ໃນວັນທີ 10 ມິຖຸນາ, ທ່ານ ເຈເຣມີ ຮັນ ລັດຖະມົນຕີກະຊວງການຕ່າງປະເທດ ອັງກິດ ໜຶ່ງໃນຜູ້ສະໝັກຊີງຕຳແໜ່ງຫົວໜ້າພັກອະນຸລັກນິຍົມ ເປີດເຜີຍວ່າ: ນາຍົກລັດຖະມົນຕີ ອັງເກລາ ແມເຄິນ ຂອງເຢຍລະມັນ ເຜີຍວ່າ ສະຫະພາບເອີຣົບ (EU) ພ້ອມເຈລະຈາໃໝ່ເລື່ອງ ອັງກິດ ອອກຈາກ ອີຢູ ຫຼື ເບຣັກຊິດ.
ທ່ານ ຮັນ ໃຫ້ສຳພາດກັບ ສະຖານີໂທລະພາບສະກາຍນິວ ວ່າ:
ໄດ້ໂອ້ລົມກັບ ນາຍົກລັດຖະມົນຕີ ແມເຄິນ ໃນໄລຍະພິທີລຳລຶກ ວັນເລີ່ມປະຕິບັດການປົດປ່ອຍປະເທດທີ່ຖືກນາຊີຢຶດຄອງ ຫຼື ດີເດ ໃນອາທິດຜ່ານມາ ເຊິ່ງ ນາຍົກລັດຖະມົນຕີ ແມເຄິນ ບອກວ່າ ອີຢູ ພ້ອມພິຈາລະນາຂໍ້ສະເໜີທາງອອກຂອງອັງກິດ ຫຼັງຈາກອັງກິດ ມີນາຍົກລັດຖະມົນຕີໃໝ່ ຈຶ່ງເຮັດໃຫ້ ທ່ານ ຮັນ ມີຄວາມໝັ້ນໃຈຫຼາຍວ່າ ຫາກ ອັງກິດ ເລືອກວິທີການທີ່ຖືກຕ້ອງ ອີຢູ ຈະພ້ອມເຈລະຈາເລື່ອງເບຣັກຊິດໃໝ່ແນ່ນອນ.
ທ່ານ ຮັນ ບໍ່ໄດ້ກ່າວຊັດເຈນວ່າ:
ສິ່ງທີ່ ທ່ານ ນາງ ແມເຄິນ ກ່າວເຖິງຄື ຂໍ້ຕົກລົງເງື່ອນໄຂເບຣັກຊິດ ທີ່ ອີຢູ ຢືນຢັນວ່າ ຈະບໍ່ເຈລາຈາໃໝ່ ຫຼື ການປະກາດທາງການເມືອງ ເລື່ອງຄວາມສຳພັນໃນອະນາຄົດທີ່ສາມາດທົບທວນໄດ້ ແຕ່ອ້າງວ່າ ທ່ານ ນາງ ແມເຄິນ ບອກວ່າ ເຢຍລະມັນ ບໍ່ໄດ້ມີຊາຍແດນກັບ ອຽກລັງ ແຕ່ ອັງກິດ ມີ ຈຶ່ງຕ້ອງເປັນຝ່າຍສະເໜີທາງອອກໃນເລື່ອງນີ້ ແລະ ອາດຕ້ອງໃຊ້ເຕັກໂນໂລຊີ ເຂົ້າມາຊ່ວຍ.
ທັ້ງນີ້, ນາຍົກລັດຖະມົນຕີ ເທເຣຊາ ເມ ໄດ້ລາອອກຈາກຕຳແໜ່ງຫົວໜ້າພັກອະນຸລັກນິຍົມ ໃນວັນທີ 7 ມິຖຸນາ ທີ່ຜ່ານມາ ຫຼັງຈາກທີ່ບໍ່ສາມາດເຮັດໃຫ້ ສະພາແຫ່ງຊາດ ລົງມະຕິຄວາມເຫັນດີຂໍ້ຕົກລົງເບຣັກຊິດ ທີ່ໄດ້ຕົກລົງກັບ ອີຢູ ໃນປີຜ່ານມາ ແລະ ເຮັດໃຫ້ຕ້ອງເລື່ອນກຳນົດເບຣັກຊິດ ອອກໄປສອງຄັ້ງ ຈາກວັນທີ 29 ມີນາ ໄປເປັນວັນທີ 31 ຕຸລາ; ຂະນະທີ່ ເລື່ອງຂໍຕົກລົງບໍ່ເຂັ້ມງວດຊາຍແດນອຽກລັງ ທີ່ເປັນສະມາຊິກອີຢູ ກັບ ອຽກລັງເໜືອ ທີ່ເປັນສ່ວນໜຶ່ງຂອງ ຣາຊະອານາຈັກ ຫຼື ທີ່ເອີ້ນວ່າ ແບກສ໌ຕອບ ເປັນເລື່ອງຫຼັກທີ່ຍັງຕົກລົງກັນບໍ່ໄດ້.
ທ່ານ ບໍຣິສ ຈອນສັນ ອະດີດລັດຖະມົນຕີກະຊວງການຕ່າງປະເທດ ອັງກິດ ຕົວເຕັງໃນບັນດາຜູ້ສະໝັກຊີງຕຳແໜ່ງຫົວໜ້າພັກອະນຸລັກນິຍົມ 11 ຄົນ ສົ່ງສັນຍານວ່າຈະຍົກເລີກແບກສ໌ຕອບ ແລະ ຈະບໍ່ອອກຄ່າໃຊ້ຈ່າຍຕ່າງໆ ໃນຖານະສະມາຊິກອີຢູ ຖ້າຫາກອັງກິດ ບໍ່ໄດ້ເງື່ອນໄຂທີ່ດີກວ່າເດີມ.
