ການສັນຈອນຕາມທ້ອງຖະໜົນ ແຕ່ ວັນຈັນ ຫາ ວັນສຸກ ມີຄວາມໜາແໜ້ນ ໃນຊົ່ວໂມງຮີບດ່ວນເຂົ້າການ-ເລີກການ ຊຶ່ງຕອນເຊົ້າ ເລີ່ມແຕ່ເວລາ 7:00 ໂມງ ເຖິງ 9:00 ໂມງ ແລະ ຕອນແລງ ເລີ່ມ ແຕ່ 16:00 ໂມງ ຫາ 19:00 ໂມງ; ສ່ວນ ວັນເສົາ ແລະ ວັນອາທິດ ການສັນຈອນເປັນປົກກະຕິ; ບັນຫາລົດຕິດໃນທຸກ ວັນນີ້ແມ່ນມີຫຼາຍເສັ້ນທາງຄື: ຖະໜົນ ລ້ານຊ້າງ, ຖະໜົນໄກສອນພົມວິຫານ: ເລີ່ມແຕ່ ຄ້ອງສັນຕິພາບ ຫາ ໄຟແດງດົງ ໂດກ, ຖະໜົນ 23 ສິງຫາ, ຖະໜົນອາ ຊຽນ (T2), ຖະໜົນກໍາແພງເມືອງ (T4) ເລີ່ມແຕ່ໄຟແດງຂົວຮ່ອງແຊງ ຫາ ໄຟແດງໂພນທັນ, ຖະໜົນເສດຖາທິລາດ, ຖະໜົນໜອງບອນ ບໍລິເວນຕະຫຼາດເຊົ້າ ແລະ ຕະຫຼາດຂົວດິນ, ຖະໜົນສາມແສນໄທ ບໍລິເວນໂຮງແຮມເອຊຽນ ພາວິລຽນ ແລະ ໜ້າທະນາຄານພົງສະຫວັນ, ເສັ້ນທາງໂພນຕ້ອງ-ດົງໂດກ ບໍລິເວນຕະຫຼາດໂພນສະຫວ່າງ, ຖະໜົນດົງປາຍນາບໍລິເວນ 3 ແຍກຮ້ານອາຫານສະຖາພອນ ແລະ 4 ແຍກໂຮງຮຽນບໍລິຫານທຸລະກິດລັດຕະນະການຄ້າ, ຖະໜົນທ່າເດື່ອ ເລີ່ມເເຕ່ໄຟແດງທາດຂາດ ຫາວົງ ວຽນຈີ່ນາຍໂມ້. ນອກນີ້, ຍັງມີອີກຫຼາຍຈຸດທີ່ການຈະລາຈອນມີຄວາມສັບສົນ ແລະ ອັ່ງອໍເຊັ່ນ: ບໍລິເວນທາງເຂົ້າ-ອອກໜ້າສະຖານີລົດຂົນສົ່ງໂດຍສານຕະຫຼາດເຊົ້າ, ບໍລິເວນຕະຫຼາດຫົວຂົວ (ບຶງທາດຫຼວງ), 3 ແຍກ ຫຼື 4 ແຍກທີ່ບໍ່ ມີໄຟແດງ, ສາມແຍກ ຫຼື ສີ່ແຍກທີ່ມີໄຟ ແດງ ແລະອື່ນໆ.
ໂດຍລວມ ການຈະລາຈອນແອອັດ ແມ່ນເສັ້ນທາງສາຍຫຼັກເຂົ້າ-ອອກເມືອງ ໃນຕອນເຊົ້າ ແລະ ຕອນແລງ. ສະພາບການເດີນລົດໃນລັກສະນະດັ່ງກ່າວ ເປັນສັນຍານຊີ້ບອກການຈະລາຈອນ ຢູ່ນະຄອນຫຼວງວຽງຈັນ ກໍາລັງປ່ຽນແປງໄປໃນທາງລົບຢ່າງໄວ ເຊິ່ງຕ້ອງການແກ້ໄຂຢ່າງຮີບດ່ວນ. ເຊິ່ງສາຍເຫດຕົ້ນຕໍທີ່ພາ ໃຫ້ລົດຕິດແມ່ນມາຈາກຫຼາຍສາເຫດ ທີ່ແຕກຕ່າງກັນ ເປັນຕົ້ນແມ່ນ:
- ຍ້ອນປະຊາກອນມີຈໍານວນເພີ່ມຂຶ້ນ, ການຍົກຍ້າຍຖິ່ນຖານເຂົ້າມາຫາວຽກເຮັດງານທໍາ ແລະ ດໍາລົງຊີວິດໃນຕົວເມືອງໃຫຍ່ ມີຈໍານວນເພີ່ມຂຶ້ນ, ຈາກການເພີ່ມຂຶ້ນຄືແນວນັ້ນ, ທີ່ຢູ່ອາໄສກໍໄດ້ແຜ່ລາມອອກໄປຊານເມືອງ, ສ່ວນບ່ອນເຮັດວຽກ ແມ່ນຍັງຢູ່ໃນໃຈກາງເມືອງຄືເກົ່າ; ດັ່ງນັ້ນ, ຈຶ່ງມີການຫຼັງເຂົ້າ ແລະ ໄຫຼອອກໃນຊົ່ວໂມງເລັ່ງດ່ວນ.
- ຍານພາຫະນະມີຈໍານວນເພີ່ມຂຶ້ນ, ຕາມສະຖິຕິທົ່ວນະຄອນຫຼວງວຽງຈັນ ມີພາຫະນະທີ່ຂຶ້ນທະບຽນຢູ່ກອງຄຸ້ມຄອງພາຫະນະ ແລະ ການຂັບຂີ່ ນັບແຕ່ປີ 2011-2018 ຈໍານວນ 900.000 ກວ່າຄັນ; ໃນນີ້, ລົດຈັກກວມເອົາ 272. 322 ຄັນ, ຕົວເລກນີ້ບໍ່ໄດ້ນັບເອົາ ຍານພາຫະນະຂອງກໍາລັງປະກອບອາວຸດ ປກຊ-ປກສ, ລົດຂາຈອນຈາກຕ່າງແຂວງ ແລະ ຕ່າງປະເທດທີ່ແລ່ນບໍລິການເຂົ້າ-ອອກນະຄອນຫຼວງວຽງຈັນ ໃນແຕ່ລະ ວັນ.
- ການປັບປຸງເສັ້ນທາງວົງແຫວນຮອບໃນ, ຮອບກາງ ແລະ ຮອບນອກ ລວມທັງເສັ້ນທາງໄຍແມງມຸມ ເຂົ້າເມືອງ-ອອກເມືອງ ຍັງບໍ່ທັນສົມຄູ່ກັບຄວາມຮຽກຮ້ອງຕ້ອງການ ແລະ ປະລິມານການຈະລາຈອນ, ເສັ້ນທາງໃຈກາງເມືອງ ມີພື້ນທີ່ຈໍາກັດ-ບໍ່ສາມາດຂະຫຍາຍອອກຕື່ມໄດ້, ເນື່ອງຈາກເປັນເຂດເມືອງເກົ່າ.
- ການຄຸ້ມຄອງຜັງເມືອງ ຍັງບໍ່ສອດຄ່ອງກັບແຜນແມ່ບົດຜັງເມືອງ ເປັນຕົ້ນ: ທີ່ຕັ້ງຂອງຕະຫຼາດ, ໂຮງຮຽນ, ໂຮງງານ, ສໍານັກງານ-ອົງການ ແລະ ສະຖານທີ່ບໍລິການຕ່າງໆ, ນອກຈາກທີ່ຕັ້ງ ແລ້ວ ຍັງບໍ່ໄດ້ຄໍານຶງເຖິງບ່ອນຈອດລົດ ແລະ ຂອດຂອງການການສັນຈອນເຂົ້າ-ອອກ.
- ການນໍາໃຊ້ລົດຂົນສົ່ງໂດຍສານປະຈໍາທາງ ມີທ່າອ່ຽງເພີ່ມຂຶ້ນ ແຕ່ຍັງບໍ່ພຽງພໍກັບຄວາມຕ້ອງການຂອງສັງຄົມ, ແຕ່ການຂົນສົ່ງໂດຍສານສາທາລະນະຍັງມີຂໍ້ຈໍາກັດຫຼາຍດ້ານ ເຊັ່ນ: ທາງດ້ານຈໍານວນ, ຂະໜາດ ແລະ ຄຸນນະພາບ, ການເດີນລົດຍັງບໍ່ກວມທຸກພື້ນທີ່, ບໍ່ກົງເວລາ, ບໍ່ຈອດຕາມປ້າຍ, ຫຼາຍຄັ້ງຈອດ ບ່ອນຫ້າມຈອດ ແລະ ຈອດບ່ອນບໍ່ຄວນຈອດ (ກີດຂວາງການສັນຈອນ).
- ລະບົບການລະບາຍການຈະລາຈອນ ມາຮອດປັດຈຸບັນ ແມ່ນຕ້ອງໄດ້ມີການປັບປຸງ ເຊັ່ນ: ລະບົບປ້າຍສັນຍານ, ສູນບັນຊາການຈະລາຈອນ, ໄຟແດງມີຫຼາຍລະບົບ ໂດຍອີງຕາມການຕິດຕັ້ງ ຂອງແຕ່ລະໂຄງການ, ສ້າງຄວາມຫຍຸ້ງຍາກໃນຂອດຄຸ້ມຄອງ ແລະ ສ້ອມແປງ; ນອກຈາກນີ້, ການຄຸ້ມຄອງຍັງບໍ່ລວມສູນ ເຊັ່ນ: ໄຟແດງຂຶ້ນ ກັບໄຟຟ້າ ແຕ່ວິຊາການດ້ານໄຟແດງ ຍັງຢູ່ນໍາໂຍທາ ແລະ ຜູ້ບັງຄັບໃຊ້ແມ່ນຕໍາຫຼວດຈະລາຈອນ.
- ການກໍານົດທາງເອກ, ທາງໂທ, ທາງຂຶ້ນ-ທາງລ່ອງ, ທິດທາງການເດີນລົດ (one way-two way) ບໍ່ສົມຄູ່ກັບການ ເພີ່ມຂຶ້ນຂອງປະຊາກອນ ແລະ ຈໍານວນ ຍານພາຫະນະຂອງແຕ່ລະພື້ນທີ່ (ບໍ່ກົງ ກັບສະພາບຄວາມເປັນຈິງ ແລະ ການປ່ຽນແປງຂອງສັງຄົມໃນປັດຈຸບັນ.
- ການສ້າງເສັ້ນທາງຫຼັກ, ທາງວົງແຫວນ, ທາງຮ່ອມ, ທາງຊອຍ ລວມທັງ ວົງວຽນບໍ່ພຽງພໍກັບຄວາມຕ້ອງການ.
- ພຶດຕິກໍາຂອງນັກຂັບຂີ່ຍັງລະເມີດລະເມີດກົດຈະລາຈອນ ມີອັດຕາສ່ວນເພີ່ມຂຶ້ນ, ການເຜີຍແຜ່ລະບຽບກົດໝາຍຍັງມີຂໍ້ຈໍາກັດ, ບໍ່ກວ້າງຂວາງທົ່ວສັງຄົມ ແລະ ຍັງບໍ່ຕໍ່ເນື່ອງ, ກົງກັນຂ້າມ, ຈໍານວນຕໍາຫຼວດຈະລາຈອນ ຍັງບໍ່ພຽງພໍ ແລະ ບໍ່ມີຕໍາຫຼວດຈະລາຈອນອາສາສະໝັກຕາມຄຸ້ມບ້ານ ຊ່ວຍຄືກັບປະເທດ ອື່ນ.
- ງົບປະມານສໍາລັບວຽກງານຈາ ລະຈອນມີຈໍານວນຈໍາກັດ, ບໍ່ທັນກັບສະພາບການ ແລະ ບໍ່ພຽງພໍກັບຄວາມຮຽກ ຮ້ອງຕ້ອງການຂອງວຽກງານ.
ຜ່ານມາ, ນະຄອນຫຼວງວຽງຈັນ ໄດ້ແຕ່ງຕັ້ງຄະນະກໍາມະການຄວາມປອດໄພ ທາງຖະໜົນ ຂັ້ນນະຄອນຫຼວງຄືກັບບັນດາແຂວງ ເພື່ອຜັນຂະຫຍາຍ ແລະ ຈັດຕັ້ງປະຕິບັດແຜນຍຸດທະສາດ ແລະ ແຜນດໍາເນີນງານຄວາມປອດໄພທາງຖະໜົນ ທີ່ລັດຖະບານຮັບຮອງຢ່າງເປັນລະບົບ ແລະ ກວມເອົາທຸກຂະແໜງການຈັດຕັ້ງປະຕິບັດ: ແຕ່ງຕັ້ງຄະນະກໍາມະການ, ປະສານງານກັບຕໍາຫຼວດຈະລາຈອນ, ຈັດເປັນບູລິມະສິດຂອງນະຄອນຫຼວງ, ແຕ່ງຕັ້ງໜ່ວຍງານຈັດສັນຄວາມບໍ່ເປັນ ລະບຽບຮຽບຮ້ອຍຢູ່ຂັ້ນເມືອງ, ເອົາໃຈໃສ່ລົງຕິດຕາມກວດກາແກ້ໄຂຕາມຂອບ ເຂດຄວາມຮັບຜິດຊອບຂອງຕົນເອງ ພາຍໃນຕົວເມືອງມອບໃຫ້ເຈົ້າໜ້າທີ່ ຕໍາຫຼວດຈະລາຈອນ ເພີ່ມຈໍານວນພົນລົງປະຈໍາຈຸດຕ່າງໆ ເພື່ອເຮັດໜ້າທີ່ລະບາຍການສັນຈອນໃນເວລາຮີບດ່ວນ (ເຂົ້າການ-ເລີກການ) ຢ່າງເປັນປົກກະຕິ, ມອບໃຫ້ໜ່ວຍຈັດສັນຄວາມເປັນລະ ບຽບຮຽບຮ້ອຍ ລົງເຄື່ອນໄຫວກວດກາ ຄວາມບໍ່ເປັນລະບຽບຮຽບຮ້ອຍ ເຊັ່ນ: ການຈອດລົດ, ຂາຍເຄື່ອງຕາມແຄມທາງ, ການວາງສິ່ງກີດຂວາງທາງຍາງ, ການຈອດລົດຕາມສະຖານທີ່ຫ້າມຈອດ, ລົງໂຄສະນາເຜີຍແຜ່ກົດລະບຽບຈະລາຈອນຢູ່ຕາມໂຮງຮຽນ, ບ້ານ, ສໍານັກງານ, ອົງການ, ໂຮງງານ, ປຸກລະດົມມວນຊົນ, ຫ້າງຮ້ານ, ບໍລິສັດປະກອບທຶນຊ່ວຍຊຸກຍູ້ການເຄື່ອນໄຫວປູກຈິດສໍານຶກ ທາງດ້ານຄວາມປອດໄພການສັນຈອນ, ໂດຍສະເພາະແມ່ນການຕິດຕັ້ງປ້າຍແນະນໍາບໍລິການ (ດື່ມບໍ່ຂັບລົດ), ສ້າງກິດຈະກໍາໃນງານເທດສະການວັນບຸນສໍາຄັນຕ່າງໆ ສົ່ງເສີມໃຫ້ມວນຊົນໄດ້ຮັບຮູ້ເຖິງກົດລະບຽບຈະລາຈອນ ແລະ ຫຼັກການຂັບຂີ່ປອດໄພ ເພື່ອຫຼຸດຜ່ອນອຸບັດ ເຫດທາງຖະໜົນ, ລົງກວດກາ, ຕິດຕັ້ງປ້າຍສັນຍານຈະລາຈອນທີ່ຕິດ ຕັ້ງຕາມຈຸດຕ່າງໆໃຫ້ເໝາະສົມ ແລະ ຖືກຕ້ອງ, ປັບປຸງລະບົບການສັນຈອນຢູ່ ບາງຈຸດທີ່ມີຄວາມສັບສົນໃຫ້ມີຄວາມສະດວກຫຼາຍຂຶ້ນ, ລົງສໍາຫຼວດການຈັດສັນບ່ອນຈອດລົດ, ບ່ອນທີ່ມີເງື່ອນໄຂ, ໂດຍໃຫ້ປະຊາຊົນມີສ່ວນຮ່ວມ.