ.
ພັທ ສົມສັກ ຂັດຕິຍະວົງ ໄດ້ເນັ້ນໃຫ້ພະນັກງານທີ່ໄດ້ຮັບການເລື່ອນຊັ້ນໃນຄັ້ງນີ້ ຈົ່ງສືບຕໍ່ຝຶກຝົນຫຼ່ໍຫຼອມຕົນເອງ, ເພີ່ມຄວາມຮັບຜິດຊອບໃນໜ້າທີ່ການເມືອງທີ່ໄດ້ມອບໝາຍ, ມີແບບແຜນວິທະ ຍາສາດທີ່ທັນສະໄໝສອດຄ່ອງ ກັບສະພາບຕົວຈິງ, ສາມາດເປັນ ແບບຢ່າງທີ່ດີຮອບດ້ານໃຫ້ກໍາລັງ ປ້ອງກັນຄວາມສະຫງົບ ປກສ ແຂວງເຊກອງ ກ້າວຂຶ້ນຢ່າງບໍ່ຢຸດຢັ້ງ.
