ຜ່ານມາ, ຄະນະພັກ-ຄະນະບັນຊາປ້ອງກັນຄວາມສະຫງົບ ເມືອງຄອບ ແຂວງໄຊຍະບູລີ ແມ່ນໄດ້ເອົາໃຈໃສ່ຊີ້ນໍາ-ບັນຊາກໍາລັງຂອງຕົນເຄື່ອນໄຫວເຮັດໜ້າທີ່ປ້ອງກັນຄວາມສະຫງົບຢ່າງຕັ້ງໜ້າ ແລະ ມີຄວາມຮັບຜິດຊອບສູງ; ໂດຍໄດ້ຫັນເອົາກໍາລັງລົງກໍ່ສ້າງຮາກຖານການເມືອງປະຈໍາຢູ່ກຸ່ມບ້ານ, ບ້ານພັດທະນາ ເຮັດໜ້າທີ່ບໍລິການປະຊາຊົນ ແລະ ນໍາພາກອງຫຼອນ, ປກສ ບ້ານ ເຄື່ອນໄຫວເຮັດວຽກງານກວດກາ, ຕິດຕາມ, ຄຸ້ມຄອງສໍາມະໂນຄົວ, ເກັບກໍາ ການເຂົ້າ-ອອກຂອງພົນລະເມືອງ ແນໃສ່ເຮັດໃຫ້ຮາກຖານບ້ານມີຄວາມໜັກແໜ້ນເຂັ້ມແຂງ, ສາມາດສະກັດກັ້ນ, ແກ້ໄຂໜໍ່ແໜງກໍ່ຄວາມບໍ່ສະຫງົບ ແລະ ປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ໃຫ້ຫຼຸດໜ້ອຍຖອຍລົງເທື່ອລະກ້າວ.
ພັທ ກຸ່ມແສງ ອິນນາມວົງ ຫົວໜ້າກອງບັນຊາການ ປກສ ເມືອງຄອບ ໄດ້ມີຄໍາເຫັນຕໍ່ກອງປະຊຸມໃຫຍ່ຂອງອົງຄະນະພັກເມືອງຄອບ ສະໄໝທີ V ຄັ້ງວັນທີ 20 ພະຈິກ 2019 ຜ່ານມານີ້ວ່າ: ໃນໄລຍະ 5 ປີຜ່ານມາ ໄດ້ມີຄະດີເກີດຂຶ້ນທັງໝົດ 20 ເລື່ອງ, ມີ 26 ຄົນ ຍິງ 4 ຄົນ; ໄດ້ປະກອບສໍານວນຄະດີໃຫ້ແຂວງ ດໍາເນີນ 7 ເລື່ອງ ມີ 3 ຄົນ, ຢຶດຂອງກາງໄດ້ປືນແກັບ 3 ກະບອກ, ລົດ ຈັກ 6 ຄັນ, ເງິນບາດປອມ 15.000 ບາດ, ເງິນກີບ 1.721.000 ກີບ ແລະ ຢາມ້າ 1.144 ເມັດ; ໄດ້ນໍາຕົວເອົາພາກສ່ວນທີ່ເຄື່ອນໄຫວເຮັດຜິດຕໍ່ລະບຽບກົດໝາຍເຂົ້າສູນບໍາບັດ-ດັດສ້າງທັງໝົດ 627 ຄົນ ຍິງ 29 ຄົນ.
ມີອຸບັດຕິເຫດເກີດຂຶ້ນທັງໝົດ 67 ຄັ້ງ, ມີພາຫະນະ 107 ຄັນ, ມີຄົນຖືກບາດເຈັບ 97 ຄົນ ຍິງ 17 ຄົນ, ເສຍຊີວິດ 17 ຄົນ ຍິງ 2 ຄົນ, ມູນຄ່າເສຍຫາຍປະມານ 263 ລ້ານກີບ; ມີອັກຄີໄພເກີດຂຶ້ນທັງໝົດ 3 ຄັ້ງ, ຜົນເສຍຫາຍເຮືອນ 3 ຫຼັງ, ມູນຄ່າຜົນເສຍຫາຍປະມານ 10 ລ້ານກວ່າກີບ; ໄດ້ສົມທົບກັບກອງບັນຊາການທະຫານເມືອງ ຈັດຕັ້ງປະຕິບັດ 2 ໂຄງການ ຄື: ໂຄງການຈັດສັນລະບຽບສັງຄົມ ແລະ ໂຄງການປັບປຸງກໍາລັງກອງຫຼອນ-ປກສ ໃຫ້ມີຄວາມເຂັ້ມແຂງສໍາເລັດ 28 ບ້ານ; ຜ່ານການລົງ ໄດ້ພົບເຫັນ 26 ກໍລະນີ, ມີເປົ້າໝາຍ ທັງໝົດ 3.694 ຄົນ, ຍິງ 1.216 ຄົນ; ໃນນັ້ນ, ກໍລະນີທີ່ພົ້ນເດັ່ນກວ່າໝູ່ມີ 8 ກໍລະນີຄື: ກໍລະນີເສບຢາເສບຕິດ 1.005 ຄົນ ຍິງ 49 ຄົນ; ກໍລະນີມີຈັກສະຕິນໄວ້ຄອບຄອງ 123 ຄົນ, ເກັບກູ້ຈັກສະຕິນໄດ້ 99 ເຄື່ອງ; ກໍລະນີມີປືນແກັບ, ປືນລົມ, ປືນເບີ, ປືນແວັງໄວ້ຄອບຄອງ 220 ຄົນ ຍິງ 1 ຄົນ, ເກັບກູ້ໄດ້ 340 ກະບອກ; ກໍລະນີລັກລອບໄປອອກແຮງງານຢູ່ຕ່າງປະເທດໂດຍບໍ່ຖືກຕ້ອງ 428 ຄົນ ຍິງ 243 ຄົນ; ກໍລະນີຂັດແຍ່ງຍາດດິນທໍາການຜະລິດ 22 ເລື່ອງ ໄດ້ສົມທົບກັບພາກ ສ່ວນທີ່ກ່ຽວຂ້ອງ ສຶກສາອົບຮົມ ແລະ ແກ້ໄຂຢູ່ຂັ້ນບ້ານ; ກໍລະນີຄົນຕ່າງປະເທດມາລີ້ຊ່ອນຢູ່ພາຍໃນເມືອງ 6 ຄົນ ຍິງ 2 ຄົນ (ຄົນໄທ 2 ຄົນ, ຄົນຫວຽດນາມ 4 ຄົນ ຍິງ 2 ຄົນ) ໄດ້ນໍາສົ່ງກັບຄືນປະເທດ; ກໍລະນີເຊື່ອຖືສາສະໜາເຢຊູ 32 ຄອບຄົວ, ມີ 345 ຄົນ ຍິງ 149 ຄົນ ແລະ ກໍລະນີປຶ້ມສໍາມະໂນຄົວເປື້ອນ, ຈີກຂາດ ໄດ້ມີການປ່ຽນແປງ ໃໝ່ ມີ 517 ຫົວ, ມີ 1.014 ຄົນ ຍິງ 550 ຄົນ.
ພັທ ກຸ່ມແສງ ອິນນາມວົງ ຍັງໄດ້ກ່າວຕື່ມອີກວ່າ: ຕໍ່ກັບເປົ້າໝາຍດັ່ງກ່າວທີ່ບໍ່ຮ້າຍແຮງແມ່ນສ້າງບົດບັນທຶກສຶກສາອົບຮົມຢູ່ຂັ້ນບ້ານ; ໂດຍມອບໃຫ້ຄອບຄົວ ແລະ ການຈັດຕັ້ງບ້ານ, ເປົ້າ ໝາຍທີ່ຮ້າຍແຮງ, ດື້ດ້ານ, ບໍ່ເຂັດຫຼາບ ແມ່ນເອົາໄປເຂົ້າສູນບໍາບັດ-ດັດສ້າງຂອງເມືອງ ຫຼື ສົ່ງຕໍ່ໃຫ້ແຂວງບໍາບັດ-ດັດ ສ້າງ, ຕໍ່ກັບຜູ້ຂາຍຍ່ອຍ ຖ້າມີການຊັກທອດແຕ່ 3 ສຽງຂຶ້ນໄປ ທາງເຈົ້າໜ້າທີ່ແມ່ນນໍາຕົວມາສືບສວນ-ສອບສວນ-ດັດສ້າງ, ໃນກໍລະນີກວດກາພົບເຫັນມີຂອງກາງແມ່ນດໍາເນີນຄະດີຕາມລະບຽບກົດໝາຍ.
