ວັນທີ 4 ມິຖຸນາ 2019, ກອງພັນໃຫຍ່ 202 ທີ່ຂຶ້ນກັບ ກອງພົນທີ 2 ໄດ້ຈັດກອງປະຊຸມເຊື່ອມຊຶມເອກະສານວຽກງານຊາວໜຸ່ມ ເປັນປະທານໂດຍ ພັທ ທອງໄຊ ແສງອຸດົມ ຫົວໜ້າການເມືອງ ກອງພັນໃຫຍ່ 202, ມີ ຄະນະບໍລິຫານງານຊາວໜຸ່ມ, ໜ່ວຍຊາວໜຸ່ມຈາກພະແນກການ, ກົມກອງ ພ້ອມດ້ວຍຂະແໜງການທີ່ກ່ຽວຂ້ອງ ເຂົ້າຮ່ວມ.
ພັທ ສີນວນ ແສງເພັດໄຕ້ ຫົວໜ້າພະແນກຊາວໜຸ່ມ ກອງພົນທີ 2 ກ່າວວ່າ:
ເອກະສານທີ່ນຳມາເຊື່ອມຊຶມໃນຄັ້ງນີ້ ມີຂໍ້ກຳນົດຂອງ ຄະນະປະຈຳພັກ ກະຊວງປ້ອງກັນປະເທດ ກ່ຽວກັບ ວຽກງານຊາວໜຸ່ມ ໃນທົ່ວກອງທັບ, ບົດບາດປະຈັນບານຂອງຊາວໜຸ່ມກອງທັບ ຕໍ່ພາລະກິດປະຕິວັດຂອງພັກ ໃນໄລຍະໃໝ່, ການຈັດຕັ້ງໂຄສະນາກວດກາ ແລະ ຊຸກຍູ້ຂະບວນການຊາວໜຸ່ມ ໃນຖັນແຖວກອງທັບປະຊາຊົນລາວ, ການຈັດຕັ້ງສ້າງຂະບວນການຂອງຊາວໜຸ່ມ ຢູ່ບັນດາກົມກອງຮາກຖານ ໃນຖັນແຖວກອງທັບ, ຮ່າງບົດສະຫຼຸບການເຄື່ອນໄຫວວຽກງານຂະບວນການ ແລະ ການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມ ແຕ່ລະສົກປີ ແລະ ທິດທາງແຜນການ, ບາງບັນຫາກ່ຽວກັບການຕ້ານ ແລະ ສະກັດກັ້ນປະກົດການຫຍໍ້ທໍ້ ແລະ ບັນຫາຢາເສບຕິດ ໃນຖັນແຖວຊາວໜຸ່ມ-ໄວໜຸ່ມກອງທັບ, ແຜນວາດ ແລະ ລາຍການດຳເນີນກອງປະຊຸມຜູ້ແທນຊາວໜຸ່ມ ແລະ ກອງປະຊຸມໃຫຍ່ຊາວໝຸ່ມຂັ້ນຮາກຖານ, ຮ່າງບົດສະຫຼຸບສະຖິຕິຊາວໜຸ່ມ ປະຈຳ 6 ເດືອນ, ການວາງແຜນການ ແລະ ການສະຫຼຸບການຈັດຕັ້ງປະຕິບັດແຜນການວຽກງານຊາວໜຸ່ມ ໃນກອງທັບປະຊາຊົນລາວ, ເອກະສານທາງການ, ກົນໄກປະສານງານຂອງຄະນະຊາວໜຸ່ມແຕ່ລະຂັ້ນ ໃນກອງທັບ, ແຈ້ງການແນະນໍາ, ຄຳສັ່ງແນະນຳຂອງ ກົມໃຫຍ່ການເມືອງກອງທັບ ແລະ ອົງປະກອບເອກະສານບໍລິຫານທົ່ວໄປ.
ໃນໂອກາດນີ້, ພັທ ທອງໄຊ ແສງອຸດົມ ໄດ້ຍົກໃຫ້ເຫັນພາລະບົດບາດ ແລະ ຄວາມຈຳເປັນຂອງວຽກງານຊາວໜຸ່ມ ທີ່ມີການເຕີບໃຫຍ່ຂະຫຍາຍຕົວ ແລະ ປ່ຽນແປງໄປຕາມແນວທາງຂອງພັກ ໃນໄລຍະໃໝ່; ພ້ອມທັງຮຽກຮ້ອງໃຫ້ຄະນະນຳ, ພະນັກງານບັນຊາ, ຂະແໜງການ ຜູ້ທີ່ເຮັດວຽກງານຊາວໜຸ່ມ ແຕ່ລະສະຫາຍ ຈົ່ງກຳແໜ້ນບັນຫາພື້ນຖານກ່ຽວກັບຫຼັກການຈັດຕັ້ງ, ນຳພາ, ຊີ້ນຳວຽກງານຊາວໜຸ່ມ ແລະ ຄວາມຮັບຜິດຊອບຂອງຕົນ, ເພື່ອເຄື່ອນໄຫວໃຫ້ຖືກຕ້ອງຕາມພາລະບົດບາດທີ່ໄດ້ຮັບການມອບໝາຍ, ບົນພື້ນຖານຕ້ອງຍົກສູງຄວາມຮັບຜິດຊອບຖືເອົາ, ການສຶກສາອົບຮົມການເມືອງ-ນຳພາແນວຄິດ ເປັນກົກ, ເອົາໃຈໃສ່ໃນການຊອກຮູ້ຮ່ຳຮຽນ, ຝຶກຝົນຫຼ່ໍຫຼອມຕົນເອງ, ເປັນແບບຢ່າງເຂົ້າໃນທຸກໜ້າທີ່ວຽກງານ, ນຳພາເຄື່ອນໄຫວໃນການປະຕິບັດຂໍ້ກຳນົດ, ກົດລະບຽບຕ່າງໆຂອງວຽກງານຂະບວນການຊາວໜຸ່ມ ໃຫ້ແຂງແຮງ, ເພື່ອຕິດແໜ້ນກັບຂະບວນການກໍ່ສ້າງ ກົມກອງປອດໃສ, ເຂັ້ມແຂງ, ໜັກແໜ້ນ, ປອດໄພ, ປອດຄະດີ ແລະ ຂະບວນການກໍ່ສ້າງ ກົມກອງວັດທະນະທຳ ໃນຕໍ່ໜ້າ ໃຫ້ໄດ້ຮັບໝາກຜົນ ແລະ ປະກົດຜົນເປັນຈິງ.