ຕຳຫຼວດຫວຽດນາມ ບຸກຈັບແກ້ງຄ້າຢາເສບຕິດລາຍໃຫ່ຍຢູ່ເຮືອນພັກຫແຫ່ງໜຶ່ງໃນນະຄອນໂຮ່ຈິມິນ ທີ່ຖືກກ່າວຫາວ່າມີຊາວຈີນ ເປັນຜູ້ດຳເນີນການ ໂດຍໃຊ້ບໍລິສັດສົ່ງອອກເຄື່ອງນຸ່ງຫົ່ມ ເປັນສາກບັງໜ້າການຄ້າຢາເສບຕິດ ຕາມການເປີດເຜີຍຂອງຕຳຫຼວດ ແລະ ສື່ຂອງທະຫານວ່າ ເຈົ້າຫນ້າທີ່ຕຳຫຼວດພ້ອມອາວຸດ ແລະຕຳ ຫຼວດນອກເຄື່ອງແບບຫຼາຍສິບຄົນ ໄດ້ບຸກເຂົ້າຄົ້ນເຮືອນພັກ ໃນລະຫວ່າງປະຕິບັດການບຸກກວດຄົ້ນນານຫຼາຍຊົ່ວໂມງ ເຈົ້າໜ້າທີ່ພົບເປົາຢາເສບຕິດຫຼາຍຖົງທີ່ຊຸດເຊື່ອງໄວ້ພາຍໃນເຮືອນພັກ.
ເຈົ້າໜ້າາທີ່ວິຊາສະເພາະໄດ້ຈັບກຸມຜູ້ຖືກສົງໄສໄດ້ທັງໝົດ 11 ຄົນ ເປັນຊາວຈີນ 8 ຄົນ ແລະ ຊາວຫວຽດນາມ 3 ຄົນ, ເຈົ້າຫນ້າທີ່ຕຳຫຼວດເປີດເຜີຍໃຫ້ຮູ້ວ່າ ຜູ້ຖືກສົງໄສຄົນສຳຄັນທີ່ຄາດວ່າເປັນຫົວໜ້າາແກ້ງ ເປັນຊາວຈີນອາຍຸ 56 ປີ ທີ່ຖືກຫາວ່າດຳເນີນການຄ້າຢາເສບຕິດ ໂດຍມີທຸລະກິດສົ່ງອອກ ທີ່ຈົດທະບຽນໃນຊື່ຂອງແຟນສາວຊາວຫວຽດນາມ ເປັນສາກໜ້າ.
ໃນການປາບປາມຢາເສບຕິດຄັ້ງນີ້, ເຈົ້າໜ້າທີ່ຕຳຫຼວດສາມາດຢຶດຢາບ້າໄດ້ປະມານ 300 ກິໂລກຼາມ ມູນຄ່າປະມານ 26 ລ້ານໂດລາສະຫະລັດ ຖືເປັນການຈັບຢຶດຢາເສບຕິດຄັ້ງໃຫຍ່ທີ່ສຸດທີ່ເຄີຍເກີດຂຶ້ນໃນນະຄອນໂຮ່ຈິມິນ. ຢາເສບຕິດເຫຼົ່ານີ້ ເຊື່ອວ່າມີຕົ້ນທາງມາຈາກປະເທດເພື່ອນບ້ານ ໂດຍລັກລອບນຳເຂົ້າໄປຍັງຫວຽດນາມຜ່ານຊາຍແດນດ່ານບໍ່ອີ ໃນແຂວງກົງຕູມ ເພື່ອຂາຍໃນນະຄອນໂຮ່ຈິມິນ.
ການປາບປາມຢາເສບຕິດລາຍໃຫຍ່ຄັ້ງນີ້ ເປັນສ່ວນໜຶ່ງຂອງການສືບສວນໃຫຍ່ທົ່ວພາກກາງຂອງຫວຽດນາມ, ເຊິ່ງມີສ່ວນກ່ຽວຂ້ອງ ແລະ ເຊື່ອມຕໍ່ຫຼາຍແຂວງຂອງຫວຽດນາມ. ແນວໃດກໍຕາມ, ເຈົ້າໜ້າທີ່ຕຳຫຼວດຂອງຫວຽດນາມໄດ້ພະຍາຍາມປາບປາມ ແລະ ການສືບຫາຫົວໂປໂຕການລາຍໃຫຍ່ຢ່າງຕໍ່ເນື່ອງ.
ການເສບຢາບ້າກຳລັງເພີ່ມຫຼາຍຂຶ້ນໃນຫວຽດນາມ ໂດຍສະເພາະຢ່າງຍິ່ງໃນກຸ່ມໄວລຸ້ນ. ຂະນະທີ່ຢາເສບຕິດປະເພດຝິ່ນ ຫຼື ເຮໂຣອິນ ນັ້ນເປັນທີ່ນິຍົມເສບໃນກຸ່ມຜູ້ສູງອາຍຸ ແລະ ໃນໄລຍະຫຼາຍເດືອນມານີ້ ເຈົ້າໜ້າທີ່ຕຳຫຼວດ ສາມາດຈັບຢຶດດຢາເສບຕິດໄດ້ເປັນຈຳນວນຫຼວງຫຼາຍ, ເຊິ່ງເປັນຄວາມພະຍາຍາມຂອງທາງການທີ່ຈະປາບປາມການຄ້າຢາເສບຕິດໃຫ້ໝົດໄປຈາກສັງຄົມ
