ໃນວັນທີ 29 ເມສາ, ສາຍການບິນສະແກນດີເນວຽນ ແອລາຍ ຊິສເຕັມ (SAS) ປະກາດຍົກເລີກຖ້ຽວບິນອີກ 1.200 ຖ້ຽວ ສຳລັບວັນທີ 29 ແລະ 30 ເມສາ ເນື່ອງຈາກນັກບິນຢຸດງານປະທ້ວງຍືດເຫຍື້ອ ເຊິ່ງວັນທີ 28 ເມສາ ທີ່ຜ່ານມາ ເປັນມື້ທີສາມແລ້ວ.
ນັກບິນ SAS ເລີ່ມຢຸດງານຕັ້ງແຕ່ວັນທີ 26 ເມສາ ທີ່ຜ່ານມາ ຫຼັງຈາກການເຈລະຈາຂໍຂຶ້ນເງິນເດືອນຫຼົ້ມເຫຼວ ເປັນເຫດໃຫ້ຕ້ອງຢຸດຕິຖ້ຽວບິນເຖິງ 70% ກະທົບຜູ້ໂດຍສານ 280.000 ຄົນ.
ທາງດ້ານສາຍການບິນ ອອກຖະແຫຼງການຂໍໂທດຕໍ່ຜູ້ໂດຍສານ ວ່າ:
ການຢຸດງານປະທ້ວງທີ່ຍັງບໍ່ຢຸດຕິ ເຮັດໃຫ້ຕ້ອງຍົກເລີກຖ້ຽວບິນທົ່ວສະແກນດີເນວຽນ ອີກ 667 ຖ້ຽວ ກະທົບຜູ້ໂດຍສານ 61.000 ຄົນ ໃນວັນທີ 29 ເມສາ ແລະ ຖ້ຽວບິນອີກ 546 ຖ້ຽວ ກະທົບຜູ້ໂດຍສານ 49.000 ຄົນ ໃນວັນທີ 30 ເມສານີ້.
ສຳນັກຂ່າວ ຣອຍເຕີ ລາຍງານວ່າ:
ການເຈລະຈາເລື່ອງເງິນເດືອນ ຍັງບໍ່ມີທ່າອ່ຽງວ່າຈະບັນລຸຜົນ ເພາະທັ້ງ SAS, ສະຫະພາບນັກບິນ ຊູແອັດ ແລະ ດານມາກ ແລະ ສະມາຄົມນາຍຈ້າງນອກແວ ແຈ້ງຕົງກັນວ່າ ຍັງບໍ່ມີຝ່າຍໃດສະເໜີເປີດການເຈລະຈາຄັ້ງໃໝ່;
SAS ທີ່ມີລັດຖະບານຊູແອັດ ແລະ ດານມາກ ຖືຜຸ້ນບາງສ່ວນ ເປີດເຜີຍກ່ອນໜ້ານີ້ວ່າ: ພ້ອມກັບໄປເຈລະຈາ ແຕ່ການເຮັດຕາມຂໍ້ຮຽກຮ້ອງຂອງນັກບິນ ຈະເຮັດໃຫ້ບໍລິສັດເສຍຫາຍຢ່າງຮ້າຍແຮງ.
ໜ່ວຍງານບໍລິຫານຂອງ SAS ໃນຊູແອັດ ເປີດເຜີຍວ່າ:
ນັກບິນຂໍຂຶ້ນເງິນເດືອນອີກ 13% ທັ້ງໆທີ່ໄດ້ຮັບເງິນເດືອນສະເລ່ຍ 93.000 ໂຄຣນາ (ສະກຸນເງິນຂອງ ຊູແອັດ) ເຊິ່ງຖືວ່າສູງຫຼາຍຢູ່ແລ້ວ ຈຶ່ງເປັນການຮຽກຮ້ອງທີ່ຫຼາຍເກີນໄປ ຂະນະທີ່ ສະຫະພາບນັກບິນ SAS ທີ່ມີນັກບິນ SAS ໃນດານມາກ, ນອກແວ ແລະ ຊູແອັດ ເປັນສະມາຊິກຢູ່ 95% ກ່າວວ່າ:
ບັນຫາຂະນະນີ້ ບໍ່ແມ່ນແຕ່ເລື່ອງເງິນເດືອນເທົ່ານັ້ນ ແຕ່ເປັນເລື່ອງຊົ່ວໂມງເຮັດວຽກ ທີ່ຄວນມີຄວາມແນ່ນອນຫຼາຍກວ່າປັດຈຸບັນ ເຊັ່ນກັນ.
SAS ຕັ້ງຂຶ້ນໃນປີ 1946 ຫຼັງສົງຄາມໂລກ ຄັ້ງທີ 2 ແລະ ເກືອບຫຼົ້ມລະລາຍ ໃນປີ 2012 ນັ້ນ ສາມາດພິກກັບມາສ້າງກຳໄລໄດ້ທຸກປີ ໃນໄລຍະ 4 ປີມານີ້ ແຕ່ຂະນະນີ້ ກຳລັງຖືກກົດດັນຈາກເລື່ອງລາຄາເຊື້ອໄຟ ເພີ່ມສູງຂຶ້ນ, ຄ່າເງິນປັ່ນປ່ວນ ແລະ ສາຍການບິນໃນເອີຣົບ ຫຼົ້ນຕະຫຼາດ.
ທັ້ງນີ້, ນັກວິເຄາະ ປະເມີນວ່າ:
ການຢຸດງານຂອງນັກບິນ ຈະເຮັດໃຫ້ SAS ເສຍຫາຍມື້ລະ 60-80 ລ້ານໂຄຣນາ ແລະ ຈະເຮັດໃຫ້ກຳໄລທັ້ງປີທີ່ຄາດໄວ້ ໝົດລົງໄດ້ພາຍໃນ 2 ອາທິດ.