ວັນທີ 13 ສິງຫາ 2019, ແຂວງ ຫຼວງນໍ້າທາ ໄດ້ຈັດພິທິປາຖະກະຖາວັນສື່ມວນຊົນແຫ່ງຊາດ ແລະ ການພິມຈຳໜ່າຍ ຄົບຮອບ 69 ປີ (13 ສິງຫາ 1950-13 ສິງຫາ 2019); ເຂົ້າຮ່ວມໂດຍ ທ່ານ ສີວິໄລ ປັນແກ້ວ ກຳມະການພັກແຂວງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຫຼວງນໍ້າທາ; ມີບັນດາພະແນກການ, ອົງການອ້ອມຂ້າງແຂວງ, ກອງບັນຊາການ ປກຊ-ປກສ ແຂວງ, ຫ້ອງການ ຖວທ ເມືອງ 5 ເມືອງ ແລະ ສື່ມວນຊົນກ່ຽວຂ້ອງຈາກແຂວງ, ເມືອງ ເຂົ້າຮ່ວມ.
ໄດ້ເລົ່າມູນເຊື້ອຂອງວັນສ້າງຕັ້ງສື່ມວນຊົນ ແລະ ການພິມຈຳໜ່າຍ ຄົບຮອບ 69 ປີ ໃຫ້ຮູ້ວ່າ: ຕະຫຼອດໄລຍະແຫ່ງການນຳພາຂະບວນການຕໍ່ສູ້ປົດປ່ອຍຊາດຍາດເອົາເອກະລາດແຫ່ງຊາດ ແລະ ອິດສະຫຼະພາບສູ່ປະຊາຊົນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ; ພັກປະຊາຊົນ ປະຕິວັດລາວ ຍາມໃດກໍຖືເອົາວຽກງານໂຄສະນາສຶກສາອົບຮົມຂົນຂວາຍ ເປັນວຽກງານໜຶ່ງທີ່ສຳຄັນໃນວຽກງານສື່ມວນຊົນ ແລະ ການພິມຈຳໜ່າຍ, ເຊິ່ງເປັນອາວຸດອັນແຫຼມ ຄົມຂອງພັກໃນການຕໍ່ສູ້ຂອງສະໜາມຮົບການເມືອງ-ແນວຄິດພາຍໃຕ້ການນໍາພາຂອງພັກ ແລະ ການຄຸ້ມຄອງຂອງລັດ; ເຊິ່ງວຽກງານສື່ມວນຊົນ ແລະ ການພິມຈຳໜ່າຍ ຍາມໃດກໍໄດ້ປະກອບ ສ່ວນຢ່າງຕັ້ງໜ້າເຂົ້າໃນໄຊຊະນະລວມຂອງການປະຕິວັດລາວໃນແຕ່ລະໄລຍະ; ເຊິ່ງກົດໝາຍວ່າດ້ວຍສື່ມວນຊົນ ແລະ ກົດໝາຍວ່າດ້ວຍການພິມຈຳໜ່າຍ ໄດ້ຮັບຮອງເອົາວັນທີ 13 ສິງຫາ 1950 ເປັນວັນສື່ມວນຊົນແຫ່ງຊາດ ແລະ ການພິມຈໍາໜ່າຍ.
ໂອກາດດັ່ງກ່າວ, ທ່ານ ພອນສະຫວັນ ພົນທະວິຈິດ ແລະ ທ່ານຜູ້ຕາງໜ້າຈາກຫ້ອງການອົງການກາແດງ ແຂວງ ຫຼວງນໍ້າທາ ໄດ້ມອບຄອມພິວເຕີຕັ້ງໂຕະ ຈຳນວນ 2 ຊຸດ ໃຫ້ພະແນກ ຖວທ ແຂວງຫຼວງນໍ້າທາ ເພື່ອປະກອບສ່ວນຊ່ວຍຟື້ນຟູສະຖານີວິທະຍຸທີ່ຖືກຜົນກະທົບຈາກອັກຄີໄພໄຟໄໝ້ໃນຄັ້ງວັນທີ 6 ກໍລະກົດຜ່ານມາ ໃຫ້ສາມາດກັບມາເປີດໃຊ້ບໍລິການໄດ້ເປັນປົກກະຕິ.