ພິທີມອບອຸປະກອນການແພດຈາກກອງບັນຊາການທະຫານປ້ອງກັນຊາຍແດນ ແຂວງດຽນບຽນ ແຫ່ງ ສສ ຫວຽດນາມ ໃຫ້ກອງບັນຊາການທະຫານ ແລະ ກອງບັນຊາການ ປກສ 3 ແຂວງພາກເໜືອ ແຫ່ງ ສປປ ລາວ ຄື: ກອງບັນຊາການ ປກສ ແລະ ກອງບັນຊາການທະຫານແຂວງຜົ້ງສາລີ, ກອງບັນຊາການ ປກສ ແຂວງອຸດົມໄຊ ແລະ ກອງບັນຊາການທະຫານ ນະຄອນຫຼວງພະບາງ; ເຊິ່ງຈັດຢູ່ດ່ານສາກົນໄຕຈາງ ແຂວງດຽນບຽນ ແຫ່ງ ສສ ຫວຽດນາມ ໃນວັນທີ 11 ເມສາ 2020.
ອຸປະກອນທີ່ນໍາມາມອບໃນຄັ້ງນີ້ມີ: ຜ້າອັດປາກ-ດັງ 4 ແກັດ ຈໍານວນ 4.000 ຜືນ ແລະ ເຈວລ້າງມື 12 ແກັດ ຈໍານວນ 240 ກ້ອງ; ກ່າວມອບໂດຍ ພັອ ພິເສດ ຟາມວັນໂດ ຮອງຫົວໜ້າກອງບັນຊາການທະຫານປ້ອງກັນຊາຍແດນ ແຂວງດຽນບຽນ ແຫ່ງ ສສ ຫວຽດນາມ, ກ່າວຮັບໂດຍ ພັທ ບຸນລຽນ ແສນວົງ ຮອງຫົວໜ້າກອງບັນຊາການ ປກສ ແຂວງຜົ້ງສາລີ.
ການມອບເຄື່ອງຊ່ວຍເຫຼືອໃນຄັ້ງນີ້ ເພື່ອເປັນການປະກອບສ່ວນອັນສໍາຄັນໃຫ້ແກ່ກອງບັນຊາການ ປກສ ແລະ ກອງບັນຊາການທະຫານ 3 ແຂວງພາກເໜືອ ແຫ່ງ ສປປ ລາວ ເຂົ້າໃນການປ້ອງກັນ, ຄວບຄຸມ ແລະ ຕ້ານພະຍາດອັກເສບປອດສາຍພັນໃໝ່ ຫຼື (COVID 19) ທີ່ກໍາລັງສືບຕໍ່ແຜ່ລະບາດຂຶ້ນຢ່າງຕໍ່ເນື່ອງ ກວມເອົາ 200 ກວ່າປະເທດໃນໂລກ; ໂດຍສະເພາະແມ່ນຢູ່ປະເທດ ສປປ ລາວ ເຮົາໃຫ້ໝົດໄປໄວໆນີ້.
ໂອກ່າວດັ່ງກ່າວ, ພັທ ບຸນລຽນ ແສນ ຕາງໜ້າກອງບັນຊາການ ປກສ ແລະ ກອງບັນຊາການທະຫານ 3 ແຂວງພາກເໜືອ ແຫ່ງ ສປປ ລາວ ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງຍິ່ງໃນຄວາມເປັນຫ່ວງ-ເປັນໃຍຈາກປະເທດເພື່ອນບ້ານ; ກໍຄືກອງບັນຊາການທະຫານປ້ອງກັນຊາຍແດນ ແຂວງດຽນບຽນ ແຫ່ງ ສສ ຫວຽດນາມ ທີ່ໄດ້ນໍາເອົາອຸປະກອນການແພດມາຊ່ວຍເຫຼື່ອໃນຄັ້ງນີ້ ແລະ ເຄື່ອງມືທີ່ນໍາເອົາມາຊ່ວຍເຫຼືອໃນຄັ້ງນີ້ພວກເຮົາຈະນໍາໄປໝູນໃຊ້ເຂົ້າໃນການປ້ອງກັນ, ຄວບຄຸມ ແລະ ຕ້ານໄວຣັດ COVID-19 ທີ່ພວມລະບາດຢູ່ໃນຕອນນີ້ ໃຫ້ເກີດຜົນປະໂຫຍດສູງສຸດ.
