ໃນລະຫວ່າງວັນທີ 5-6 ກຸມພາ 2019, ພະແນກຕຳຫຼວດກວດກາ ແລະ ຄວບຄຸມຢາເສບຕິດ ຮ່ວມກັບ ພະແນກຕຳຫຼວດຈະລາຈອນ ປກສ ແຂວງຄຳມ່ວນ ໄດ້ນຳເອົາກົດໝາຍ ວ່າດ້ວຍ ຢາເສບຕິດ, ຜົນຮ້າຍຂອງຢາເສບຕິດ ແລະ ກົດລະບຽບການສັນຈອນທາງບົກ ໂດຍລົງໂຄສະນາເຜີຍແຜ່ໃຫ້ອຳນາດການປົກຄອງ ແລະ ພໍ່ແມ່ປະຊາຊົນ ຈໍານວນ 12 ບ້ານ ຂອງເມືອງທ່າແຂກ ໂດຍການເຂົ້າຮ່ວມຂອງ ພັຕ ພູເງິນ ເຮືອງວິໄລ ຫົວໜ້າພະ ແນກຕຳຫຼວດກວດກາ ແລະ ຄວບຄຸມຢາເສບຕິດ ປກສ ແຂວງ ແລະ ຫົວໜ້າກອງໂຄສະນາພະແນກຕຳຫຼວດຈະລາຈອນ ມີບັນດາອຳນາດກອງປົກຄອງບ້ານ, ກຳລັງ ປກສ ບ້ານ ພ້ອມດ້ວຍພໍ່ແມ່ປະຊາຊົນພາຍໃນບ້ານດັ່ງກ່າວ ເຂົ້າຮ່ວມ.
ພັຕ ພູເງິນ ເຮືອງວິໄລ ໄດ້ຍົກໃຫ້ເຫັນຜົນຮ້າຍຢາເສບຕິດ ແລະ ກົດໝາຍ ວ່າດ້ວຍ ຢາເສບຕິດ. ເຊິ່ງບັນຫາຢາເສບຕິດ ແມ່ນສາເຫດທີ່ພາໃຫ້ເກີດປະກົດການຫຍໍ້ທໍ້ໃນສັງຄົມ ເປັນຕົ້ນແມ່ນ ການຂີ່ລັກງັດແງະ, ປຸ້ນຈີ້ຊີງຊັບ, ຂ້າເຈົ້າເອົາຂອງ, ກໍ່ອາລະວາດຕີກັນ, ລັກຊັບພົນລະເມືອງ, ນຳໃຊ້ລົດ-ໃຊ້ຖະໜົນບໍ່ຖືກຕ້ອງຕາມລະບຽບກົດໝາຍ ເປັນສາເຫດທີ່ພາໃຫ້ເກີດອຸບັດຕິເຫດຕາມທ້ອງຖະໜົນ ແລະ ສ້າງຄວາມວຸ່ນວາຍໃນສັງຄົມ; ການລົງໂຄສະນາເຜີຍແຜ່ຄັ້ງນີ້, ເພື່ອເປັນການປູກຈິດສຳນຶກໃຫ້ພໍ່-ແມ່ປະຊາຊົນ ເຫັນໄດ້ເຖິງຜົນຮ້າຍຂອງຢາເສບຕິດ ເຊິ່ງມັນເປັນໄພອັນຕະລາຍຕໍ່ມວນມະນຸດ, ຕໍ່ລະບອບການເມືອງ, ເສດຖະກິດວັດທະນະທຳ-ສັງຄົມ, ຕໍ່ຄອບຄົວ ແລະ ທຳລາຍສຸຂະພາບຂອງຜູ້ເສບ ທັງເປັນການບັ່ນທອນຈັງຫວະການຂະຫຍາຍຕົວຂອງເສດຖະກິດ-ສັງຄົມ ແລະ ຄວາມຈະເລີນກ້າວໜ້າຂອງປະເທດຊາດ. ນອກຈາກນັ້ນ, ຍັງໄດ້ເນັ້ນໜັກໃຫ້ອົງການຈັດຕັ້ງທີ່ກ່ຽວຂ້ອງ ຈົ່ງໄດ້ເອົາໃຈໃສ່ສຶກສາອົບຮົມເຜີຍແຜ່ຜົນຮ້າຍຂອງຢາເສບຕິດ ໃຫ້ກ້ວາງຂວາງກວ່າເກົ່າ.
ຈາກນັ້ນ, ຮທ ແກ້ວວິເສດ ລໍວັນໄຊ ຍັງໄດ້ເຜີຍແຜ່ກົດລະບຽບການສັນຈອນທາງບົກ ພ້ອມທັງອະທິບາຍປ້າຍສັນຍານຈະລາຈອນ, ສາລະບານການເດີນລົດ, ຮູບພາບ ແລະ ສາຍວິດີໂອການສັນຈອນພາຍໃນເທດສະບານເມືອງທ່າແຂກ ແລະ ເນັ້ນໃຫ້ປະຊາຊົນຜູ້ທີ່ໃຊ້ລົດ-ໃຊ້ຖະໜົນ ຕ້ອງປະຕິບັດຕາມກົດລະບຽບຈະລາຈອນ ເພື່ອຫຼຸດຜ່ອນການເກີດອຸບັດຕິເຫດ ພ້ອມທັງຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມໂດຍພື້ນຖານ. ໃນໂອກາດດັ່ງກ່າວ, ຄະນະຮັບຜິດຊອບທີ່ລົງໂຄສະນາໃນຄັ້ງນີ້ ຍັງໄດ້ຮຽກຮ້ອງໃຫ້ບັນດາພໍ່-ແມ່ປະຊາຊົນ ຈົ່ງນຳເອົາບົດຮຽນທີ່ໄດ້ຮຽນມາ ໄປນຳໃຊ້ເຂົ້າໃນການຂັບຂີ່ລົດຢູ່ຕາມທ້ອງຖະໜົນຢ່າງມີຄວາມລະມັດລະວັງ, ມີສະຕິຕໍ່ການສັນຈອນໄປມາ ແລະ ພ້ອມກັນປະຕິບັດກົດລະບຽບການສັນຈອນໃຫ້ເຂັ້ມງວດ ທັງນີ້ກໍເພື່ອຫຼີກລ່ຽງຈາກບັນຫາການເກີດອຸບັດຕິເຫດຕາມທ້ອງຖະໜົນ ແລະ ເຮັດໃຫ້ບັນຫາດັ່ງກ່າວຫຼຸດໜ້ອຍຖອຍລົງເທື່ອລະກ້າວ.