ເຈົ້າໜ້າທີ່ ໜ່ວຍງານຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງຊົນບູລີ ແຂວງສະຫວັນນະເຂດ ໄດ້ເຂົ້າ ຈັບກຸມເປົ້າໝາຍຄ້າຢາ ເປັນຊາຍອາຍຸ 17 ປີ ຢູ່ຖຽງນາ ເຂດບ້ານກະລາງເໜືອ ເມືອງຈຳພອນ ພ້ອມຢາບ້າ 9.000 ກວ່າເມັດ.
ເຈົ້າໜ້າທີ່ ປກສ ເມືອງຊົນບູລີ ໃຫ້ຮູ້ກ່ຽວກັບ ການດຳເນີນການ ຈັບກຸມເປົ້າໝາຍຄ້າຢາ ໃນຄັ້ງນີ້ ວ່າ:
ເຈົ້າໜ້າທີ່ ໄດ້ເຂົ້າຈັບກຸມ ຜູ້ຖືກຫາ ຊື່ ທ້າວ ເກີ້ນ ອາຍຸ 17 ປີ ຢູ່ບ້ານກະລາງເໜືອ ເມືອງຈຳພອນ ແຂວງສະຫວັນນະເຂດ ພ້ອມຂອງກາງຢາບ້າ 4 ມັດ ກັບ 6 ຖົງ ແລະ 70 ເມັດ ເທົ່າກັບ 9.870 ເມັດ.
ຄະດີດັ່ງກ່າວ ໃນເບື້ອງຕົ້ນ ແມ່ນໄດ້ຮັບຈາກແຫຼ່ງຂ່າວ ວ່າ: ຜູ້ກ່ຽວ ນັດຊື້ – ຂາຍຢາບ້າ ຢູ່ຖຽງນາແຫ່ງໜຶ່ງ ເຂດບ້ານກະລາງເໜືອ ເມືອງຈຳພອນ ແຂວງສະຫວັນນະເຂດ; ຈາກນັ້ນ, ເຈົ້າໜ້າທີ່ ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງ ຈຶ່ງໄດ້ວາງກຳລັງເຂົ້າກວດກາ ແລະ ຕິດຕາມເປົ້າໝາຍ ຈົນມາຮອດວັນທີ 8 ສິງຫາ 2019 ກໍສາມາດຈັບຕົວ ທ້າວ ເກີ້ນ ພ້ອມຂອງກາງຈຳນວນດັ່ງກ່າວ ໄປສອບສວນ.
ຜ່ານການສອບສວນ, ຜູ້ກ່ຽວ ຮັບສາລະພາບ ວ່າ:
ໄດ້ເລີ່ມເຄື່ອນໄຫວຄ້າຂາຍຢາເສບຕິດ ມາແຕ່ຕົ້ນເດືອນກໍລະກົດ 2019 ໂດຍຊື້ຢູ່ບ້ານປາກຊ່ອງ ເມືອງສອງຄອນ ແລະ ມາຮອດວັນທີ 8 ສິງຫາ 2019, ໄດ້ຕິດຕໍ່ສັ່ງຊື້ຢາບ້ານຳຄົນຮູ້ຈັກ ຢູ່ບ້ານປາກຊ່ອງ ເມືອງສອງຄອນ.
ຈາກນັ້ນ, ຜູ້ກ່ຽວ ຈຶ່ງໂທລະສັບບອກໃຫ້ລູກຄ້າຂາປະຈຳ ມາເອົາຢາບ້າທີ່ສັ່ງໄວ້ກ່ອນໜ້ານີ້, ໂດຍນັດຢູ່ຖຽງນາບ່ອນເກົ່າ; ໃນຂະນະທີ່ ຜູ້ກ່ຽວ ກຳລັງລໍຖ້າ ຜູ້ມາຊື້ ຢູ່ນັ້ນ, ຈຶ່ງຖືກ ເຈົ້າໜ້າທີ່ ຈັບຕົວ ພ້ອມຂອງກາງຢາບ້າ ຈຳນວນ 9.870 ເມັດ.
ນອກຈາກນີ້, ຂ່າວຍັງໃຫ້ຮູ້ອີກ ວ່າ:
ກ່ອນໜ້ານີ້ ໃນວັນທີ 2 ສິງຫາ 2019, ເຈົ້າໜ້າທີ່ ກອງພັນເຄື່ອນທີ່ ປກສ ແຂວງສະຫວັນນະເຂດ ໄດ້ກັກຕົວພວກຄ້າຂາຍຢາເສບຕິດ ໄດ້ 3 ຄົນ ພ້ອມຂອງກາງຢາບ້າ ຈຳນວນ 1 ມັດ ກັບ 19 ຖົງ ແລະ 99 ເມັດ ເທົ່າກັບ 5.870 ແລະ ລົດຈັກ ບໍ່ມີປ້າຍທະບຽນ 1 ຄັນ, ເຊິ່ງຄະດີນີ້ ມີລາຍລະອຽດ ດັ່ງຕໍ່ໄປນີ້:
ເວລາປະມານ 7:00 ໂມງ, ເຈົ້າໜ້າທີ່ ກອງພັນເຄື່ອນທີ່ ປກສ ແຂວງສະຫວັນນະເຂດ ໄດ້ອອກກວດກາລາດຕະເວນ ພາຍໃນເທດສະບານ ນະຄອນໄກສອນພົມວິຫານ ແຂວງສະຫວັນນະເຂດ; ແລ້ວຈາກນັ້ນ, ກໍໄດ້ພົບເຫັນ ຊາຍ 1 ຍິງ 1 ຂັບຂີ່ລົດຈັກເວບ ບໍ່ມີປ້າຍທະບຽນ ຊ້ອນກັນມາ ແລະ ເມື່ອເຫັນ ເຈົ້າໜ້າທີ່ຕຳຫຼວດ ພວກກ່ຽວ ມີທ່າທາງໜ້າສົງໄສ ຈຶ່ງເຂົ້າກວດກາ.
- ຜ່ານການກວດຄົ້ນ ທັງ 2 ຄົນ ພົບເຫັນ ຢາບ້າ ຈຳນວນ 1 ມັດ ກັບ 19 ຖົງ ທີ່ຊຸກເຊື່ອງໄວ້ໃນເສື້ອຂອງ ນາງ ສຸກສະດາ ຫຼື ຫວານ ອາຍຸ 26 ປີ ຢູ່ບ້ານດົງນາຄຳ ນະຄອນໄກສອນພົມວິຫານ ແລະ ທ້າວ ແຫຼ້ ອາຍຸ 28 ປີ ຢູ່ບ້ານສົ້ມໂຮງ ເມືອງອາດສະພອນ ແຂວງສະຫວັນນະເຂດ ຈຶ່ງໄດ້ກັກຕົວສົ່ງໃຫ້ ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ເພື່ອນຳໄປທຳການສອບສວນ – ສືບສວນ.
ຜ່ານການສືບສວນ, ພວກກ່ຽວ ຮັບສາລະພາບ ວ່າ:
ຢາບ້າຈຳນວນດັ່ງກ່າວ ແມ່ນຊື້ນຳຄົນຮູ້ຈັກ ເພື່ອນຳໄປສົ່ງໃຫ້ ທ້າວ ພູວົງ ອາຍຸ 32 ປີ ຢູ່ບ້ານນາໝາກເກືອ ເມືອງອາດສະພອນ.
ຕໍ່ມາ ຮອດວັນທີ 3 ສິງຫາ 2019, ເຈົ້າໜ້າທີ່ ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງ ກໍສາມາດຈັບຕົວ ທ້າວ ພູວົງ ໄດ້ ຢູ່ເຮືອນຂອງ ຜູ້ກ່ຽວ ພ້ອມຢາບ້າ 99 ເມັດ ທີ່ຜູ້ກ່ຽວຊຸກເຊື່ອງໄວ້ໃນກະເປົາພາຍ ໄປດຳເນີນການສອບສວນຫາ ຜູ້ຮ່ວມຂະບວນການ ຕໍ່ໄປ.