ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງໄຊສົມບູນ ໃນວັນທີ 28 ມີນາ 2019 ໂດຍການຕ້ອນຮັບຂອງ ພົຕ ຄໍາລຽງ ອຸທະໄກສອນ ເຈົ້າແຂວງໆໄຊສົມບູນ ພ້ອມດ້ວຍການນຳແຂວງ.
ເຈົ້າແຂວງໆໄຊສົມບູນ ໄດ້ລາຍງານວ່າ:
ໃນໄລຍະຜ່ານມາ, ການປູກຝັງ-ລ້ຽງສັດ, ການທ່ອງທ່ຽວທາງດ້ານທໍາມະຊາດ, ປະຫວັດສາດ ແລະ ວັດທະນະທຳ ມີທ່າແຮງດ້ານພະລັງງານເຂື່ອນໄຟຟ້າ ມີທັງໝົດ 26 ໂຄງການ, ກຳລັງຕິດຕັ້ງປະມານ 2.147,35 ເມກາວັດ, ສໍາເລັດໄປແລ້ວ 8 ເຂື່ອນ ແລະ ທ່າແຮງທາງດ້ານບໍ່ແຮ່, ແຮ່ຄໍາ, ແຮ່ທອງແດງ, ແຮ່ເຫຼັກ ແລະອື່ນໆ ເຫັນໄດ້ວ່າ:
ເສດຖະກິດຂອງແຂວງ ໄດ້ຂະຫຍາຍຕົວເພີ່ມຂຶ້ນ ເຊັ່ນ: ທາງດ້ານກະສິກຳ ເພີ່ມຂຶ້ນ 4,2% ກວມເອົາ 43,2% ຂອງ GDP, ອຸດສາຫະກໍາ ເພີ່ມຂຶ້ນ 2% ກວມເອົາ 12,8%, ດ້ານການບໍລິການເພີ່ມຂຶ້ນ 11% ກວມເອົາ 44% ຂອງ GDP. ນັບແຕ່ມື້ສ້າງຕັ້ງແຂວງເປັນຕົ້ນມາ, ຄະນະພັກອົງການປົກຄອງ ແຂວງໄຊສົມບູນ ໄດ້ພ້ອມກັນສຸມທຸກຄວາມພະຍາຍາມ-ສູ້ຊົນຈັດຕັ້ງປະຕິບັດມະຕິ ກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງລັດ 5 ປີ ຄັ້ງທີ VIII.
ໃນພິທີ, ຮອງນາຍົກ ໄດ້ເນັ້ນໃຫ້ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມ ແລະ ແກ້ໄຂວິຖີຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ສຸມໃສ່ການພັດທະນາເສດຖະກິດ-ສັງຄົມ ໂດຍສະເພາະ ການສ້າງທ່າແຮງຢູ່ຂັ້ນບ້ານ, ເມືອງ ແລະ ແຂວງ ໃຫ້ມີຄວາມມັ່ງຄັ່ງ-ເຂັ້ມແຂງ, ສືບຕໍ່ຫັນເອົາພະນັກງານລົງກໍ່ສ້າງຮາກຖານການເມືອງ ແລະ ເອົາໃຈໃສ່ສ້າງບ້ານ ປ້ອງກັນຊາດ-ປ້ອງກັນຄວາມສະຫງົບ ເພື່ອເຮັດໃຫ້ແຂວງ ມີສະຖຽນລະພາບທາງດ້ານການເມືອງ ແລະ ໂອກາດດຽວກັນ ຍັງໄດ້ໂອ້ລົມພະນັກງານກວດກາທົ່ວແຂວງ.