ກອງປະຊຸມ ວຽກງານກວດກາ ທົ່ວປະເທດ ປະຈຳປີ 2019 ໄດ້ປິດລົງດ້ວຍຜົນສໍາເລັດ ໃນວັນທີ 10 ມັງກອນ 2020 ທີ່ສະໂມສອນ ຄະນະກວດກາສູນກາງພັກ (ຫຼັກ 6), ເປັນປະທານໂດຍ ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ປະທານອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ພ້ອມທັງມີ ບັນດາຮອງປະທານ, ຄະນະພັກ, ຄະນະກວດກາສູນກາງພັກ, ອົງການ, ແຂວງ-ນະຄອນຫຼວງ, ຫົວໜ້າ-ຮອງຫົວໜ້າກົມ ພ້ອມດ້ວຍສະມາຊິກພັກ-ພະນັກງານ ທົ່ວຄະນະກວດກາສູນກາງພັກ ແລະ ອົງການກວດກາລັດຖະບານ ເຂົ້າຮ່ວມທັງໝົດ 300 ກວ່າສະຫາຍ.
ທ່ານ ສີໃນ ມຽງລາວັນ ຮອງປະທານຄະນະກວດກາສູນກາງພັກ-ອົງການກວດກາລັດຖະບານ ໄດ້ສະຫຼຸບຕີລາຄາ ການເຄື່ອນໄຫວວຽກງານຕິດຕາມ-ກວດກາ ແລະ ສະກັດກັ້ນ-ຕ້ານການສໍ້ລາດບັງຫຼວງ ໃນປີ 2019 ວ່າ:
ໄລຍະ 1 ປີຜ່ານມາ, ຄະນະພັກອົງການປົກຄອງ, ຄະນະກວດກາພັກ-ອົງການກວດກາລັດ ແຕ່ລະຂັ້ນ ໄດ້ສຸມໃສ່ຈັດຕັ້ງປະຕິບັດວຽກງານກວດກາ ຕາມພາລະບົດບາດ, ໜ້າທີ່, ຂອບເຂດສິດຂອງຕົນ ເປັນຕົ້ນແມ່ນ ການຄົ້ນຄວ້າສ້າງ ແລະ ເຜີຍແຜ່-ໂຄສະນານິຕິກໍາຕ່າງໆທີ່ກ່ຽວຂ້ອງ, ການເຄື່ອນໄຫວວຽກງານຕິດຕາມ-ກວດກາພັກ, ການຕິດຕາມ-ກວດກາການບໍລິຫານລັດ ໂດຍອົງການກວດກາລັດແຕ່ລະຂັ້ນ ໄດ້ຕິດຕາມ, ກວດກາຕາມພາລະບົດບາດຂອງຕົນ ແລະ ຕາມການລາຍງານຈາກ 21 ກະຊວງ-ອົງການ, 17 ແຂວງ-ນະຄອນຫຼວງ.
ໂດຍໄດ້ກວດກາທັງໝົດ 945 ເປົ້າໝາຍ ໃນນີ້ຕິດຕາມ ແລະ ກວດກາປົກກະຕິ 333 ເປົ້າໝາຍ, ສືບຕໍ່ຕິດຕາມ, ກວດກາໂຄງການລົງທຶນຂອງລັດ ເລີ່ມແຕ່ຫົວທີ 140 ໂຄງການ, ກວດກາຕາມຜົນການກວດສອບ 307 ເປົ້າໝາຍ.
ຜ່ານການຕິດຕາມ ແລະ ກວດກາ ພົບເຫັນຜົນເສຍຫາຍທັງໝົດ 1.477,64 ຕື້ກີບ, 10,08 ລ້ານບາດ, 24,68 ລ້ານໂດລາ, ລົດໃຫຍ່ 5 ຄັນ, ເກັບກູ້ຄືນ 35,95 ຕື້ກີບ, 10 ລ້ານບາດ, 200.000 ໂດລາ ແລະ ລົດໃຫຍ່ 4 ຄັນ.
ໂອກາດນີ້, ທ່ານ ປອ ບຸນທອງ ຈິດມະນີ ໄດ້ເນັ້ນຫຼາຍບັນຫາ ໂດຍສະເພາະແມ່ນ ການຕິດຕາມ-ກວດກາ ການຄຸ້ມຄອງບໍລິຫານລັດ ແຕ່ລະຂັ້ນ ເປັນຕົ້ນແມ່ນ ໃຫ້ສຸມໃສ່ຕິດຕາມ, ກວດກາ ການປະຕິບັດພາລະບົດບາດ, ໜ້າທີ່, ການໃຊ້ສິດອຳນາດຂອງແຕ່ລະຂະແໜງການ ແລະ ທ້ອງຖິ່ນ. ການປະຕິບັດມະຕິ, ຄຳສັ່ງ, ກົດໝາຍ, ດຳລັດ ແລະ ລະບຽບການຕ່າງໆຂອງລັດ, ກວດກາ ການເກັບລາຍຮັບເຂົ້າງົບປະມານ, ການປະຕິບັດກົດໝາຍພາສີ-ອາກອນ, ກົດໝາຍງົບປະມານ ແລະອື່ນໆ. ນອກນີ້, ການຄຸ້ມຄອງລາຍຈ່າຍຂອງ ກະຊວງ-ອົງການ ແລະ ທ້ອງຖິ່ນ ກໍໃຫ້ຖືກຕາມເປົ້າໝາຍ ແລະ ຮັບປະກັນການປະຕິບັດນະໂຍບາຍປະຫຍັດແຫ່ງຊາດ.
ພ້ອມທັງ ກວດກາລົງເລິກ ແລະ ສືບສວນ-ສອບສວນກ່ຽວກັບ ຄວາມຮັບຜິດຊອບຂອງການຈັດຕັ້ງ ແລະ ບຸກຄົນ ທີ່ພົວພັນເຖິງໂຄງການລົງທຶນຂອງລັດ ແລະ ການຊຳລະໜີ້ສິນແບບມີສ່ວນຫຼຸດ, ການຊຳລະເກີນ ແລະ ຊໍ້າຊ້ອນຢູ່ບັນດາແຂວງທີ່ຍັງຄ້າງປະຕິບັດ, ປະຕິບັດມາດຕະການກວດກາ ເລີ່ມແຕ່ຫົວທີຕໍ່ການປະຕິບັດໂຄງການລົງທຶນຂອງລັດ ເຊັ່ນ: ໂຄງການກໍ່ສ້າງທາງລົດໄຟ ລາວ-ຈີນ ແລະອື່ນໆ ເລີ່ມແຕ່ການປະມູນ, ການຈັດຊື້-ຈັດຈ້າງ ແລະ ຕະຫຼອດໄລຍະເວລາຂອງ ການປະຕິບັດໂຄງການ ໃຫ້ດຳເນີນໄປຖືກຕ້ອງຕາມສັນຍາລະບຽບ-ກົດໝາຍ ແລະ ຊຸກຍູ້ການຈັດຕັ້ງປະຕິບັດຄຳສັ່ງ ເລກທີ 15/ນຍ ເປັນຕົ້ນການຄຸ້ມຄອງປ່າໄມ້ ແລະ ທຸລະກິດໄມ້, ການປະຕິບັດພັນທະໄມ້ ແລະ ບັນຫາອື່ນໆ ເປັນຕົ້ນຢູ່ດ່ານຕ່າງໆ ແລະ ຢູ່ຕາມລຽບຊາຍແດນ ເມື່ອພົບເຫັນຜູ້ລະເມີດ ຕ້ອງແກ້ໄຂຢ່າງເຂັ້ມງວດຕາມລະບຽບ-ກົດໝາຍ.