ຄະນະບໍລິຫານງານສູນກາງສະຫະພັນກໍາມະບານລາວ ໄດ້ຈັດຝຶກອົບຮົມການຂັບຂີ່ຍານພາຫະນະ ແລະ ການນໍາ ໃຊ້ທາງຫຼວງ ໃຫ້ສະຫະພັນກໍາມະບານເມືອງ ໃນຂອບເຂດນະຄອນຫຼວງວຽງຈັນ ໃນວັນທີ 15 ພະຈິກ 2019, ເປັນປະທານໂດຍ ທ່ານ ທອງພິມ ວົງລະພາ ຮອງ ຫົວໜ້າກົມປົກປ້ອງແຮງງານ, ມີຫົວໜ້າ ພະແນກຄວາມປອດໄພແຮງງານ, ວິທະຍາກອນ, ແຂກຮັບເຊີນ, ຄະນະຮັບຜິດຊອບ ແລະ ນັກສໍາມະນາກອນ ເຂົ້າຮ່ວມ.
ທ່ານ ທອງພິມ ວົງລະພາ ກ່າວວ່າ:
ຈຸດປະສົງໃນການຈັດຝຶກອົບຮົມຄັ້ງນີ້ ແມ່ນເພື່ອໃຫ້ພະນັກງານສູນກາງກໍາມະບານລາວ, ສະຫະພັນກໍາມະບານເມືອງໃນນະຄອນຫຼວງວຽງຈັນ ເພື່ອຈະເປັນຄູຝຶກໃນຕໍ່ໜ້າ ແລະ ລົງໄປເຜີຍແຜ່ໃຫ້ພະນັກງານກໍາມະກອນໃນໂຮງຈັກ-ໂຮງ ງານ ຈໍານວນ 40 ແຫ່ງ ທົ່ວນະຄອນຫຼວງ ວຽງຈັນ, ເພື່ອເຮັດໃຫ້ເຂົາເຈົ້າຮູ້ຈັກການໃຊ້ລົດ-ໃຊ້ຖະໜົນຫຼວງ ທີ່ມີຄວາມຖືກຕ້ອງ, ປອດໄພ, ຮັບປະກັນການປະຕິບັດກົດລະບຽບຈະລາຈອນ, ຫຼຸດຄວາມສ່ຽງການເກີດອຸບັດຕິເຫດຕາມທ້ອງຖະໜົນ; ຄຽງຄູ່ກັນນີ້ ເພື່ອເປັນການເຜີຍແຜ່ກົດລະບຽບການສັນຈອນໃຫ້ພໍ່-ແມ່ປະຊາຊົນ ກໍຄືກໍາມະກອນໃນໂຮງຈັກ-ໂຮງງານຮັບຮູ້ເຂົ້າໃຈຕໍ່ກົດລະບຽບການດັ່ງກ່າວ, ຫຼຸດສຽງຈົ່ມວ່າຈາກປະຊາຊົນທີ່ມີຕໍ່ເຈົ້າໜ້າທີ່.
ການຝຶກອົບຮົມຄັ້ງນີ້ ນັກສໍາມະນາກອນ ຈະໄດ້ຮຽນຮູ້ກ່ຽວກັບກົດໝາຍລະບຽບການຈະລາຈອນທາງບົກ, ການຂັບຂີ່ຍານພາຫະນະ ແລະ ການນໍາໃຊ້ຖະໜົນຫຼວງ; ໃນນີ້ຈະໄດ້ຮັບຮູ້ກ່ຽວກັບປ້າຍຈະລາຈອນປະເພດຕ່າງໆ, ແລ້ວ ໃຫ້ນັກສໍາມະນາກອນແລກປ່ຽນຄໍາຄິດເຫັນກັບຜູ້ບັນລະຍາຍ, ໃນຕອນທ້າຍຈະໄດ້ປະຕິບັດຕົວຈິງ, ການຝຶກອົບຮົມດັ່ງກ່າວມີນັກສໍາມະນາກອນເຂົ້າຮ່ວມ ທັງໝົດ 27 ທ່ານ.
