ກອງບັນຊາການ ປກສ ເມືອງບໍລິຄັນ ແຂວງບໍລິຄໍາໄຊ ໄດ້ຈັດກອງປະຊຸມສະຫຼຸບວຽກງານ ປະຈຳປີ 2018 ແລະ ວາງທິດທາງແຜນການ ໃນປີ 2019 ໃນທ້າຍອາທິດທີ່ຜ່ານມາ, ເປັນປະທານໂດຍ ພັທ ແກ້ວສຸວັນ ວັນນະແຝງ ຫົວໜ້າກອງບັນຊາການ ປກສ ເມືອງບໍລິຄັນ, ເຂົ້າຮ່ວມໂດຍ ພັອ ທອງໃບ ລໍວັນໄຊ ຫົວໜ້າກອງບັນຊາການ ປກສ ແຂວງ ບໍລິຄຳໄຊ, ມີ ເຈົ້າເມືອງໆບໍລິຄັນ, ຄະນະພັກ-ຄະນະກອງບັນຊາການ ຕະຫຼອດຮອດ ພະນັກງານ-ນັກຮົບ ເຂົ້າຮ່ວມ.
ພັທ ກາດຳ ດາວແດນໃຕ້ ຮອງຫົວໜ້າກອງບັນຊາການ ປກສ ເມືອງບໍລິຄັນ ໃຫ້ຮູ້ວ່າ:
ໃນໄລຍະ 1 ປີທີ່ຜ່ານມາ, ມີຄະດີເກີດຂຶ້ນທັງໝົດ 175 ເລື່ອງ, ມີຜູ້ຖືກຫາ 219 ຄົນ, ໃນນັ້ນຄະດີຄ້າ-ຂາຍຢາເສບຕິດ 16 ເລື່ອງ, ມີຜູ້ຖືກຫາ 21 ຄົນ, ຢຶດຂອງກາງຢາບ້າໄດ້ 4.521 ເມັດ, ຄະດີອາຍາເກີດຂຶ້ນ 111 ເລື່ອງ, ມີຜູ້ຖືກຫາ 137 ຄົນ, ຂອງກາງຄະດີມີໝໍ້ຊ໋ອດ 4 ເຄື່ອງ, ປືນລູກຊອງ 2 ກະບອກ, ປືນແກ໊ບ 5 ກະບອກ, ຈັກສະຕິນ 3 ເຄື່ອງ, ເລົາປືນແກ໊ບ 14 ເລົາ, ລະເບີດ 1 ໜ່ວຍ, ແກ້ໄຂຄະດີເສດຖະກິດເກີດຂຶ້ນ 48 ເລື່ອງ, ມີຜູ້ຖືກຫາ 51 ຄົນ, ຂອງກາງມີໄມ້ແປ້ນ ແລະ ໄມ້ແປຮູບ 12.856 ແມັດກ້ອນ, ຖ້າທຽບໃສ່ປີຜ່ານມາ ແມ່ນຫຼຸດລົງ 13 ເລື່ອງ, ບັນຫາທີ່ພົ້ນເດັ່ນແມ່ນ ບັນຫາການຄາດຕະກໍາ ເສຍຊີວິດ 6 ສົບ.
ນອກນັ້ນ, ຍັງໄດ້ເອົາໃຈໃສ່ແກ້ໄຂບັນຫາ 4 ເຖື່ອນ ແລະ ໄດ້ຮັບຜົນສໍາເລັດຢ່າງມີປະສິດທິຜົນ.
ຈາກນັ້ນ, ບັນດາຜູ້ແທນ ຍັງໄດ້ຜັນປ່ຽນກັນຂຶ້ນລາຍງານສະພາບການຕ່າງໆ ທີ່ເກີດຂຶ້ນໃນຂົງເຂດທີ່ຕົນຮັບຜິດຊອບ, ພ້ອມທັງປະກອບຄຳຄິດຄຳເຫັນໃສ່ບົດສະຫຼຸບ ແລະ ທິດທາງແຜນການໃຫ້ສົມບູນຂຶ້ນ.