ກອງບັນຊາການ ປກສ ແຂວງບໍລິຄຳໄຊ ໄດ້ເປີດກອງປະຊຸມສ່ອງແສງວຽກງານພັກ-ວຽກງານການເມືອງ 3 ເດືອນ ໄຕມາດ II ປະຈໍາເຂດ 4 ໃນວັນທີ 10 ມິຖຸນາ 2019, ເປັນປະທານໂດຍ ພົຈວ ບຸນມີ ແສງຄໍາຢອງ ຫົວໜ້າກົມໃຫຍ່ສັນຕິບານ ກະຊວງ ປກສ, ມີຜູ້ແທນຈາກ 4 ກົມໃຫຍ່ ອ້ອມຂ້າງ ກະຊວງ ປກສ, ປກສ ແຂວງສະຫວັນນະເຂດ, ປກສ ແຂວງຄໍາມ່ວນ, ປກສ ແຂວງບໍລິຄໍາໄຊ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມຄັ້ງນີ້ ບັນດາຜູ້ແທນ ໄດ້ພ້ອມກັນຕີລາຄາຄືນສະພາບປະກົດການຫຍໍ້ທໍ້ຕ່າງໆ ທີ່ເກີດ ຂຶ້ນພາຍໃນສັງຄົມ ກໍຄືໃນກໍາລັງປ້ອງກັນຄວາມສະຫງົບ ແລະ ຕີລາຄາຄືນການຈັດຕັ້ງປະຕິບັດວຽກງານພັກ-ວຽກງານການເມືອງ ໄລຍະ 3 ເດືອນຜ່ານມາ ແລະ ແຜນການໃນ 3 ເດືອນຕໍ່ໜ້າ, ການແລກປ່ຽນປະກັບຄໍາຄິດຄໍາເຫັນຂອງ ຜູ້ແທນກອງປະຊຸມຄະນະບັນຊາແຕ່ລະຂັ້ນ, ເປັນເອກະພາບຕໍ່ກັບການເຄື່ອນວຽກງານພັກ-ວຽກງານການເມືອງ, ເປັນການຍົກສູງຄວາມຮັບຜິດຊອບ ໃນການຈັດຕັ້ງປະຕິບັດທິດທາງແຜນການໃຫ້ແທດເຖິງຕົວຈິງ, ແນໃສ່ເສີມຂະຫຍາຍດ້ານຕັ້ງໜ້າ, ແກ້ໄຂຈຸດອ່ອນ, ຂໍ້ຄົງຄ້າງ, ປະກົດການຫຍໍ້ທໍ້ຕ່າງໆໃຫ້ມີການຫັນປ່ຽນຢ່າງຕັ້ງໜ້າ ເພື່ອຍູ້ແຮງຂະບວນການເຄື່ອນໄຫວວຽກງານ ແລະ ເພີ່ມທະວີຄວາມຮັບຜິດຊອບຂອງຄະນະພັກແຕ່ລະຂັ້ນ ໃນການເຮັດວຽກງານກໍ່ສ້າງພັກ ແລະ ກໍ່ສ້າງພະນັກງານໃຫ້ບັນລຸຕາມແຜນການທີ່ວາງໄວ້.
ພົຈວ ບຸນມີ ແສງຄໍາຢອງ ໄດ້ຊີ້ນຳໃຫ້ຄະນະພັກ ເພີ່ມທະວີວຽກງານກໍ່ສ້າງພັກທາງດ້ານການເມືອງ-ແນວຄິດ ແລະ ການຈັດຕັ້ງຢ່າງໜັກແໜ້ນ, ເອົາໃຈໃສ່ປັບປຸງຮູບການ, ວິທີການໂຄສະນາສຶກສາອົບຮົມແນວທາງນະໂຍບາຍຂອງພັກ, ກົດໝາຍຂອງລັດ ເພື່ອຍົກສູງລະດັບຄວາມຮູ້ໃຫ້ສົມຄູ່ກັບໜ້າທີ່ຄວາມຮັບຜິດຊອບຄະນະພັກ, ສະມາຊິກພັກ, ສືບຕໍ່ປັບປຸງກົງຈັກການຈັດຕັ້ງຂັ້ນຕ່າງໆໃຫ້ໜັກແໜ້ນເຂັ້ມແຂງ, ສາມາດເຮັດລ້ອນໜ້າທີ່, ມີການກຳນົດຕຳແໜ່ງງານໃຫ້ລະອຽດຈະແຈ້ງ, ກຳນົດພາລະບົດບາດ-ໜ້າທີ່ໃຫ້ຄົບຖ້ວນ, ການບໍາລຸງສ້າງ ຕ້ອງຮັບປະກັນລັກສະນະຊົນຊັ້ນຂອງພັກ ເພື່ອຮັບປະກັນບໍ່ໃຫ້ພວກບໍ່ດີສວຍໃຊ້, ຕ້ອງເອົາໃຈໃສ່ບຳລຸງສ້າງ ແລະ ກໍານົດພະນັກງານທັງ 3 ຮຸ່ນ ຄື: ຮຸ່ນໜຸ່ມ, ຮຸ່ນກາງ, ຮຸ່ນອາວຸໂສ ເພື່ອຮັບປະກັນໃຫ້ແກ່ລັກສະນະສືບທອດປ່ຽນແທນ, ເອົາໃຈໃສ່ສ້າງພະນັກງານຊົນເຜົ່າ ແລະ ເພດຍິງໃຫ້ເໝາະສົມ, ສືບຕໍ່ປະຕິບັດນະໂຍບາຍດ້ານຕ່າງໆຕໍ່ພະນັກງານ ໃຫ້ມີການຫັນປ່ຽນຢ່າງຕັ້ງໜ້າ, ກ່ອນອື່ນໝົດຕ້ອງຮີບຮ້ອນຄົ້ນຄວ້າສ້າງນິຕິກໍາເພື່ອກໍານົດລະບຽບການ, ມາດຖານເງື່ອນໄຂ ເພື່ອເປັນບ່ອນອີງໃຫ້ແກ່ການຄົ້ນຄວ້າ ແລະ ປະຕິບັດນະໂຍບາຍຢ່າງຖືກຕ້ອງເໝາະສົມ ເຊັ່ນ: ລະບຽບການຄົ້ນຄວ້າການຍ້ອງຍໍ ແລະ ການປະຕິບັດວິໄນດ້ານຕ່າງໆ.