ໄລຍະຜ່ານມາ, ທົ່ວແຂວງໄຊຍະບູລີ ຍັງມີນັກຂັບຂີ່ຈໍານວນໜຶ່ງລະເມີດກົດລະບຽບຈະລາຈອນ ແລ້ວພາໃຫ້ເກີດອຸບັດຕິເຫດຕາມທ້ອງຖະໜົນຕາມມາ, ສະແດງອອກໃນ 5 ປີຜ່ານມາ, ມີອຸບັດຕິເຫດເກີດຂຶ້ນ 599 ຄັ້ງ, ພາຫະ ນະເປ່ເພທັງໝົດ 1.020ຄັນ; ຄົນໄດ້ຮັບບາດເຈັບ 1.001 ຄົນ ແລະ ມີຜູ້ເສຍ ຊີວິດ 200 ກວ່າຄົນ.
ພັທ ປານ ບຸນປອນ ຫົວໜ້າພະແນກຕຳຫຼວດຈະລາຈອນ ແລະ ສະກັດ ກັ້ນຕ້ານອັກຄີໄພ ກອງບັນຊາການ ປກສ ແຂວງໄຊຍະບູລີ ໃຫ້ຮູ້ວ່າ:
ໃນໄລຍະ 5 ປີຜ່ານມາ, ຄະນະພະແນກພວກເຮົາ ໄດ້ເອົາໃຈໃສ່ຊີ້ນໍາ-ນໍາພາ ກຳລັງວິຊາສະເພາະລົງໂຄສະນາເຜີຍແຜ່ລະບຽບການສັນຈອນ ໃຫ້ບັນດາຊັ້ນຄົນຕ່າງໆ ຢູ່ໂຮງຮຽນ, ກຸ່ມບ້ານເປົ້າໝາຍ ແລະ ບັນດາສໍານັກງານ-ອົງການໃນຂອບເຂດ ທົ່ວແຂວງ ໄດ້ 640 ຄັ້ງ, ມີຈໍານວນພົນເຂົ້າຮ່ວມ 39.000 ກວ່າເທື່ອຄົນ, ສ່ວນອຸບັດຕິເຫດເກີດຂຶ້ນ 599 ຄັ້ງ, ພາຫະນະເປ່ເພເລັກໜ້ອຍ 439 ຄັນ, ເປ່ເພສົມຄວນ 490 ຄັນ ແລະ ໃຊ້ການບໍ່ 91 ຄັນ; ຄົນໄດ້ຮັບບາດເຈັບເລັກ ໜ້ອຍ 400 ຄົນ, ບາດເຈັບສົມຄວນ 390 ຄົນ, ບາດເຈັບສາຫັດ 211 ຄົນ ແລະ ເສຍຊີວິດທັງໝົດ 242 ຄົນ ລວມມູນຄ່າຄວາມເສຍຫາຍທັງໝົດ 13.162.810.000 ກີບ; ນອກນີ້, ຍັງໄດ້ກວດກາຄຸ້ມຄອງບັນດາປ້າຍລົດບໍ່ ຖືກຕ້ອງຕາມລະບຽບຫຼັກການ ຕິດພັນກັບການບໍລິການຕິດປ້າຍລົດ, ພ້ອມທັງປະສານສົມທົບກັບບັນດາພາກສ່ວນທີ່ກ່ຽວຂ້ອງຂຶ້ນແຜນຜະລິດປ້າຍ ເພື່ອໃຫ້ທ່ວງທັນກັບເວລາ ແລະ ໄດ້ສົມທົບພະແນກ ຍທຂ ສອບເສັງໃບຂັບຂີ່ໃຫ້ນັກຂັບຂີ່ໄດ້ເປັນປົກກະຕິ; ລົງປະຈໍາປ້ອມ1.389 ຄັ້ງ, ພົບເຫັນຜູ້ລ່ວງລະ ເມີດທັງໝົດ 2.280 ຄົນ ຍິງ 509 ຄົນ, ໃນນີ້, ສຶກສາອົບຮົມໄດ້ 953 ຄົນ, ຂຽນໃບກ່າວເຕືອນ 510 ຄົນ, ຂຽນໃບສັ່ງ 410 ຄົນ.
ນອກຈາກນີ້, ຍັງໄດ້ລົງໂຄສະນາວຽກງານສະກັດກັ້ນ ແລະ ຕ້ານອັກຄີໄພຢູ່ ໂຮງຮຽນ ແລະ ກຸ່ມບ້ານໄດ້ 26 ແຫ່ງ ມີຜູ້ເຂົ້າຮ່ວມທັງໝົດ 13.500 ກວ່າ ເທື່ອຄົນ ຝຶກອົບຮົມວຽກງານສະກັດກັ້ນ-ຕ້ານອັກຄີໄພໃຫ້ບັນດາສຳນັກງານ -ອົງການ ແລະ ຫົວໜ່ວຍທຸລະກິດພາຍໃນເທດສະບານເມືອງໄຊຍະບູລີ ໄດ້ 17 ຄັ້ງ ມີນັກສຳມະນາກອນມາຈາກບັນດາສຳນັກງານ-ອົງການ ແລະ ຫົວໜ່ວຍທຸລະກິດເຂົ້າຮ່ວມ 336 ຄົນ.
