ໃນວັນທີ 4 ກໍລະກົດ, ສຳນັກຂ່າວ ເດລີເມວ ລາຍງານວ່າ: ສະຖາບັນ ທໍລະນີ ຟີຊິກ ແລະ ພູໄຟ ແຫ່ງຊາດຂອງ ອີຕາລີ ຖະແຫຼງການວ່າ ໃນເວລາ 16:51 ໂມງ ຂອງວັນທີ 3 ກໍລະກົດ ທີ່ຜ່ານມາ ຕາມເວລາທ້ອງຖິ່ນ ໄດ້ເກີດເຫດພູໄຟ ເທິງເກາະສະຕຣອມໂບລີ ໃນທະເລເມດີແຕເຣນຽນ ນອກຝັ່ງທາງພາກເໜືອຂອງ ຊິຊີລີ ເກີດລະເບີດຂຶ້ນ ແລ້ວພົ່ນແມກມາ ແລະ ເຖົ້າຖ່ານຈຳນວນຫຼາຍ ອອກມາ.
ເຫດພູໄຟລະເບີດດັ່ງກ່າວ ເຮັດໃຫ້ມີຜູ້ເສຍຊີວິດແລ້ວ ຢ່າງໜ້ອຍ 1 ຄົນ, ເບື້ອງຕົ້ນ ຮູ້ວ່າ: ເປັນນັກທ່ອງທ່ຽວ ຖືກຫີນພູໄຟທີ່ລະເບີດ ຕົກໃສ່ຂະນະກຳລັງຍ່າງປ່າ, ສ່ວນນັກທ່ອງທ່ຽວອີກຄົນ ບາດເຈັບ ແລະ ໄດ້ຮັບການຊ່ວຍເຫຼືອແລ້ວ.
ທາງດ້ານ ສຳນັກຂ່າວ ອັນຊາ ຂອງອີຕາລີ ລະບຸວ່າ:
ມີນັກທ່ອງທ່ຽວ ປະມານ 30 ຄົນ ເທິງເກາະສະຕຣອມໂບລີ ພາກັນໂດດລົງທະເລ ເພື່ອໜີເຖົ້າຖ່ານທີ່ປ່ອຍອອກມາ ຢ່າງຮຸນແຮງ. ນອກຈາກນີ້, ມີນັກທ່ອງທ່ຽວ ເຊິ່ງຢູ່ຫ່າງຈາກພູໄຟ ປະມານ 27 ກິໂລແມັດ ໃຫ້ສຳພາດວ່າ ໄດ້ຍິນສຽງລະເບີດ ດັງແຮງຫຼາຍ, ສົ່ງຜົນໃຫ້ຫຼາຍຄົນຢ້ານກົວ ກ່ອນທີ່ຈະຮູ້ພາຍຫຼັງວ່າ ເປັນພູໄຟລະເບີດ.
