ໃນວັນທີ 1 ກໍລະກົດ ທີ່ຜ່ານມາ, ສຳນັກຂ່າວ ບີບີຊີ ລາຍງານສະພາບອາກາດປັ່ນປ່ວນ ທີ່ສ້າງຄວາມໜ້າຕົກໃຈ ໃນເມືອງກົວດາລາຮາຣາ ລັດຮາລິສໂກ ທາງທິດຕາເວັນຕົກຂອງປະເທດເມັກຊິກ ຫຼັງຈາກເກີດ ພາຍຸໝາກເຫັບ ຕົກລົງມາຢ່າງຮຸນແຮງ ທ່າມກາງອາກາດຮ້ອນອົບເອົ້າ ທີ່ມີອຸນຫະພູມຫຼາຍກວ່າ 30 ອົງສາເຊ ໂດຍໝາກເຫັບຕົກຕໍ່ເນື່ອງ ຈົນທັບຖົມພື້ນທີ່ສູງເຖິງ 1,5 ແມັດ.
ດ້ານທາງການທ້ອງຖິ່ນ ລະບຸວ່າ:
ມີອາຄານບ້ານເຮືອນ ປະມານ 200 ຫຼັງ ໄດ້ຮັບຄວາມເສຍຫາຍ, ຂະນະດຽວກັນ ກໍເກີດນໍ້າແຂງລະລາຍ ໄຫຼຖ້ວມບາງພື້ນທີ່ ແລະ ມີຕົ້ນໄມ້ລົ້ມກັນເປັນກອງ. ແນວໃດກໍຕາມ, ຍັງບໍ່ພົບ ຜູ້ບາດເຈັບ ຫຼື ຜູ້ເສຍຊີວິດ.
ທັ້ງນີ້, ມັນບໍ່ແມ່ນເລື່ອງແປກ ທີ່ຈະມີ ພາຍຸໝາກເຫັບ ຕົກໃນພື້ນທີ່ອາກາດຮ້ອນຈັດ ແຕ່ຊາວເມືອງກົວດາລາຮາຣາ ລະບຸເປັນສຽງດຽວກັນວ່າ ບໍ່ເຄີຍພົບເຈີ ພາຍຸໝາກເຫັບຮຸນແຮງ ແລະ ຫຼາຍຂະໜາດນີ້ມາກ່ອນ.
