ໃນວັນທີ 21 ພຶດສະພາ 2019 ຢູ່ທີ່ກອງບັນຊາການ ປກສ ເມືອງສິງ ແຂວງຫຼວງນໍ້າທາ ໄດ້ຈັດກອງປະຊຸມແລກປ່ຽນບົດຮຽນວຽກງານປ້ອງກັນລະຫວ່າງ ກອງພັນປ້ອງກັນເຄືອນທີ່, ປກສ ເມືອງສິງ, ທະນາຄານພັດທະນາລາວ, ທະນາຄານການຄ້າຕ່າງປະເທດ ແລະ ທະນາຄານສົ່ງເສີມກະສິກຳ ປະຈຳເມືອງສິງ, ໂດຍມີ ພັຕ ຄໍາເຕົ່າ ກໍາລັດສາລີ ຮອງຫົວໜ້າ ກອງບັນຊາການ ປກສ ເມືອງສິງ, ມີຄະນະກອງພັນເຄືອນທີ່ ປກສ ແຂວງ, ຫົວໜ້າຄະນະທະນາຄານ 3 ທະນາຄານ ແລະ ພະນັກງານ ເຂົ້າຮ່ວມ.
ໃນກອງປະຊຸມ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານປ້ອງກັນເວນຍາມ ຂອງກໍາລັງປ້ອງກັນເຄືອນທີ່ ປກສ ແຂວງ ທີ່ປະຈຳຢູ່ໜ່ວຍບໍລິການ ທະນາຄານພັດທະນາລາວ, ທະນາຄານການຄ້າຕ່າງປະເທດ ແລະ ທະນາຄານສົ່ງເສີມກະສິກຳ ປະຈຳເມືອງສິງ, ການອຸດໜູນແຮງງານ, ສະ ຖານທີ່ພັກເຊົ່າ ແລະ ນະໂຍບາຍດ້ານອື່ນໆ; ພ້ອມນີ້ ເພື່ອສືບຕໍ່ ມອບໃຫ້ກອງບັນຊາການ ປກສ ເມືອງສິງ ເປັນຜູ້ເຮັດວຽກງານປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍທັງ 3 ທະນາຄານ ກອງປະຊຸມໄດ້ແຕ່ງຕັ້ງ ພະນັກງານ-ນັກຮົບ ໄປປະຈຳການປ່ຽນແທນອ້າຍ-ນ້ອງກອງພັນປ້ອງກັນເຄືອນທີ່ ປກສ ແຂວງ.
ພັດ ຄໍາເຕົ່າ ກໍາລັດສາລີ ຍັງ ໄດ້ໄດ້ເໜັ້ນໜັກໃຫ້ຜູ້ທີ່ລົງໄປປະຈໍາຢູ່ໃໝ່ໃນຄັ້ງນີ້ ໃຫ້ເອົາໃຈໃສ່ ເປັນຕົ້ນແມ່ນ ໃຫ້ປະຕິບັດກົດລະບຽບຂອງທາງ 3 ທະນາຄານ ວາງອອກຕິດພັນກັບການປ້ອງກັນໃຫ້ມີຄວາມຮັບຜິດຊອບ, ການເຮັດວຽກງານໃຫ້ເປັນເອກະພາບກັນແຕ່ລະທະນາຄານ, ປະສານງານໃນລະບອບການສ່ອງແສງລາຍງານໃຫ້ຂັ້ນເທິ່ງເປັນປົກກະຕິ ແລະ ເຕົ້າໂຮມຄວາມສາມັກຄີ ທັງ 3 ທະນາຄານ ໃຫ້ມີຄວາມແໜ້ນ ແຟ້ນຂຶ້ນກ່ວາເກົ່າ.
