ວັນທີ 11 ກັນຍາ 2019 ທີ່ຫ້ອງວ່າການສຳນັກງານນາຍົກລັດຖະມົນຕີ (ຫສນຍ), ທ່ານ ເພັດ ພົມພິພັກ ລັດ ຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຕາງໜ້າໃຫ້ ລັດຖະບານ ຮັບເງິນຊ່ວຍເຫຼືອຜູ້ປະສົບໄພນໍ້າຖ້ວມ ຈາກບໍລິສັດ ກຣິດຕະພົງ ກຣຸບ ຈຳກັດ ຈຳນວນ 100.000.000 ກີບ; ກ່າວມອບໂດຍທ່ານ ນາງ ອໍລະໄທ ສັນຕິຄົງຄາ ອຳນວຍການໃຫຍ່ ບໍລິສັດກຣິດຕະພົງ ກຣຸບ ຈຳກັດ, ມີພະນັກງານທີ່ກ່ຽວຂ້ອງຂອງ ຫສນຍ ແລະ ບໍລິສັດດັ່ງກ່າວ ເຂົ້າຮ່ວມ.
ໃນໂອກາດນີ້, ທ່ານ ເພັດ ພົມພິພັກ ໄດ້ກ່າວສະແດງຄວາມຂອບໃຈຕໍ່ຄະນະ ກໍຄືບໍລິສັດ ທີ່ໄດ້ນຳເອົາເງິນມາມອບ ເພື່ອຊ່ວຍເຫຼືອຜູ້ປະສົບໄພນໍ້າຖ້ວມໃນຄັ້ງນີ້, ເຊິ່ງເງິນຊ່ວຍເຫຼືອດັ່ງກ່າວ ແມ່ນຈະນຳເອົາໄປມອບໃຫ້ຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ເພື່ອນຳໄປຊ່ວຍເຫຼືອບັນເທົາທຸກ ແກ່ຜູ້ປະສົບໄພນໍ້າຖ້ວມໃນປີນີ້; ການຊ່ວຍເຫຼືອຂອງບໍລິສັດ ກຣິດຕະພົງ ກຣຸບ ຈຳກັດ ເປັນການປະກອບສ່ວນເຮັດໃຫ້ການແກ້ໄຂໄພພິບັດ ກໍຄືຜົນກະທົບຕໍ່ຊີວິດການເປັນຢູ່ຂອງປະຊາຊົນທີ່ປະສົບໄພນໍ້າຖ້ວມຢູ່ທ້ອງຖິ່ນ ຕ່າງໆໃນຂອບເຂດທົ່ວປະເທດຜ່ານພົ້ນ ໄປໄດ້ດ້ວຍດີ.
