ຈຳນວນຜູ້ເສຍຊີວິດຈາກພາຍຸໄຊໂຄຼນ ພັດຖະຫຼົ່ມທາງພາກຕາເວັນອອກຂອງອິນເດຍ ແລະ ບັງກຼາເດດ ໃນຕົ້ນເດືອນພຶດສະພາ ເພີ່ມຂຶ້ນເປັນ 77 ຄົນແລ້ວ ໃນວັນທີ 13 ພຶດສະພາ ທີ່ຜ່ານມາ ຂະນະທີ່ປະຊາຊົນອີກຫຼາຍລ້ານຄົນ ເລີ່ມບໍ່ພໍໃຈກັນຫຼາຍຂຶ້ນທີ່ຍັງບໍ່ມີໄຟຟ້າ ແລະ ນໍ້າປະປາໃຊ້.
ໄຊໂຄຼນຟານິ ເຊິ່ງເປັນໄຊໂຄຼນໃນລະດູຮ້ອນລູກທຳອິດ ທີ່ພັດຖະຫຼົ່ມແຄມຝັ່ງອິນເດຍ ທາງອ່າວເບັງການ ໃນຮອບ 43 ປີ ໄດ້ມາຂຶ້ນຝັ່ງທີ່ລັດໂອດິຊາ ໃນວັນທີ 3 ພຶດສະພາ ທີ່ຜ່ານມາ ໂດຍມີລົມພັດແຮງສູງສຸດ 200 ກິໂລແມັດຕໍ່ຊົ່ວໂມງ ສ້າງຄວາມເສຍຫາຍຕາມບ້ານເຮືອນ 5 ແສນຫຼັງ, ຕົ້ນໄມ້ໂຄ່ນຫຼົ້ມຫຼາຍແສນຕົ້ນ ແລະ ໄຟຟ້າດັບ, ຕັດຂາດລະບົບໂທລະຄົມມະນາຄົມ ແລະ ນໍ້າປະປາສຳລັບປະຊາຊົນຫຼາຍລ້ານຄົນ ໃນລັດໂອດິຊາ, ໂດຍປັດຈຸບັນ ມີລາຍງານຜູ້ເສຍຫາຍໃນອິນເດຍ 64 ຄົນ ແລະ ທີ່ບັງກຼາເດດ 13 ຄົນ.
ຂະນະດຽວກັນ, ຜູ້ລອດຊີວິດບໍ່ພໍໃຈຈາກເຫດການດັ່ງກ່າວ ອອກມາປະທ້ວງຕາມຖະໜົນຫົນທາງ ເພາະໄດ້ຮັບການຊ່ວຍເຫຼືອຫຼ້າຊ້າ, ອາຫານ ແລະ ສິ່ງຂອງຈຳເປັນ ລາຄາແພງຂຶ້ນຫຼາຍ ແລະ ຂາດເຂີນນໍ້າ.
ນອກຈາກນີ້, ເຈົ້າຄອງລັດໂອດິຊາ ໄດ້ກ່າວວ່າ:
ຈະເລີ່ມປະເມີນຄວາມເສຍຫາຍຕາມບ້ານເຮືອນ ຕັ້ງແຕ່ວັນທີ 15 ພຶດສະພາ ແລະ ສັນຍາຈະໃຫ້ການຊ່ວຍເຫຼືອທາງການເງິນແກ່ຄອບຄົວທີ່ປະສົບໄພ.
