ເຈົ້າໜ້າທີ່ກະຊວງການທາງລົດໄຟ ອິນເດຍ ເປີດເຜີຍ ໃນວັນທີ 27 ມີນາ ທີ່ຜ່ານມາ ວ່າ: ມີຊາວອິນເດຍ ຫຼາຍກວ່າ 20 ລ້ານຄົນ ແຫ່ສະໝັກວຽກຂອງການທາງລົດໄຟ ເຊິ່ງປະກາດຮັບສະໝັກທັງໝົດ 100.000 ຕຳແໜ່ງ, ຄາດວ່າ ຕົວເລກຜູ້ສະໝັກຈະເພີ່ມສູງຂຶ້ນອີກ ເນື່ອງຈາກກຳນົດການຮັບສະໝັກຈະສີ້ນສຸດລົງ ໃນວັນທີ 31 ມີນານີ້.
ຂະນະທີ່ຕຳແໜ່ງທີ່ເປີດຮັບ ແລະ ມີການທົດສອບຜ່ານທາງອອນໄລໄດ້ແກ່ ຕຳແໜ່ງຕຳຫຼວດການທາງລົດໄຟ, ຄົນຂັບລົດໄຟ ແລະ ຊ່າງເຕັກນິກ ໃນ 15 ພາສາ. ທັງນີ້, ການວ່າງງານຖືເປັນບັນຫາໃຫຍ່ໃນອິນເດຍ ເຊິ່ງປະຊາຊົນຫຼາຍລ້ານຄົນບໍ່ມີວຽກເຮັດ. ເຈົ້າໜ້າທີ່ລະບຸວ່າ: ພວກເຂົາຕ້ອງຮັບມືກັບການຈັດການຕຳແໜ່ງງານໃນລະດັບກາງ ແລະ ລະດັບຕໍ່າ.
ສຳນັກຂ່າວເພຣສ ທຣັດອອຟອິນເດຍ ລາຍງານວ່າ: ປະຊາຊົນກວ່າ 5 ລ້ານຄົນ ສະໝັກງານຜ່ານອອນໄລໃນຕຳແໜ່ງຊ່າງເຕັກນິກ ແລະ ຄົນຂັບລົດໄຟ ຫຼາຍຄົນຈົບການສຶກສາລະດັບປະລິນຍາເອກ. ອິນເດຍ ເປັນໜຶ່ງໃນປະເທດທີ່ມີເຄືອຂ່າຍລົດໄຟຂະໜາດໃຫຍ່ທີ່ສຸດໃນໂລກ ໂດຍມີປະຊາຊົນ ປະມານ 23 ລ້ານຄົນ ໃຊ້ບໍລິການລົດໄຟຕໍ່ວັນ ເຊິ່ງເສັ້ນທາງສ່ວນໃຫຍ່ຖືກສ້າງຂຶ້ນພາຍໃຕ້ສະໄໝທີ່ ອິນເດຍ ຖືກປົກຄອງໂດຍ ອັງກິດ; ຂະນະທີ່ການທາງລົດໄຟ ອິນເດຍ ມີພະນັກງານຫຼາຍກວ່າ 1 ລ້ານຄົນ ຈຶ່ງຖືເປັນໜຶ່ງໃນຜູ້ວ່າຈ້າງງານລາຍໃຫຍ່ທີ່ສຸດຂອງໂລກ.
