ນັບແຕ່ວັນທີ 24 ກັນຍາ 2020 ເປັນຕົ້ນໄປ, ບັນດາພໍ່ຄ້າ-ແມ່ຄ້າ ທີ່ຂາຍເຄື່ອງຕາມແຄມທາງ ຫຼື ເທີງທາງຄົນຍ່າງ (ຟຸດບາດ) ທີ່ບໍ່ຖືກລະ ບຽບພາຍໃນເມືອງໄຊເສດຖາ ນະຄອນຫຼວງວຽງຈັນ ຕ້ອງຍົກຍ້າຍ ໄປຂາຍບ່ອນທີ່ກໍານົດໃຫ້ຂາຍ, ຖ້າພົບຜູ້ໃດຫາກຍັງດື້ດ້ານ ແລະ ບໍ່ປະ ຕິບັດຕາມ ແມ່ນຈະຖືກ ດໍາເນີນຄະດີຕາມລະບຽບກົດໝາຍ ທີ່ວາງອອກຢ່າງເຂັ້ມງວດ.
ທ່ານ ຄຳສະຫວັນ ໂຄດໄຊ ຮອງເຈົ້າເມືອງໄຊເສດຖາ ໃຫ້ຮູ້ວ່າ: ອິງຕາມສະພາບການເເອອັດການສັນ ຈອນ ແລະ ສະພາບຄວາມຫຍຸ້ງຍາກ ດ້ານການຄຸມຄອງສີນຄ້າ ແລະ ຄວາມເປັນລະບຽບຮຽນ ຮ້ອຍຂອງສັງຄົມ.ສະນັ້ນ, ບັນດາຜູ້ປະກອບກິດຈະການຂາຍເຄື່ອງ ໃນສະຖານທີ່ຫ້າມຂາຍ ແມ່ນໃຫ້ຢຸດເຊົາ ແລ້ວຍ້າຍໄປຂາຍຕາມສະຖານທີ່ ກຳນົດໃຫ້ຂາຍ ເປັນຕົ້ນ ໃນຕະຫຼາດ ແລະ ເຂດອະນຸຍາດເທົ່ານັ້ນ.
ຜ່ານມາ ຄະນະສະເພາະກິດ ໄດ້ລົງເຮັດບົດບັນທຶກກັບຜູ້ຄ້າຂາຍໝາກໄມ້, ໜໍ່ໄມ້ ຕາມແຄມທາງໃນເຂດເມືອງໄຊເສດຖາ, ຄັ້ງທີ1 ກວດພົບຜູ້ຄ້າຂາຍ 18 ຄົນ, ຄັ້ງທີ 2 ມີຈຳນວນ17 ຄົນ ລວມທັງໝົດ 55 ຄົນ, ຢຶດສິນຄ້າ ປະເພດໝາກແຕງ, ໜໍ່ໄມ້ 2 ຄັ້ງ ມູນຄ່າ 750.000 ກີບ , ນອກນີ້ ຍັງເຮັດບົດບັນທຶກກັບຜູ້ຂາຍຊີ້ນໝູ ທີ່ຂາຍຢູ່ນອກຕະຫຼາດ ໃຫ້ເຂົ້າໄປຂາຍໃນຕະຫຼາດ ຈຳນວນ 2 ຮ້ານ, ຫຍັບສີນຄ້າບັນດາຮ້ານທີ່ວາງຂາຍເຄື່ອງ ຕາມຟຸດບາດ ມີ 3 ຮ້ານ, ເຮັດບົດບັນທຶກກັບ ຜູ້ຂາຍຊີ້ນໝູ ຢູ່ 8 ຕະຫຼາດ ໄດ້ 37 ຮ້ານ ທີ່ຂາຍຊີ້ນໝູ ປະເພດ1ບໍ່ໃຫ້ເກີນ 44.000 ກີບຕໍ່ກິໂລ, ປະເພດ2 ບໍ່ໃຫ້ເກີນ 41.000 ກີບຕໍ່ກິໂລ ແລະ ແກ້ໄຂຮ້ານຂາຍເຂົ້າປຽກຕາມແຄມທາງ.
ຈາກການປະຕິບັດວຽກງານດັ່ງກ່າວ ແມ່ນຍັງມີຊາວຄ້າຂາຍຈຳນວນໜຶ່ງ ຍັງດື້ດ້ານບໍ່ປະຕິບັດຕາມການແນະນຳ, ມີບາງຄົນເຮັດບົດບັນທຶກ2-3 ຄັ້ງ ກໍຍັງບໍ່ປະຕິບັດ,ການໃຊ້ມາດຕະການປັບໃໝ ແມ່ນບໍ່ຍອມຈ່າຍເງິນ ແລະ ຢຶດເອົາເຄື່ອງຂາຍຂຶ້ນມາໄວ້ຫ້ອງການ ແຕ່ບໍ່ຍອມມາພົວພັນເອົາ ເມື່ອກາຍກຳນົດ ຕ້ອງທຳລາຍຖີ້ມ.
