ກອງບັນຊາການ ປກສ ແຂວງອຸດົມໄຊ ໄດ້ຈັດຕັ້ງເຊື່ອມຊຶມເອກະສານ ການສຶກສາອົບຮົມການເມືອງ-ແນວຄິດ ເພື່ອກະກຽມກອງປະຊຸມໃຫຍ່ 3 ຂັ້ນ ຂອງພັກ ໃຫ້ພະນັກງານຫຼັກແຫຼ່ງ ໃນວັນທີ 11 ມິຖຸນາ 2019, ເປັນປະທານໂດຍ ສະຫາຍ ພົຈວ ນິລະວົງ ເຈືອງຕະວະລາດ ກຳມະການປະຈຳພັກແຂວງ ຫົວໜ້າກອງບັນຊາການ ປກສ ແຂວງອຸດົມໄຊ, ມີ ສະຫາຍ ໂອວາດ ຈັນທະວົງ ກຳມະການປະຈຳພັກແຂວງ ປະທານແນວລາວສ້າງຊາດແຂວງ, ມີ ຄະນະພັກ-ຄະນະກອງບັນຊາການ, ບັນດາຫ້ອງ, ໂຮງຮຽນ, ກອງ, ຄ້າຍ ແລະ ພະນັກງານຫຼັກແຫຼ່ງ ເຂົ້າຮ່ວມ.
ເອກະສານທີ່ນຳມາຈັດຕັ້ງເຊື່ອມຊຶມຄັ້ງນີ້ ລວມມີ 3 ເອກະສານ ຄື:
ເອກະສານເສີມຂະຫຍາຍມູນເຊື້ອ ແລະ ຄວາມສາມັກຄີເປັນເອກະພາບພາຍໃນພັກ, ເອກະສານຍົກສູງຄວາມສາມາດນໍາພາ ແລະ ຄວາມເປັນແບບຢ່າງນຳໜ້າຂອງພັກ, ເອກະສານຕັ້ງໜ້າຝຶກຝົນຫຼ່ໍຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ.
ທັ້ງນີ້, ກໍເພື່ອແນໃສ່ຍົກລະດັບຄວາມຮັບຮູ້-ຄວາມເຂົ້າໃຈຂອງ ສະມາຊິກພັກ ພາຍໃນກຳລັງ ກ່ຽວກັບເນື້ອໃນກອງປະຊຸມໃຫຍ່ ຄັ້ງທີ X ຂອງພັກ ໃຫ້ເລິກເຊິ່ງກວ່າເກົ່າ ໂດຍສະເພາະ ແມ່ນການເສີມຂະຫຍາຍມູນເຊື້ອ ແລະ ຄວາມສາມັກຄີເປັນເອກະພາບພາຍໃນພັກ, ການຍົກສູງຄວາມສາມາດນຳພາ ແລະ ຄວາມເປັນແບບຢ່າງນຳໜ້າຂອງພັກ, ຕັ້ງໜ້າຝຶກຝົນຫຼ່ໍຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ, ເຮັດໃຫ້ການຈັດຕັ້ງພັກມີຄວາມປອດໃສ, ເຂັ້ມແຂງ, ໜັກແໜ້ນ ແລະ ສືບຕໍ່ເຮັດສຳເລັດໜ້າທີ່ການເມືອງ ໃນເງື່ອນໄຂປັດຈຸບັນ ໄດ້ເປັນຢ່າງດີ.
ໃນວັນດຽວກັນ, ກໍໄດ້ມີການທາບທາມເອົາບຸກຄະລາກອນ ຮອບທີ 1 ເຊິ່ງໃຫ້ກຽດເປັນປະທານ ໂດຍ ສະຫາຍ ຄຳພຽງ ຢາຈົງວາ ຮອງເລຂາພັກແຂວງ ຮອງເຈົ້າແຂວງໆອຸດົມໄຊ, ມີ ຄະນະທີມງານຮັບຜິດຊອບຂັ້ນແຂວງ ເຂົ້າຮ່ວມ ແລະ ສະຫາຍ ກອງແກ້ວ ພູນທິລັດ ກຳມະການພັກແຂວງ ຫົວໜ້າຄະນະຈັດຕັ້ງແຂວງ ກໍໄດ້ຂຶ້ນຜ່ານມາດຖານເງື່ອນໄຂຂອງ ຜູ້ສະໝັກຮັບເລືອກຕັ້ງເຂົ້າໃນອົງຄະນະພັກ ກອງບັນຊາການ ປກສ ແຂວງອຸດົມໄຊ ຕາມ 5 ມາດຖານເງື່ອນໄຂຂອງພັກ ເຊັ່ນ:
ຕ້ອງແມ່ນບຸກຄົນທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ ແລະ ຕໍ່ປະຊາຊົນ, ມີຄວາມຮູ້-ຄວາມສາມາດທີ່ແນ່ນອນ, ມີແບບແຜນການດຳລົງຊີວິດທີ່ປອດໃສຂາວສະອາດ, ມີສຸຂະພາບແຂງແຮງ, ມີແບບແຜນວິທີເຮັດວຽກທີ່ມີວິທະຍາສາດ, ມີຫົວຄິດປະດິດສ້າງ ແລະອຶ່ນໆ ເພື່ອເຮັດສຳເລັດໜ້າທີ່ທີ່ການຈັດຕັ້ງຂັ້ນເທິງ ມອບໝາຍໃຫ້ ໄດ້ເປັນຢ່າງດີ.
ຈາກນັ້ນ, ກໍໄດ້ປ່ອນບັດທາບທາມຢັງຫາງສຽງຂອງ ອົງຄະນະພັກ ກອງບັນຊາການ ປກສ ແຂວງອຸດົມໄຊ ຮອບທີ 1 ຂຶ້ນຢ່າງເປັນທາງການ.
