ໃນວັນທີ 20 ມີນາ ຜ່ານມາ, ທ່ານ ນູສະລະຕານ ນາຊາບາເຍບ ປະທານາທິບໍດີຂອງກາຊັກສະຖານ ຖະແຫຼງຜ່ານສະຖານີໂທລະພາບແຫ່ງຊາດ ວ່າ: ຂໍລາອອກຈາກຕຳແໜ່ງຜູ້ນຳປະເທດ ໂດຍ ທ່ານ ນາຊາບາເຍບ ອາຍຸ 78 ປີ, ເຊິ່ງເປັນຜູ້ນຳຄົນທຳອິດ ແລະ ຄົນດຽວຂອງກາຊັກສະຖານ ນັບຕັ້ງແຕ່ການປະກາດເປັນເອກະລາດ ໃນເດືອນທັນວາ 1991, ເຊິ່ງຖະແຫຼງການລາອອກຈາກຕຳແໜ່ງຄັ້ງນີ້ ຍັງບໍ່ໄດ້ໃຫ້ເຫດຜົນຊັດເຈນ ແຕ່ທ່ານກ່າວວ່າ:
ການລາອອກຈາກຕຳແໜ່ງຄັ້ງນີ້ ຍາກລຳບາກທີ່ສຸດ ແລະ ພາລະກິດສຳຄັນນັບຈາກນີ້ ຄື ການສ້າງຄວາມເຊື່ອໝັ້ນໃຫ້ກັບທຸກພາກສ່ວນວ່າ ຂະບວນການມອບໂອນອຳນາດ ລະບອບປະຊາທິປະໄຕ ຈະເປັນໄປຢ່າງສຳເລັດ.
ແນວໃດກໍຕາມ, ທ່ານ ນາຊາບາເຍັບ ຍັງໄດ້ກ່າວຄຳຂອບໃຈຕໍ່ປະຊາຊົນຊາວກາຊັກສະຖານ ທີ່ເຊື່ອໝັ້ນໃນການນຳພາຂອງທ່ານມາໂດຍຕະຫຼອດເກືອບ 30 ປີ. ຂະນະດຽວກັນນັ້ນ, ມີລາຍງານວ່າ ທ່ານ ນາຊາບາເຍບ ຍັງໄດ້ສົນທະນາທາງໂທລະສັບກັບ ທ່ານ ວະລາດີເມຍ ປູຕິນ ປະທານາທິບໍດີຂອງລັດເຊຍ ແຕ່ບໍ່ມີການເປີດເຜີຍລາຍລະອຽດ.
ດ້ານກະຊວງການຕ່າງປະເທດ ສະຫະລັດ ອາເມລິກາ ອອກຖະແຫຼງການວ່າ:
ຄວາມສຳພັນລະຫວ່າງສອງປະເທດ ຍັງມີຄວາມແໜ້ນແຟ້ນ ເຖິງແມ່ນວ່າ ຍັງມີສຽງວິເຄາະວ່າ ການຕັດສິນໃຈຂອງ ທ່ານ ນາຊາເຍບ ຄືການສະລະຕຳແໜ່ງ ແຕ່ບໍ່ແມ່ນການສະລະອຳນາດ.
ທ່ານ ບາຊາເຍບ ຊະນະການເລືອກຕັ້ງໃນປີ 1999, 2005, 2011 ແລະ 2015 ດ້ວຍຄະແນນສຽງຫຼາຍກວ່າ 97% ທຸກຄັ້ງ; ເຖິງແມ່ນວ່າເປັນການເລືອກຕັ້ງທີ່ມີສຽງວິຈານຫຼາຍຈາກຝ່າຍຕາເວັນຕົກວ່າ ເປັນພຽງການຫາສຽງລັກສະນະເພີ່ມອຳນາດ ແລະ ສຽງວິຈານດ້ານສິດທິມະນຸດ ໃນກາຊັກສະຖານ ທີ່ຍັງຮ້າຍແຮງ.
ແຕ່ບໍ່ອາດປະຕິເສດໄດ້ວ່າ ທ່ານ ບາຊາເຍບ ໄດ້ນຳພາກາຊັກສະຖານ ເຊິ່ງເປັນປະເທດທີ່ບໍ່ມີທາງອອກສູ່ທະເລໂດຍກົງ ແລະ ມີປະຊາກອນພຽງແຕ່ 18.3 ລ້ານຄົນ ໃຫ້ກາຍເປັນໜຶ່ງໃນປະເທດມະຫາອຳນາດຂອງອາຊີຕາເວັນອອກກາງ ດ້ວຍການເປັນປະເທດທີ່ມີຊັບພະຍາກອນແຮ່ທາດຈຳນວນຫຼວງຫຼາຍ.
ນອກນັ້ນ, ກາຊັກສະຖານ ຍັງທີ່ຖືເປັນໜຶ່ງຈຸດຍຸດທະສາດທາງການເມືອງ ແລະ ການຄ້າໂລກ ທີ່ລວມເຖິງແຜນເສັ້ນທາງສາຍໄໝຂອງຈີນ ນຳອີກ.