ໃນວັນທີ 17 ພະຈິກ 2020, ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ພັອ ເສີນ ຢົງຈິງ ທີ່ປຶກສາທູດປ້ອງກັນຊາດຜູ້ເກົ່າ ແລະ ພັອ ຫຼີປິ່ງ ທີ່ປຶກສາທູດທະຫານປ້ອງກັນຊາດຜູ້ໃໝ່ປະຈຳ ສປປ ລາວ, ມີຄະພັກ, ຄະນະນຳສອງຝ່າຍເຂົ້າຮ່ວມ.
ໃນໂອກາດນີ້, ພົຕ ກົງທອງ ພົງວິຈິດ ໄດ້ສະແດງຄວາມຕ້ອນຮັບອັນອົບອຸ່ນ ແລະ ຕີລາຄາສູງຕໍ່ ພັອ ເສີນ ຢົງຈິງ ທີ່ປຶກສາທູດປ້ອງກັນຊາດຜູ້ເກົ່າ ທີ່ໄດ້ສໍາເລັດການປະຕິບັດໜ້າທີ່ຢູ່ ສປປ ລາວ ແລະ ສະແດງຄວາມຍິນດີທີ່ ພັອ ຫຼີປິ່ງ ໄດ້ຮັບໜ້າທີ່ເປັນທີ່ປຶກສາທູດປ້ອງກັນຊາດຜູ້ໃໝ່ປະຈຳ ສປປ ລາວ,ໃນນາມກະຊວງ ປກສ ສະແດງຄວາມຂອບໃຈ ມາຍັງທີ່ປຶກສາທູດຜູ້ເກົ່າ ທີ່ໃຫ້ການຮ່ວມມືຊ່ວຍເຫຼືອດ້ານວຽກງານຕ່າງໆ ໃນໄລຍະຜ່ານມາໃຫ້ມີຜົນສຳເລັດສາມາດຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຫວັງຢ່າງຍິ່ງວ່າທູດທີ່ປຶກສາຜູ້ໃໝ່ຈະສືບຕໍ່ຮັກສາມູນເຊື້ອໃຫ້ການຮ່ວມມືໃນດ້ານວກງານຕ່າງໆລະຫວ່າງກະຊວງປກສ ແລະ ຫ້ອງການທູດທະຫານ ສປຈີນ ປະຈຳລາວ ສືບຕໍ່ປະຕິບັດວຽກງານທີ່ສອງລັດຖະບານລາວ-ຈີນທີ່ໄດ້ລົງນາມໃນບັນດາໂຄງການຕ່າງໆໃຫ້ມີຜົນສຳເລັດຮັບປະກັນຄວາມສະຫງົບປອດໄພ.
ພັອ ເສີນ ຢົງຈິງ ກໍໄດ້ກ່າວຄວາມຂອບໃຈມາຍັງຄະນະພັກຄະນະນຳ ກະຊວງ ປກສ ທີ່ໃຫ້ການຮ່ວມມື ແລະສະໜັບສະໜູນການຈັດຕັ້ງປະຕິ ບັດວຽກງານໃນໄລຍະຜ່ານມາ ແລະ ໃຫ້ບັນລຸຈຸດປະສົງ,ເປົ້າໝາຍທີ່ວ່າງໄວ້ ໃນຕໍ່ໜ້າຫວັງວ່າກະຊວງປກສ ຈະໃຫ້ການສະໜັບສະໜູນແລະໃຫ້ການຮ່ວມມືທີ່ປຶກສາທູດປ້ອງກັນຊາດຜູ້ໃໝ່ ພ້ອມກັນເພີ່ມທະວີການຮ່ວມມືໃຫ້ມີຄວາມໜັກແໜ້ນມີປະສິດທິພາບ ແລະ ປະສິດທິຜົນດີຂຶ້ນເລື້ອຍໆ.