ໃນວັນທີ 1 ກໍລະກົດ ທີ່ຜ່ານມາ, ສຳນັກຂ່າວ ເດິສະຕາ ແລະ ສະເຕຣດທາມ ລາຍງານກະແສວິຕົກກັງວົນ ໃນມາເລເຊຍອີກຄັ້ງ ຫຼັງຈາກນັກຮຽນປະມານ 130 ຄົນ ໃນເມືອງປາຊີກຸດັງ ລັດຢະໂຮ ມີອາການຫາຍໃຈບໍ່ສະດວກ ແລະ ປວດຮາກ ພຽງບໍ່ເທົ່າໃດຊົ່ວໂມງ ຫຼັງຈາກໂຮງຮຽນປະຖົມສຶກສາ ແລະ ມັດທະຍົມສຶກສາ 111 ແຫ່ງ ຈາກທັງໝົດ 475 ແຫ່ງ ກັບມາເປີດການຮຽນ-ການສອນ, ຫຼັງຈາກທີ່ຕ້ອງປິດສະຖານທີ່ຮໍ່າຮຽນທັງໝົດ ໃນເມືອງປາຊີກຸດັງ ເປັນເວລາ 3 ມື້ ໃນອາທິດທີ່ຜ່ານມາ ເພາະກ໊າສພິດກະຈາຍໄປທົ່ວບໍລິເວນ ຈົນມີຜູ້ປ່ວຍເປັນ ພະຍາດທາງເດີນຫາຍໃຈຮຸນແຮງ ຈຳນວນຫຼາຍ.
ທ່ານ ກຸສຊານ ອາບູ ບາກາ ປະທານຄະນະກຳມະການດ້ານສຸຂະພາບ ລັດຢະໂຮ ກ່າວວ່າ:
ໂຮງຮຽນຈະເປີດການຮຽນ-ການສອນ ເມື່ອດັດສະນີຄຸນນະພາບອາກາດ ຢູ່ໃນສະພາບປົກກະຕິ, ທາງການຈະຍ້າຍນັກຮຽນຈາກຊັ້ນສູງໆຂອງອາຄານ ລົງມາຢູ່ຊັ້ນລຸ່ມແທນ ເນື່ອງຈາກນັກຮຽນທີ່ມີອາການປ່ວຍ ຈາກການສູດດົມກ໊າສພິດ ຮຽນຢູ່ລະຫວ່າງຊັ້ນ 3-4.
ທາງດ້ານ ທ່ານ ນາງ ໂຢ ບີ ຫຍິນ ລັດຖະມົນຕີວ່າການ ກະຊວງພະລັງງານ ວິທະຍາສາດ ສິ່ງແວດລ້ອມ ແລະ ການປ່ຽນແປງສະພາບອາກາດ ຂອງມາເລເຊຍ ກ່າວວ່າ: ຈາກການກວດສອບຕົວຢ່າງກ໊າສພິດໃນພື້ນທີ່ ພົບວ່າ ປະກອບດ້ວຍ ກ໊າສອັນຕະລາຍ ເຊັ່ນ: ເມີແຄບແທນ, ອະຄຣິໂລໄນໄຕຣ ແລະ ສາຍລະເຫີຍແອໂຄຣລີນ.
ທັ້ງນີ້, ສາເຫດຂອງກ໊າສພິດນັ້ນ ເລີ່ມມມາຈາກເຫດການພິດ ໃນລັດປະຫັງ ທີ່ເກີດວິກິດຂຶ້ນ ໃນເດືອນມີນາ ທີ່ຜ່ານມາ ຫຼັງຈາກພົບວ່າ ໂຮງງານແຫ່ງໜຶ່ງລັກລອບຖິ້ມສານພິດລົງໃນແມ່ນໍ້າ ຈົນເຖິງຂັ້ນກາຍເປັນກ໊າສພິດ ປົກຄຸມເມືອງປາຊີກຸດັງ ເຮັດໃຫ້ປະຊາຊົນຫຼາຍກວ່າ 4.000 ຄົນ ສ່ວນຫຼາຍເປັນເດັກນ້ອຍ ຕ້ອງລົ້ມປ່ວຍ ແລະ ເຂົ້າຮັບການປິ່ນປົວຢູ່ທີ່ໂຮງໝໍ.