ວັນທີ 20 ມີນາ ທີ່ຜ່ານມາ, ສື່ຕ່າງປະເທດລາຍງານຈາກປະເທດຝຣັ່ງ ໃຫ້ຮູ້ວ່າ: ບັນດາສະມາຊິກສະພາແຫ່ງຊາດຝຣັ່ງ ໄດ້ລົງຄະແນນສຽງຜ່ານຮ່າງກົດໝາຍສະບັບໃໝ່ ໂດຍມີເປົ້າໝາຍຫຼັກໃນການປົກປ້ອງຄວາມເປັນສ່ວນຕົວຂອງເດັກນ້ອຍ ຜ່ານຊ່ອງທາງອອນລາຍ ທີ່ເກີດມາຈາກພໍ່-ແມ່ມັກອວດຮູບຂອງລູກໃນສື່ດັ່ງກ່າວ.
ທ່ານ ບຣູໂນ ສະຕູເດີ ສະມາຊິກສະພາສູງຂອງພັກເຣແນດຊັອງ ເປີດເຜີຍວ່າ: ໃນຕົ້ນເດືອນມີນາ, ໄດ້ພະຍາຍາມຊຸກຍູ້ກົດໝາຍສະບັບໃໝ່ ໃນກອງປະຊຸມສະພາແຫ່ງຊາດ, ໂດຍກົດໝາຍດັ່ງກ່າວ ມີຈຸດປະສົງເພື່ອມອບສິດອຳນາດການເບິ່ງແຍງລູກໃຫ້ແກ່ພໍ່-ແມ່ ແລະ ຜູ້ປົກຄອງ. ຂະນະດຽວກັນ, ກໍສະແດງໃຫ້ເດັກນ້ອຍເຫັນວ່າ ພໍ່-ແມ່ບໍ່ໄດ້ມີສິດຂາດຕໍ່ການຕັດສິນໃຈນຳເອົາຮູບຂອງລູກໄປເຜີຍແຜ່.
ເປົ້າໝາຍຫຼັກຂອງກົດໝາຍສະບັບນີ້ ແມ່ນເພື່ອປົກປ້ອງເດັກນ້ອຍ ເພື່ອບໍ່ໃຫ້ພໍ່ແມ່ເປີດເຜີຍຄວາມເປັນສ່ວນຕົວຂອງລູກເຂົາເຈົ້າຫຼາຍເກີນໄປ ໃນໂລກອິນເຕີເນັດ ແລະ ແບບບໍ່ມີຂ້ໍຈໍາກັດ, ໂດຍກໍານົດໃຫ້ນຳເອົາຮູບພາບຂອງເດັກນ້ອຍ (ລູກ) ລົງໃນສື່ສັງຄົມອອນລາຍ ແມ່ນສາມາດເຮັດໄດ້ ຖ້າໄດ້ຮັບການຕົກລົງເຫັນດີຂອງທັງສອງຝ່າຍ (ພໍ່-ແມ່ ແລະ ລູກ); ຖ້າຝ່າຍໃດຝ່າຍໜຶ່ງບໍ່ເຫັນດີ ແລະ ເກີດຄວາມຂັດແຍ່ງກັນຢ່າງຮ້າຍແຮງ ກໍອາດຈະຕ້ອງໃຫ້ຜູ້ພິພາກສາ ສານຄອບຄົວຕັດສິນ ຫຼື ສັ່ງຫ້າມການເຜີຍແຜ່ຮູບຂອງລູກ.
ທ່ານ ສະຕູເດີ ໄດ້ໃຫ້ສໍາພາດກັບ ໜັງສືພິມເລີມົງເດິ (Le Monde) ວ່າ: ໂດຍສະເລ່ຍແລ້ວ, ເຍົາວະຊົນ ອາຍຸ 13 ປີ ຈະມີຮູບຂອງຕົນເອງປະມານ 1.300 ຮູບ, ຖືກເຜີຍແຜ່ທາງອອນລາຍ ແລະ ຮູບພາບເຫຼົ່ານີ້ ສາມາດຖືກນຳໄປໃຊ້ໃນທາງຜິດ ເຊັ່ນ: ຖືກປ່ຽນເປັນຮູບພາບລາມົກຂອງເດັກນ້ອຍ ຫຼື ກາຍເປັນສາເຫດຂອງການຂົ່ມເຫັງໃນໂຮງຮຽນ; ເຊິ່ງເມື່ອໃດທີ່ພໍ່-ແມ່ ໂພສຮູບພາບຂອງລູກຂອງເຂົາເຈົ້າ ໃນອິນເຕີເນັດ, ເຂົາເຈົ້າຈະບໍ່ສາມາດຄວບຄຸມການເຜີຍແຜ່ຮູບພາບເຫຼົ່ານັ້ນໄດ້ອີກ.
ອີງຕາມຂ້ໍມູນຈາກຮ່າງກົດໝາຍສະບັບໃໝ່ນີ້ ຊີ້ໃຫ້ເຫັນວ່າ ຮູບພາບທີ່ມີການແລກປ່ຽນໃນກຸ່ມຄົນທີ່ນິຍົມ ຮູບພາບລາມົກຂອງເດັກນ້ອຍ ແມ່ນມີຮູບຕົ້ນສະບັບມາຈາກການທີ່ພໍ່-ແມ່ຂອງເດັກນ້ອຍ ນຳເອົາຮູບລູກຂອງຕົນເອງເຜີຍແຜ່ລົງສື່ສັງຄົມອອນລາຍ ເຖິງ 50%.
