ໜຶ່ງໃນບັ້ນການຕໍ່ສູ້ມ້າງລາຍຄະດີ ຂອງ ກຳລັງຕຳຫຼວດ ກອງບັນຊາການຕຳຫຼວດ ນະຄອນໂຮ່ຈິມິນ ທີ່ໄດ້ປະຕິບັດຜ່ານມານັ້ນ ແມ່ນ ການປະສານສົມທົບຮ່ວມກັບ ກົມຕຳຫຼວດອາຍາ ຂອງ ກະຊວງຕຳຫຼວດ ສາມາດມ້າງໄດ້ຄະດີຢາເສບຕິດລາຍໃຫຍ່ໄດ້ ໃນວັນທີ 30 ມີນາ 2019 ຜ່ານມາ ແລະ ກວດຢຶດຂອງກາງຢາເສບຕິດ ປະເພດຢາໄອສ໌ 300 ກິໂລກຼາມ.
ພົຈວ ຟາມວັນກາກ ຫົວໜ້າກົມຕຳຫຼວດສືບສວນ – ສອບສວນ ກ່ຽວກັບ ຄະດີຢາເສບຕິດ ກະຊວງຕຳຫຼວດ ໃຫ້ຮູ້ວ່າ:
ພວກເຮົາໄດ້ຄັດເລືອກເອົາ ພະນັກງານຕຳຫຼວດອາຍາພິເສດ ຈາກ ຫ້ອງຕຳຫຼວດອາຍາ ກອງບັນຊາການຕຳຫຼວດ ນະຄອນໂຮ່ຈິມິນ ເພື່ອສົມທົບກັບກຳລັງຈາກກົມ ລົງມ້າງລາຍຄະດີຢາເສບຕິດລາຍໃຫຍ່ຄັ້ງນີ້ ເພາະພະນັກງານທີ່ຄັດເລືອກມານັ້ນ ລ້ວນແຕ່ແມ່ນ ພະນັກງານທີ່ມີຄວາມຊຳນານ ແລະ ລື້ງເຄີຍກັບ ວຽກງານການປາບປາມຢາເສບຕິດ, ມີຄວາມຮັບຜິດຊອບສູງ ແລະ ເຮັດສຳເລັດທຸກວຽກ ທີ່ການຈັດຕັ້ງມອບໝາຍໃຫ້.
ພັທ ຫງວຽນດັງນາມ ຫົວໜ້າຫ້ອງ ຕຳຫຼວດອາຍາ ກອງບັນຊາການຕຳຫຼວດ ນະຄອນໂຮ່ຈິມິນ ໄດ້ຖະແຫຼງການ ວ່າ: ເພື່ອຄວາມສະຫງົບ ແລະ ເປັນການປົກປ້ອງປະຊາຊົນ ເຖິງຈະລຳບາກພຽງໃດ ພວກຕົນກໍຈະປະຕິບັດ.
ກຳລັງຕຳຫຼວດອາຍາ ກອງບັນຊາການຕຳຫຼວດ ນະຄອນໂຮ່ຈິມິນ ໄດ້ເຂົ້າຮ່ວມ ການມ້າງລາຍຄະດີລາຍໃຫຍ່ນີ້ ແລະ ອີກຫຼາຍກໍລະນີທີ່ເກີດຂຶ້ນ ໃນຂົງເຂດທ້ອງຖິ່ນທີ່ຮັບຜິດຊອບ; ໂດຍສະເພາະແມ່ນ ຄະດີທີ່ກ່າວມາຂ້າງເທິງ. ເຊິ່ງຜູ້ຄ້າຂາຍລາຍນີ້ ໄດ້ນຳໃຊ້ລົດຍົນຍີ່ຫໍ້ ເມີຊີເດັດ ເບັນ ສີເຫຼືອງ ໝາຍເລກທະບຽນ BKS 68A-104.74 ແລະ ສັງເກດເຫັນວ່າ ມີພຶດຕິກຳໜ້າສົງໄສ;
ໂດຍຢູ່ໃນລົດຄັນດັ່ງກ່າວ ມີ 3 ເປົ້າໝາຍ ຄື:
- ທ້າວ ວູຈ້ອງເຫງຍ ເກີດປີ 1995 ຢູ່ແຂວງຫາຍຟ່ອງ
- ທ້າວ ຟາມວັນເຊີ້ນ ເກີດປີ 1982 ຢູ່ແຂວງ ຖາຍບິ່ງ
- ທ້າວ ຫງວຽນວັນວຸຍ ເກີດປີ 1988 ຢູ່ແຂວງເກິ່ນເທີ.
ຜ່ານການເຂົ້າກວດຄົ້ນ ແລະ ຈັບຕົວພວກກ່ຽວ, ເຈົ້າໜ້າທີ່ ກວດພົບ ປືນສັ້ນສີດຳ ລຸ້ນ Pietro Beretta 1 ກະບອກ ພ້ອມລູກ 11 ລູກ, ມີດເຫຼັກຍາວ ປະມານ 50 ຊັງຕີແມັດ 1 ດວງ ແລະ ກ່ອງທີ່ບັນຈຸທາດສີຂາວ 1 ກ່ອງ ເຊິ່ງສົງໄສວ່າເປັນ ຢາໄອສ໌; ຈາກນັ້ນ, ເຈົ້າໜ້າທີ່ ໄດ້ສືບສວນດ່ວນ ແລະ ສາມາດຈັບຕົວເປົ້າໝາຍທີ່ຢູ່ໃນກຸ່ມດຽວກັນ ເພີ່ມອີກ 5 ຄົນ ພ້ອມທັງກວດຢຶດປືນສັ້ນ ລຸ້ນ Grzzly ພ້ອມລູກ 6 ລູກ ອີກ 1 ກະບອກ, ມີດຍາວອີກ 3 ດວງ ແລະ ຢາເສບຕິດອີກຈຳນວນຫຼາຍ.
ກຸ່ມເຄືອຂ່າຍນີ້ ແມ່ນ ທ້າວ ວູຈ້ອງເຫງຍ ແລະ ນາງ ເຈິ່ນທິຈ້າງ ເປັນຫົວໂປ່ໃຫຍ່, ນາງ ຈ້າງ ເກີດປີ 1992 ທີ່ ແຂວງເກິ່ນເທີ ເຊິ່ງແມ່ນເມຍຂອງ ທ້າວ ເຫງຍ; ສ່ວນບັນດາລູກຄ້າ ທີ່ມາຊື້ຢາເສບຕິດນຳພວກກ່ຽວ ສ່ວນຫຼາຍແມ່ນ ມາແຕ່ປະເທດກຳປູເຈຍ ແລະ ມອບໃຫ້ບັນດາລູກນ້ອງໃນກຸ່ມຂາຍເອງ ເພື່ອຫາເງິນເພີ່ມອີກ.
ປັດຈຸບັນ, ຄະດີດັ່ງກ່າວ ເຈົ້າໜ້າທີ່ຕຳຫຼວດ ກຳລັງດຳເນີນການສືບສວນ – ສອບສວນ ຂະຫຍາຍຜົນ ເພື່ອຕິດຕາມຈັບຕົວ ບຸກຄົນທີ່ມີສ່ວນກ່ຽວພັນ ແລະ ກຽມປະກອບສຳນວນສົ່ງໃຫ້ ໄອຍະການ ສັ່ງຟ້ອງສານຕັດສິນ ຕາມລະບຽບກົດໝາຍ ຕໍ່ໄປ.
