ກອງບັນຊາການ ປກສ ແຂວງສາລະວັນ ໄດ້ຈັດພິທີປະກາດການເລື່ອນຊັ້ນ ແລະ ມອບເງິນອຸດໜູນບໍານານ ໃຫ້ນາຍຕໍາຫຼວດທີ່ຄົບມາດຖານເງື່ອນໄຂ ໃນວັນທີ 4 ມິຖຸນາ 2019, ເປັນປະທານ ແລະ ປະດັບຊັ້ນໂດຍ ພັທ ສີເສີດ ສອນດາລາ ຮັກສາການຫົວໜ້າກອງບັນຊາການ ປກສ ແຂວງສາລະວັນ, ມີ ປກສ 8 ເມືອງ, ບັນດາຫ້ອງອ້ອມຂ້າງ ກອງບັນຊາການ ປກສ ແຂວງ ເຂົ້າຮ່ວມ.
ພັທ ດວງເພັດ ພົມມະຈັນ ຮອງຫົວໜ້າຫ້ອງການເມືອງ ປກສ ແຂວງ ໄດ້ຜ່ານຂໍ້ຕົກລົງ ເລກທີ 928/ປກສ ລົງວັນທີ 22 ພຶດສະພາ 2019 ວ່າດ້ວຍ ການເລື່ອນຊັ້ນໃຫ້ນາຍ ແລະ ພົນຕໍາຫຼວດ ທົ່ວກໍາລັງ ປກສ ແຂວງ ເຊິ່ງມີລາຍລະອຽກການເລື່ອນຊັ້ນ ດັ່ງນີ້:
ພັນຕີ ຂຶ້ນ ພັນໂທ 6 ສະຫາຍ, ຮ້ອຍເອກ ຂຶ້ນ ພັນຕີ 28 ສະຫາຍ ຍິງ 7 ສະຫາຍ, ຮ້ອຍໂທ ຂຶ້ນ ຮ້ອຍເອກ 9 ສະຫາຍ ເຊິ່ງແມ່ນພະນັກງານຜູ້ທີ່ມີຄວາມຫ້າວຫັນດີເດັ່ນ ໃນການປະກອບສ່ວນເຮັດວຽກງານວິຊາສະເພາະ ປກສ ໃນທົ່ວປວງຊົນຮອບດ້ານ ແລະ ຜູ້ທີ່ຄົບມາດຖານເງື່ອນໄຂ ແລະ ຖືກຕ້ອງຕາມລະບຽບກົດໝາຍຂອງ ກໍາລັງ ປກສ ວາງອອກ.
ພ້ອມດຽວກັນນີ້, ທ່ານຮອງຫົວໜ້າຫ້ອງການເມືອງ ປກສ ແຂວງ ໄດ້ຜ່ານຂໍ້ຕົກລົງ ເລກທີ 2157/ປກສ ລົງວັນທີ 21 ພະຈິກ 2018 ວ່າດ້ວຍ ການອະນຸມັດໃຫ້ນາຍຕໍາຫຼວດພັກການຮັບອຸດໜູນບໍານານ ມີທັງໝົດ 4 ສະຫາຍ ຄື: ພັທ ບຸນລອງ ອິນທິລາດ ອະດີດພະນັກງານ ປກສ ແຂວງ, ພັທ ສົມດີ ຄຸນນະຊັບ, ພັທ ສົມສະກຸນ ໂກ່ມແກ້ວມະນີ ທັງສອງທ່ານແມ່ນອະດີດພະນັກງານ ປກສ ເມືອງເລົ່າງາມ, ພັທ ດວງໃຈ ລ້ອມບຸດຕີແສງ ອະດີດພະນັກງານ ປກສ ເມືອງສາລະວັນ ແລະ ໄດ້ມອບເງິນອຸດໜູນລວມທັງໝົດ 114.078.600 ກີບ.
ໂອກາດດຽວກັນ, ທ່ານຮັກສາການຫົວໜ້າກອງບັນຊາການ ປກສ ແຂວງສາລະວັນ ໄດ້ໃຫ້ກຽດໂອ້ລົມພະນັກງານທີ່ໄດ້ຮັບການເລື່ອນຊັ້ນໃໝ່ ໃຫ້ສືບຕໍ່ຈັດຕັ້ງປະຕິບັດວຽກງານວິຊາສະເພາະຂອງຕົນ ໃຫ້ກ້າວໄກໃນລວງເລິ່ກ, ເພີ່ມທະວີໃນການຮັກສາມູນເຊື້ອ, ຄວາມຈົງຮັກພັກດີ, ຄວາມບໍລິສຸດ-ທ່ຽງທໍາ, ຍົກສູງບົດບາດ ແລະ ສະຕິຕໍ່ວຽກງານ ປກສ ຮອບດ້ານ.