ໃນວັນທີ 13 ມິຖຸນາ, ສຳນັກຂ່າວ ເດລີເມ ລາຍງານສະຖານະການ ການແຜ່ລະບາດຂອງພະຍາດ ໃນລັດພິຫາ ທາງພາກຕາເວັນອອກສຽງເໜືອຂອງປະເທດອິນເດຍ ຫຼັງຈາກພົບເດັກນ້ອຍປ່ວຍເປັນ ພະຍາດສະໝອງອັກເສບກະທັນຫັນ (AES) ແລະ ເສຍຊີວິດແລ້ວຢ່າງໜ້ອຍ 53 ຄົນ ໃນໄລຍະເວລາພຽງ 10 ມື້ ທີ່ຜ່ານມາ.
ດ້ານທາງການທ້ອງຖິ່ນ ລະບຸວ່າ:
ເດັກນ້ອຍອາດໄດ້ຮັບພິດຈາກໝາກລິ້ນຈີ ໝາກໄມ້ຍອດນິຍົມຂອງທ້ອງຖິ່ນ ແລະ ມີການປູກຢ່າງກວ້າງຂວາງ, ພ້ອມທັງປະກາດເຕືອນໃຫ້ຜູ້ປົກຄອງ ເຝົ້າເບິ່ງແຍງລູກຢ່າງໃກ້ຊິດ ແລະ ຫຼີກລ່ຽງການບໍລິໂພກໝາກລິ້ນຈີ ໃນໄລຍະນີ້.
ທ່ານ ອະໂສກ ກຸມານ ຊິງ ເຈົ້າໜ້າທີ່ອາວຸໂສ ດ້ານສາທາລະນະສຸກ ປະຈຳລັດພິຫາ ເປີດເຜີຍວ່າ:
ພົບເດັກນ້ອຍເກືອບ 100 ຄົນ ໃນເຂດມູຊັບຟາປຸຣະ ປ່ວຍເປັນພະຍາດສະໝອງອັກເສບກະທັນຫັນ ໂດຍຜູ້ປ່ວຍມີລະດັບນໍ້າຕານໃນເລືອດຕໍ່າລົງ ຢ່າງໄວວາ ຈົນເຂົ້າສູ່ພາວະວິກິດ ພ້ອມນັ້ນຍັງມີພາວະສະໝອງບວມ, ເກີດອາການຊັກ, ໝົດສະຕິ ແລະ ໃນບາງຄົນຮຸນແຮງເຖິງຂັ້ນເສຍຊີວິດ.
ເບື້ອງຕົ້ນມີລາຍງານ ການເສຍຊີວິດຂອງເດັກທີ່ປ່ວຍດ້ວຍ ພະຍາດສະໝອງອັກເສບ ແລ້ວ 53 ຄົນ ເປັນຜູ້ປ່ວຍຈາກໂຮງໝໍ 2 ແຫ່ງ ແລະ ອີກຫຼາຍກວ່າ 40 ຄົນ ຍັງພັກປິ່ນປົວຢູ່ທີ່ໂຮງໝໍ.
ທັ້ງນີ້, ເຂດມູຊັບຟາປຸຣະ ແລະ ພື້ນທີ່ໃກ້ຄຽງ ມັກປະເຊີນກັບການແຜ່ລະບາດຂອງພະຍາດດັ່ງກ່າວ ໃນໄລຍະລະດູຮ້ອນຂອງທຸກໆປີ ນັບຕັ້ງແຕ່ປີ 1995 ໂດຍທ້ອງຖິ່ນເອີ້ນວ່າ ພະຍາດສຳກິພຸຂາ ທີ່ມີຈຳນວນຜູ້ເສຍຊີວິດຫຼາຍເປັນປະຫວັດສາດເຖິງ 150 ຄົນ ໃນປີ 2014.
