ຫ້ອງຕຳຫຼວດ ປກສ ແຂວງຫົວພັນ ໄດ້ຈັດພິທີເຜີຍແຜ່ເຊື່ອມຊຶມ ຂໍ້ຕົກລົງ ວ່າດ້ວຍ ຂໍ້ຫ້າມຕໍ່ ນາຍ ແລະ ພົນຕຳຫຼວດ ຂອງ ກຳລັງປ້ອງກັນຄວາມສະຫງົບ ແລະ ຄຳສັ່ງ ວ່າດ້ວຍ ການນຳໃຊ້ສື່ສັງຄົມອອນລາຍ ໃນກຳລັງປ້ອງກັນຄວາມສະຫງົບ ໃນວັນທີ 26 ມິຖຸນາ 2019, ເຜີຍແຜ່ໂດຍ ພັທ ຄຳແພງ ແກ້ວມູນທອງ ຫົວໜ້າຫ້ອງຕຳຫຼວດ ປກສ ແຂວງຫົວພັນ, ມີ ບັນດາຫົວໜ້າຫ້ອງ – ຮອງຫ້ອງ, ຫົວໜ້າພະແນກ – ຮອງພະແນກ ຕະຫຼອດຮອດ ພະນັກງານ – ນັກຮົບ ພາຍໃນ ຫ້ອງຕຳຫຼວດ ເຂົ້າຮ່ວມ.
ເອກະສານຂໍ້ຕົກລົງ ວ່າດ້ວຍ ຂໍ້ຫ້າມຕໍ່ນາຍ ແລະ ພົນຕຳຫຼວດ ຂອງ ລັດຖະມົນຕີ ກະຊວງປ້ອງກັນຄວາມສະຫງົບ ສະບັບເລກທີ 564/ປກສ ລົງວັນທີ 3 ເມສາ 2019 ປະກອບມີ 6 ໝວດ 21 ມາດຕາ, ໃນນັ້ນ ໄດ້ຍົກໃຫ້ເຫັນກ່ຽວກັບ ການກຳນົດຫຼັກການ, ລະບຽບການ, ຂໍ້ຫ້າມ ແລະ ມາດຕະການຕໍ່ນາຍ ແລະ ພົນຕຳຫຼວດ, ມີທັງຂໍ້ຫ້າມລວມ ແລະ ຂໍ້ຫ້າມສະເພາະ ໃນຂົງເຂດການເມືອງ, ຂົງເຂດວຽກງານປ້ອງກັນຄວາມສະຫງົບ ທາງດ້ານການເມືອງ, ຂົງເຂດຄວາມເປັນລະບຽບຮຽບຮ້ອຍ ໃນສັງຄົມ, ຂົງເຂດພະລາທິການ, ຂົງເຂດເສນາທິການ ແລະ ບໍລິຫານຮັບໃຊ້.
ເອກະສານຄຳສັ່ງຂອງ ກະຊວງປ້ອງກັນຄວາມສະຫງົບ ສະບັບເລກທີ 583/ປກສ ລົງວັນທີ 3 ເມສາ 2019 ວ່າດ້ວຍ ການນໍາໃຊ້ສື່ສັງຄົມອອນລາຍ ໃນກໍາລັງປ້ອງກັນຄວາມສະຫງົບ ໄດ້ກຳນົດລະບຽບຫຼັກການ ແລະ ມາດຕະການ ໃນການຄຸ້ມຄອງ ການນຳໃຊ້ສື່ສັງຄົມອອນລາຍ ປະເພດຕ່າງໆ, ແນໃສ່ສ້າງ ຄວາມເປັນລະບຽບຮຽບຮ້ອຍ ໃນສັງຄົມ ແລະ ປົກປ້ອງບົດບາດກຽດສັກສີຂອງ ກຳລັງປ້ອງກັນຄວາມສະຫງົບ ໃນສະເພາະໜ້າ ແລະ ຍາວນານ, ເຊິ່ງໄດ້ລະບຸໄວ້ ວ່າ:
ຫ້າມ ນາຍ ແລະ ພົນຕຳຫຼວດ ຕົວະຍົວະຫຼອກລວງ, ໂຄສະນາບິດເບືອນ, ໃສ່ຮ້າຍປ້າຍສີ, ສ້າງຄວາມປັ່ນປ່ວນ, ສ້າງຄວາມຂັດແຍ່ງ ທີ່ກໍ່ໃຫ້ເກີດ ຄວາມເສຍຫາຍ ຕໍ່ບົດບາດຂອງ ກຳລັງປ້ອງກັນຄວາມສະຫງົບ, ຫ້າມຖ່າຍຮູບນຸ່ງເຄື່ອງແບບ ແລະ ຕິດຊັ້ນ – ປະກອບອາວຸດເຕັກນິກຕ່າງໆ ໂພດລົງສື່ອອນລາຍ.
ຈຸດປະສົງຂອງ ການເຜີຍແຜ່ເຊື່ອມຊຶມຄັ້ງນີ້ ກໍເພື່ອເຮັດໃຫ້ ນາຍ ແລະ ພົນຕຳຫຼວດ ໄດ້ຍົກສູງ ຄວາມຮັບຜິດຊອບ ຕໍ່ໜ້າທີ່ການເມືອງ, ສ້າງຄວາມເປັນເອກະພາບ ໃນການຈັດຕັ້ງສະກັດກັ້ນ ແລະ ແກ້ໄຂ ປະກົດການຫຍໍ້ທໍ້ ໃນກຳລັງ ປ້ອງກັນຄວາມສະຫງົບ ປະຊາຊົນ, ແນໃສ່ຫຼຸດຜ່ອນ ຫາງສຽງວິພາກວິຈານຂອງ ສັງຄົມ, ເຮັດໃຫ້ ກຳລັງ ມີຄວາມປອດໃສ, ເຂັ້ມແຂງ, ໜັກແໜ້ນ, ມີແບບແຜນ ທີ່ທັນສະໄໝ, ມີຈັນຍາບັນ – ຈັນຍາທຳ, ມີລະບຽບວິໄນ ເຂັ້ມງວດ ສົມເປັນ ກຳລັງປະກອບອາວຸດ ປະຕິວັດ ທີ່ມີຄວາມຈົງຮັກພັກດີຕໍ່ ພັກ – ລັດ, ປະເທດຊາດ ແລະ ປະຊາຊົນ ເພື່ອໃຫ້ສອດຄ່ອງຕໍ່ ແນວທາງນະໂຍບາຍຂອງ ພັກ – ລັດຖະທຳມະນູນ, ກົດໝາຍ ແລະ ລະບຽບການ, ປະຕິບັດ ຫຼັກການລວມສູນ ປະຊາທິປະໄຕ, ພິຈາລະນາແກ້ໄຂ ເປັນໝູ່ຄະນະ, ຖືເອົາ ກອງປະຊຸມ ຄະນະກຳມະການ ພິຈາລະນາວິໄນ ເປັນຕົ້ນ ການໃຊ້ມາດຕະການຕໍ່ ຜູ້ລະເມີດ, ປະຕິບັດ ລະບອບການກວດກາ ແລະ ປ້ອງກັນກຳລັງ ພາຍໃຕ້ ການຊີ້ນຳໂດຍກົງຂອງ ຄະນະພັກ – ຄະນະບັນຊາ ແຕ່ລະຂັ້ນ ຢ່າງເຂັ້ມງວດ ແລະ ຮັບປະກັນ ຄວາມວ່ອງໄວທັນການ, ເຂັ້ມງວດ, ໂປ່ງໃສ, ພາວະວິໄສ ແລະ ຍຸຕິທຳ.
