ພຽງກວດພົບການນຳໃຊ້ ເງິນປອມ ໃບລະ 500.000 ດົ່ງ ຈຳນວນ 2 ໃບ ທີ່ພວກກ່ຽວນຳມາໃຊ້ຈ່າຍຜ່ານ ການສັ່ງຊື້ເຄື່ອງອອນລາຍ, ແຕ່ຍ້ອນຄວາມເອົາໃຈໃສ່ຕິດຕາມ ແລະ ນຳຮອຍ ກຸ່ມລັກລອບຜະລິດເງິນປອມ ຢ່າງຈິງຈັງ ຂອງ ເຈົ້າໜ້າທີ່ ຕຳຫຼວດແຂວງດັກນົ້ງ ສສ ຫວຽດນາມ ເວົ້າລວມ, ເວົ້າສະເພາະ ແມ່ນ ກຳລັງຕຳຫຼວດສືບສວນ – ສອບສວນ ແລະ ກຳລັງຕຳຫຼວດວິຊາສະເພາະ ເມືອງດັກລັອງ ເຊິ່ງໄດ້ມີການປະສານສົມທົບກັບ ກຳລັງຕຳຫຼວດວິຊາສະເພາະ ກະຊວງຕຳຫຼວດ ແລະ ກອງບັນຊາການຕຳຫຼວດ ບັນດາແຂວງອ້ອມຂ້າງ ຈຶ່ງສາ ມາດເຂົ້າເຖິງ ກຸ່ມລັກລອບຜະລິດເງິນປອມ ກຸ່ມນີ້ ທີ່ມີຂະໜາດໃຫຍ່ໄດ້ສຳເລັດ ແລະ ຮັບປະກັນໄດ້ຄວາມປອດໄພ.
ຕາງໜ້າ ເຈົ້າໜ້າທີ່ຕຳຫຼວດ ທີ່ຊີ້ນຳ ການມ້າງລາຍຄະດີ ກຸ່ມລັກລອບຜະລິດເງິນປອມ ລາຍນີ້ ໄດ້ລາຍງານ ວ່າ:
ໃນວັນທີ 20 ທັນວາ 2018, ເຈົ້າໜ້າທີ່ຕຳຫຼວດ ເມືອງດັກລັອງ ແຂວງດັກນົ້ງ ໄດ້ຮັບການລາຍງານຈາກປະຊາຊົນວ່າ: ມີໄວລຸ້ນຄົນໜຶ່ງ ນຳໃຊ້ເງິນປອມ ໃບ 500.000 ດົ່ງ ເພື່ອຈ່າຍຄ່າເຄື່ອງອອນລາຍ, ຫຼັງຈາກທີ່ໄດ້ຮັບຂ່າວດັ່ງກ່າວ ກຳລັງເຈົ້າໜ້າທີ່ຕຳຫຼວດ ໄດ້ເຂົ້າກວດກາຂໍ້ມູນ ແລະ ຈັບຕົວ ທ້າວ ໂງ້ຫງວຽນຈຸ້ງຫຽວ ເກີດປີ 1999 ຢູ່ຕາແສງກວາງເຊີ້ນ ເມືອງດັດລັອງ ແຂວງດັກນົ້ງ.
ຜ່ານການສອບສວນ, ຜູ້ກ່ຽວ ຮັບສາລະພາບ ວ່າ:
ໃນວັນທີ 20 ທັນວາ 2018, ຜູ້ກ່ຽວ ໄດ້ນຳໃຊ້ເງິນ 2 ໃນ 3 ໃບ ມູນຄ່າ 500.000 ດົ່ງ ( ເງິນປອມ ), ທີ່ໝູ່ຄົນໜຶ່ງ ຊື່ ທ້າວ ຈີ ຝາກເຊື່ອງໄວ້ ເພື່ອໄວ້ຈ່າຍຄ່າເຄື່ອງທີ່ສັ່ງຜ່ານທາງອອນລາຍ; ຫຼັງຈາກທີ່ ທ້າວ ຫຽວ ໃຊ້ເງິນດັ່ງກ່າວຈ່າຍຄ່າເຄື່ອງ ເມື່ອພະນັກງານສົ່ງເຄື່ອງກວດພົບວ່າ ເປັນເງິນປອມ ຈຶ່ງຕາມຊອກຫາເຈົ້າຂອງເງິນ ແຕ່ກໍບໍ່ທັນ ຈົນມາເຖິງວັນທີ 16 ມັງກອນ 2019 ທ້າວ ຫຽວ ຈຶ່ງຖືກ ເຈົ້າໜ້າທີ່ຕຳຫຼວດ ເມືອງດັກລັອງ ຈັບຕົວມາສອບສວນ.
ເມື່ອເຫັນວ່າ: ເຫດການນີ້ ອາດພົບກັບ ສິ່ງທ້າທາຍ ແລະ ຫຍຸ້ງຍາກຫຼາຍຢ່າງ; ດັ່ງນັ້ນ, ມາວັນທີ 23 ມັງກອນ 2019 ເຈົ້າໜ້າທີ່ຕຳຫຼວດ ເມືອງດັກລັອງ ໄດ້ລາຍງານ ແລະ ນຳສຳນວນເອກະສານທັງໝົດທີ່ກ່ຽວຂ້ອງ ແລະ ຜູ້ຖືກຫາ ມອບໃຫ້ກັບ ຫ້ອງສືບສວນ – ສອບສວນ ກອງບັນຊາການຕຳຫຼວດ ແຂວງດັກນົ້ງ ເພື່ອດຳເນີນການພິສູດ ແລະ ຂະຫຍາຍຜົນ ຫາຕົ້ນປາຍສາເຫດທີ່ໄປທີ່ມາຂອງເງິນປອມນີ້.
ຜ່ານການດຳເນີນການສືບສວນຂະຫຍາຍຜົນຂອງ ເຈົ້າໜ້າທີ່, ມາຮອດວັນທີ 25 ມັງກອນ 2019, ອົງການສືບສວນ – ສອບສວນ ໄດ້ອອກຄຳສັ່ງດຳເນີນຄະດີ ຕໍ່ ທ້າວ ຫຽວ ເພື່ອສືບຕໍ່ສອບສວນຂະຫຍາຍຜົນໃຫ້ຊັດເຈນອີກ.
ຜ່ານການເປີດກວ້າງສືບສວນ – ສອບສວນ ໂດຍອີງໃສ່ຂໍ້ມູນຫຼັກຖານທີ່ມີ ບວກກັບ ຄຳໃຫ້ການຂອງເປົ້າໝາຍທີ່ຈັບໄດ້, ເຈົ້າໜ້າທີ່ ກໍສືບຕໍ່ຈັບຕົວໄດ້ອີກຄົນ ຊື່ ທ້າວ ຫງວຽນຫງັອກກວາງດັ້ງ ( ສະມາຊິກ ກຸ່ມລັກລອບຜະລິດເງິນປອມ ) ເກີດປີ 1995 ຢູ່ເຂດເຕິ້ນບິ່ງ ນະຄອນໂຮ່ຈິມິນ.
