ໃນໄລຍະບຸນນະມັດສະການພຣະທາດຫຼວງວຽງຈັນ ປະຈໍາປີ 2019 ນັບແຕ່ວັນທີ 5 ຫາ 11 ພະຈິກ 2019 ມີອຸບັດຕິເຫດເກີດຂຶ້ນຕາມທ້ອງຖະ ໜົນ 30 ຄັ້ງ, ພາຫະນະເປ່ເພເລັກໜ້ອຍ 30 ຄັນ, ສົມຄວນ 29 ຄັນ, ໃຊ້ການບໍ່ໄດ້ 1 ຄັນ, ມີຄົນໄດ້ຮັບບາດເຈັບເລັກໜ້ອຍ 6 ຄົນ, ສົມຄວນ 29 ຄົນ, ສາຫັດ 9 ຄົນ ແລະ ເສຍຊີວິດ 5 ຄົນ.
ພັທ ສັງຄົມ ພົມມະລາດ ຮອງຫົວໜ້າພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ລາຍງານວ່າ:
ຄະດີທີ່ເກີດຂຶ້ນມີລາຍລະອຽດດັ່ງນີ້ ໃນ ວັນທີ 5 ພະຈິກ 2019 ເວລາປະມານ 16:00 ໂມງ ລົດຈັກຕໍາລົດເມ ຢູ່ເສັ້ນທາງ 13 ໃຕ້ ເຂດບ້ານໜອງ ບົວທອງ ເມືອງປາກງື່ມ ເຮັດໃຫ້ທ້າວ ທັກສິນ ອາຍຸ 13 ປີ, ບ້ານບໍ່ເຫຼັກ ເມືອງ ໄຊທາ ນີ ເສຍຊີວິດ. ຕໍ່ມາໃນເວລາປະມານ 12:30 ໂມງ ຂອງວັນທີ 7 ພະຈິກ 2019 ລົດບັນທຸກຕໍາຄົນຍ່າງຢູ່ເຂດບ້ານໄຮ່ຄໍາ ເມືອງໄຊເສດຖາ ເຮັດໃຫ້ ນາງ ກະຖິນ ອາຍຸ 3 ປີ ບ້ານເມືອງນ້ອຍ ເສຍຊີວິດ. ນອກນັ້ນ ໃນວັນທີ 9 ພະຈິກ 2019 ເວລາປະມານ 23:30 ໂມງ ລົດຈັກຕໍາລົດຈັກ ຢູ່ບ້ານເມືອງນ້ອຍ ເມືອງໄຊເສດຖາ ເຮັດໃຫ້ ທ້າວ ແວ ໃຫຍ່ ອາຍຸ 28 ປີ, ບ້ານນາຄວາຍກາງ ເມືອງໄຊເສດຖາ ແລະ ທ້າວ ປາງຄໍາ ອາຍຸ 33 ປີ ບ້ານໂນນຂີ້ເຫຼັກ ເມືອງສີໂຄດຕະບອງ ເສຍຊີວິດ ແລະ ໃນວັນທີ 10 ພະຈິກ 2019 ເວລາ ປະມານ 13:00 ໂມງ ລົດຈັກຕໍາລົດບັນທຸກຢູ່ ເຂດບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ເຮັດໃຫ້ ທ້າວ ອໍາ ໄພ ອາຍຸ 47 ປີ ບ້ານໜອງພະຍາ ຜູ້ຂັບ ຂີ່ລົດຈັກເສຍຊີວິດ.
ສະພາບການສັນຈອນໃນໄລຍະ ງານບຸນ ພົບວ່າຢູ່ວົງວຽນ 450 ປີ, ສີ່ ແຍກໄຟອໍານາດທາດຫຼວງ ແລະ ເສັ້ນ ທາງໜອງບອນ ມີລົດຕິດຂັດອັ່ງອໍ ເພາະ ວ່າຈຸດດັ່ງກ່າວເປັນບ່ອນເຂົ້າ-ອອກງານ, ໃນຕະຫຼອດງານບຸນ ຈະມີມວນຊົນພ້ອມທັງພາຫະນະໄດ້ມາເຕົ້າໂຮມກັນຢູ່ຈຸດດັ່ງກ່າວ, ຕິດຂັດໜັກທີ່ສຸດກໍຄືສອງຄືນສຸດທ້າຍຂອງງານບຸນ; ຕໍ່ກັບການຈັດຕັ້ງ ປະຕິບັດໜ້າທີ່ຂອງຕໍາຫຼວດຈະລາຈອນ ໄດ້ປະຕິບັດຕາມແຜນການທີ່ວາງໄວ້ ໂດຍເຮັດໜ້າທີ່ອໍານວຍຄວາມສະດວກໃຫ້ຜູ້ທີ່ມາທ່ຽວງານບຸນຢ່າງຕັ້ງໜ້າ ແລະ ສາມາດແກ້ໄຂໄດ້ບໍ່ໃຫ້ຕິດຂັດດົນຈົນ ເກີນໄປ.