ກອງກໍ່ສ້າງຮາກຖານ ເຂດຈຸມສຸມໃຈກາງ ຂອງແຂວງບໍລິຄໍາໄຊ ໄດ້ສະຫຼຸບການປະຕິບັດວຽກງານກໍ່ສ້າງຮາກຖານການເມືອງ ເຂດຈຸດສຸມໃຈກາງ ທີ່ບ້ານຜາເມືອງ ເມືອງບໍລິຄັນ ໃນວັນທີ 10 ມິຖຸນາ 2019, ເປັນປະທານໂດຍ ທ່ານ ປອ ກອງແກ້ວ ໄຊສົງຄາມ ເຈົ້າແຂວງໆບໍລິຄໍາໄຊ ທັງເປັນ ປະທານປ້ອງກັນຊາດ-ປ້ອງກັນຄວາມສະຫງົບ ແຂວງ, ເຂົ້າຮ່ວມໂດຍ ພົຈວ ບຸນມີ ແສງຄໍາຢອງ ຫົວໜ້າກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ, ທ່ານ ບຸນມາ ບຸຈະເລີນ ຫົວໜ້າຄະນະຮັບຜິດຊອບຊີ້ນໍາວຽກງານຈຸດສຸມໃຈກາງ ຂັ້ນແຂວງ, ມີ ຫົວໜ້າກອງບັນຊາການ ປກສ ແຂວງ, ເຈົ້າເມືອງ, ກໍາລັງປ້ອງກັນຊາດ-ປ້ອງກັນຄວາມສະຫງົບ, ອໍານາດການປົກຄອງບ້ານ ແລະ ປກສ ບ້ານ ເຂົ້າຮ່ວມ.
ພັທ ຜາຂົງ ດອກມະນີຈັນ ຫົວໜ້າກອງເລຂາ ຄະນະຊີ້ນໍາວຽກງານກໍ່ສ້າງຮາກຖານ ປກສ ແຂວງ ກ່າວວ່າ:
ຜ່ານມາ, ຄະນະຮັບຜິດຊອບ ໄດ້ລົງເຜີຍແຜ່ລະບຽບກົດໝາຍ, ຄໍາສັ່ງຂອງຂັ້ນເທິງໃຫ້ພໍ່ແມ່ປະຊາຊົນ ໄດ້ສໍາເລັດ 5 ຄຸ້ມບ້ານ, ເກັບກໍາສະຖິຕິພົນລະເມືອງ ບ້ານຜາເມືອງ ມີ 70 ໜ່ວຍ, ມີ 1.085 ຄອບຄົວ, ຈໍານວນພົນ 7.810 ຄົນ ຍິງ 3.814 ຄົນ, ຂຶ້ນສໍາມະໂນຄົວແລ້ວ 993 ຄອບຄົວ ແລະ ຍັງບໍ່ທັນຂຶ້ນສໍາມະໂນຄົວ 65 ຄອບຄົວ; ພ້ອມທັງສາມາດຄັດຈ້ອນບັນດາພາກສ່ວນ ທີ່ຕິດພັນກັບ ປະກົດການຫຍໍ້ທໍ້, ເຊິ່ງໃນນັ້ນ ຄ້າ-ຂາຍ ແລະ ເສບຢາເສບຕິດ ມີ 155 ຄົນ ຍິງ 3 ຄົນ, ນັກເລງອັນຕະພານ, ລັກຊັບພົນລະເມືອງ, ອາລະວາດຕີກັນ ມີ 7 ຄົນ, ຍົກຍ້າຍຖິ່ນຖານມາບໍ່ຖືກຕ້ອງ 70 ຄອບຄົວ, ເຄື່ອນໄຫວທາງສາສະໜາ 35 ຄອບຄົວ, ຖາງປ່າຊະຊາຍ ແລະ ຈັບຈອງທີ່ດິນບໍ່ຖືກຕ້ອງ 17 ຄອບຄົວ.
ນອກຈາກນີ້, ຍັງສາມາດກັກຕົວຜູ້ຖືກສົງໄສໄດ້ທັງໝົດ 47 ຄົນ ຍິງ 5 ຄົນ, ດໍາເນີນຄະດີ 40 ຄົນ ຍິງ 5 ຄົນ, ສຶກສາອົບຮົມປ່ອຍຕົວ 7 ຄົນ, ຢຶດຂອງກາງ ປະເພດຢາບ້າໄດ້ 2.832 ເມັດ, ກັນຊາແຫ້ງ 1 ຫໍ່, ອຸປະກອນສູບຝິ່ນ 2 ຊຸດ, ທາດແຕກ 3 ແທ່ງ, ໝາກຝ້າ 68 ໜ່ວຍ, ປືນ 25 ກະບອກ, ຈັກສະຕິ່ນ 4 ເຄື່ອງ, ໝໍ້ຊ້ອດປາ 3 ເຄື່ອງ, ລົດຈັກ 2 ຄັນ, ລົດໃຫຍ່ 1 ຄັນ, ໂທລະສັບ 5 ເຄື່ອງ, ເງິນກີບ 95.768.000 ກີບ, ເງິນດົງ 1.710.000 ດົງ, ເງິນກີບປອມ ໃບລະໜຶ່ງແສນກີບ 33 ໃບ.
ຈາກນັ້ນ, ກອງກໍ່ສ້າງຮາກຖານ ຍັງໄດ້ປະກອບສ່ວນມອບໂທລະໂຄ່ງໃຫ້ບ້ານຜາເມືອງ ມູນຄ່າ 7.900.000 ກີບ, ຄອມພິວເຕີ 2 ຊຸດ ມູນຄ່າ 11.000.000 ກີບ, ຕູ້ນໍ້າເຢັນ, ໂຕະ-ຕັ່ງ ໃຫ້ ປກສ ກຸ່ມ 3 ບ້ານຜາເມືອງ ມູນຄ່າ 6.000.000 ກີບ, ລະດົມທຶນສົມທົບກໍ່ສ້າງທາງປູຢາງ ພ້ອມ ທັງຕິດປ້າຍ 1 ເສັ້ນ ມູນຄ່າ 153.620.890 ກີບ, ອອກແຮງງານລວມ ໄດ້ 3 ຄັ້ງ, ມີຜູ້ເຂົ້າຮ່ວມ 2.400 ຄົນ ຍິງ 1.024 ຄົນ, ໄດ້ຮັບການຊ່ວຍເຫຼືອຈາກບຸກຄົນ, ບໍລິສັດ, ຫ້າງຮ້ານຈໍານວນ 10.580.000 ກີບ. ນອກນີ້, ຍັງໄດ້ວາງແຜນສືບຕໍ່ໃນ 9 ບ້ານ ພາຍໃນ 4 ຕົວເມືອງ ຄື: ເມືອງບໍລິຄັນ, ປາກກະດິງ, ຄໍາເກີດ ແລະ ວຽງທອງ ໃຫ້ສໍາເລັດຕາມແຜນການ.
ໂອກາດດຽວກັນ, ຍັງໄດ້ມອບໃບກຽດຕິຄຸນໃຫ້ 2 ບໍລິສັດ ທີ່ປະກອບສ່ວນທາງດ້ານວັດຖຸ ແລະ ທຶນຮອນ ໃນການກໍ່ສ້າງທາງປູຢາງ ເຂົ້າຫາສະໂມສອນບ້ານ ແລະ ມອບໃບຍ້ອງຍໍໃຫ້ພະນັກງານທີ່ມີຜົນງານດີເດັ່ນ ຈໍານວນ 57 ທ່ານ. ພ້ອມດຽວກັນນັ້ນ, ພົຈວ ບຸນມີ ແສງຄໍາຢອງ ຍັງໄດ້ມອບໂທລະພາບ ຊໍາຊຸງ 32 ນິ້ວ ເພື່ອເປັນທີ່ລະນຶກໃຫ້ອໍານາດການປົກຄອງ ບ້ານຜາໃດ ແລະ ທ່ານປະທານຍັງໄດ້ໃຫ້ທິດຊີ້ນໍາໃນບາງດ້ານ ພ້ອມທັງເຂົ້າຮ່ວມເປີດປ້າຍນໍາໃຊ້ເສັ້ນທາງມິດຕະພາບ ກອງກໍ່ສ້າງຮາກຖານ ຢູ່ບ້ານຜາເມືອງ ຕື່ມອີກ.