ກອງບັນຊາການ ປກສ ແຂວງສະຫວັນນະເຂດ ໄດ້ຈັດພິທີ ຈູດທໍາລາຍອາວຸດລ່າເນື້ອ ແລະ ເຄື່ອງມືຜິດລະບຽບກົດໝາຍ ຈຳນວນ 982 ກະບອກ ພ້ອມເຄື່ອງຊ໋ອດປາຈໍານວນໜຶ່ງ ຢູ່ທີ່ສູນດັດສ້າງຄຳສະຫວ່າງ ( ຫຼັກ33 ) ເມືອງໄຊພູທອງ, ເຂົ້າຮ່ວມໂດຍ ພັອ ລຳຄູນ ວໍລະວົງ ຮອງຫົວໜ້າກອງບັນຊາການ ປກສ ແຂວງສະຫວັນນະເຂດ ແລະ ມີພະນັກງານຫຼັກແຫຼ່ງທີ່ກ່ຽວຂ້ອງເຂົ້າຮ່ວມ ໃນວັນທີ 16 ສິງຫາ 2019.
ພັທ ຕອງໄທ ຈັນແພງວົງ ຮອງຫົວໜ້າຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ປກສ ແຂວງ ໃຫ້ຮູ້ວ່າ:
ອາວຸດປືນ ແລະ ສິ່ງຜິດກົດໝາຍ ນຳມາທໍາລາຍໃນຄັ້ງນີ້ ແມ່ນໄດ້ທ້ອນໂຮມຈາກ ປກສ ເມືອງ ທັງ 14 ເມືອງ, ເຊິ່ງນະຄອນໄກສອນພົມວິຫານ ໄດ້ສົມທົບກັບ ອົງການປົກຄອງບ້ານ ເອົາໃຈໃສ່ໃນການແກ້ໄຂ ແລະ ສະກັດກັ້ນປະກົດການຫຍໍ້ທໍ້ໃນສັງຄົມ; ໂດຍສະເພາະ ກໍແມ່ນ ການຕິດຕາມກວດກາເກັບກູ້ ອາວຸດເສິກ – ຢຶດອາວຸດລ່າເນື້ອ, ທາດແຕກ, ທາດລະເບີດ ແລະ ອຸປະກອນອື່ນໆ.
ເຊິ່ງໃນໄລຍະຜ່ານມາ, ສາມາດຢຶດອາວຸດຈາກ ຜູ້ລະເມີດຕໍ່ລະບຽບກົດໝາຍ ທັງໝົດມີຈຳນວນ 982 ກະບອກ, ເຄື່ອງມືຊ໋ອດປາ ຈໍານວນ 64 ເຄື່ອງ, ບັ້ງກະໂພກ ຈຳນວນ 64 ກັບ ແລະ ບັ້ງພຸສັ້ນ-ຍາວ ຈໍານວນ 40 ບັ້ງ.
ສະນັ້ນ, ພິທີຈູດທຳລາຍອາວຸດລ່າເນື້ອ ແລະ ເຄື່ອງມີທີ່ຜິດກົດໝາຍ ໃນຄັ້ງນີ້ ແມ່ນເພື່ອເປັນການປະຕິບັດ ແນວທາງນະໂຍບາຍຂອງພັກ – ລະບຽບກົດໝາຍຂອງລັດ ກໍຄື ຄຳສັ່ງ ວ່າດ້ວຍ ການກວດກາ ແລະ ເກັບກູ້ອາວຸດເສິກ – ອາວຸດລ່າເນື້ອ, ທາດແຕກ, ທາດລະເບີດ ທີ່ພົວພັນເຖິງຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ພ້ອມທັງເປັນການແກ້ໄຂບັນຫາທຳລາຍສັດນໍ້າ – ສັດປາ ແລະ ການຕັດໄມ້ທຳລາຍປ່າ.
