ໃນວັນທີ 23 ກໍລະກົດ 2019, ໜ່ວຍຊາວໜຸ່ມກອງບັນຊາການ ປກສ ເມືອງສິງ ແຂວງຫຼວງນໍ້າທາ ໄດ້ຈັດກອງປະຊຸມ ທາບທາມ ເອົາບຸກຄະລະກອນ ຮອບທີ II; ໂດຍມີ ພັທ ຄໍາທອງ ກໍາມະລິດ ປະທານກວດກາພັກ ຮອງຫົວໜ້າກອງບັນຊາການ ປກສ ເມືອງສິງ, ພັຕ ນາງ ໂອ້ຫຼ້າ ອ່ອນແສງສີ ຫົວໜ້າພະແນກການເມືອງ, ເລຂາໜ່ວຍຊາວໜຸ່ມ, ສະມາຊິກຊາວໜຸ່ມທົ່ວກອງບັນຊາການເຂົ້າຮ່ວມ.
ກອງປະຊຸມ, ໄດ້ຜ່ານລາຍຊື່ເປົ້າໝາຍ ຮອບທີ II ກອງປະຊຸມໃຫ່ຍ ຄັ້ງທີ V ຂອງຄະນະຮາກຖານຊາວໜຸ່ມ ປກສ ເມືອງສິງ, ມີເປົ້າໝາຍທັງໝົດ 9 ສະຫາຍ, ໃຫ້ຂີດອອກ 2 ສະຫາຍ; ຜ່ານລາຍຊື່ເປົ້າໝາຍບຸກຄະລະກອນເຂົ້າທາບທາມບຸກຄະລະກອນ ຮອບທີ II ກອງປະຊຸມໃຫ່ຍ ຄັ້ງທີ V ຂອງໜ່ວຍຊາວໜຸ່ມ 3 ພະແນກ, ແບ່ງອອກເປັນ 4 ຈຸ ມີເປົ້າໝາຍ 7 ສະຫາຍ ໃຫ້ຂີດອອກ 2 ສະຫາຍ ເພື່ອກະກຽມໃສ່ກອງປະຊຸມໃຫ່ຍ ຄັ້ງທີ V ຂອງຄະນະຮາກຖານຊາວໜຸ່ມ ປກສ ເມືອງສິງ.
ໂອກາດນີ້, ພັທ ຄໍາ ທອງ ກໍາມະລິດ ໄດ້ແນະນໍາວິທີການຄັດເລືອກເອົາຄະນະຊາວໜຸ່ມຊຸດໃໝ່ ໃຫ້ສະມາຊິກຊາວໜຸ່ມແຕ່ລະສະຫາຍ ເອົາໃຈໃສ່ຄັດເລືອກເອົາຜູ້ທີ່ມີຄວາມຮູ້, ຄວາມສາມາດ, ມີປະສົບການໃນການຊີ້ນໍາ-ນໍາພາ, ເປັນຜູ້ທີ່ມີວຸດທິການສຶກສາ, ມີຄວາມສາມັກຄີດີ, ສຸຂະພາບແຂງແຮງ, ສາມາດເຄື່ອນໄຫວນໍາພາຮອບດ້ານຕະຫຼອດສະໄໝຂອງກອງປະຊຸມ.
