ກອງບັນຊາການ ປກສ ເມືອງວຽງທອງ ແຂວງບໍລິຄຳໄຊ ໄດ້ສະຫຼຸບວຽກງານປ້ອງກັນຄວາມສະຫງົບ ປະຈໍາປີ 2018 ແລະ ວາງທິດທາງແຜນການ ປີ 2019 ໃນວັນທີ 24 ພຶດສະພາ 2019 ເປັນປະທານໂດຍ ພັທ ປະຊັນ ຫຼວງພິທັກ ຫົວໜ້າກອງບັນຊາການ ປກສ ເມືອງວຽງທອງ, ມີ ທ່ານ ຄໍາມອນ ໄຊພົມມີ ຮອງເຈົ້າເມືອງວຽງທອງ, ມີ ຄະນະພັກ-ຄະນະກອງບັນຊາການ ແລະ ພະນັັກງານ-ນັກຮົບ ເຂົ້າຮ່ວມ.
ພັທ ຄໍາແດງ ແສງມີທອງ ຮອງຫົວໜ້າກອງບັນຊາການ ປກສ ເມືອງ ກ່າວວ່າ:
1 ປີຜ່ານມາ, ຄະນະກອງບັນຊາການ ໄດ້ເອົາໃຈໃສ່ເປັນເຈົ້າການໃນການຊີ້ນຳ-ນຳພາພະນັກງານ-ນັກຮົບ ໃຫ້ເອົາໃຈໃສ່ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ, ກຳແໜ້ນເປົ້າໝາຍ, ກວດກາຄຸ້ມຄອງການເຊື່ອມໂຍງກັບຕ່າງປະເທດ ສະກັດກັ້ນຕ້ານອາສະຍາກຳຕ່າງໆ ຢູ່ພາຍໃນເມືອງ.
ປີຜ່ານມາ, ມີຄະດີອາຍາເກີດຂຶ້ນ 12 ເລື່ອງ, ກັກຜູ້ຖືກຫາໄດ້ 11 ຄົນ, ຄະດີຢາເສບຕິດ ມີ 4 ເລືອງ, ກັກຕົວຜູ້ຖືກຫາ ໄດ້ 4 ຄົນ ຍິງ 2 ຄົນ, ຄະດີເສດຖະກິດ ມີ 15, ຄະດີສໍ້ໂກງຊັບພົນລະເມືອງ 8 ເລື່ອງ, ອຸບັດຕິເຫດເກີດຂຶ້ນທັງໝົດ 32 ເລື່ອງ, ມີອັກຄີໄພເກີດຂຶ້ນ 2 ຄັ້ງ ແລະ ໄດ້ສົມທົບກັບພາກສ່ວນທີ່ກ່ຽວຂ້ອງລົງທໍາລາຍສວນຢາຝິ່ນ, ກັນຊາຢູ່ບ້ານເປົ້າໝາຍ ສາມາດທໍາລາຍສວນກັນຊາ ໄດ້ທັງໝົດ 45 ສວນ ແລະ ທໍາລາຍສວນຢາຝິ່ນ ໄດ້ 86 ສວນ.
ໃນກອງປະຊຸມ ໄດ້ຜ່ານທິດທາງແຜນການຕໍ່ໜ້າເພື່ອເປັນບ່ອນອີງໃນການຈັດຕັ້ງປະຕິບັດ. ພ້ອມກັນນີ້ ບັນດາຜູ້ແທນກອງປະຊຸມ ກໍໄດ້ຂຶ້ນປະກອບຄໍາຄິດເຫັນຕໍ່ບົດສະຫຼຸບ ແລະ ທິດທາງແຜນການໃນຕໍ່ໜ້າຢ່າງກົງໄປກົງມາ ເພື່ອຄວາມເປັນເອກະພາບນໍາໄປຈັດຕັ້ງປະຕິບັດໃຫ້ເຮັດໄດ້ຮັບຜົນດີ.
ໂອກາດດັ່ງກ່າວ, ຍັງໄດ້ປະກາດເລື່ອນຊັ້ນໃຫ້ນາຍ ແລະ ພົນຕໍາຫຼວດ ໃນນີ້້ເລື່ອນຊັ້ນ ວາທີ ຂຶ້ນ ຮຕ 1 ສະຫາຍ, ສິບເອກ ຂຶ້ນ ວາທີ 1 ສະຫາຍ, ສິບຕີ ຂຶ້ນ ສິບໂທ 1 ສະຫາຍ ແລະ ສິບໂທ ຂຶ້ນ ສິບເອກ 9 ສະຫາຍ.