ໃນວັນທີ 21 ກໍລະກົດ ທີ່ຜ່ານມາ, ສຳນັກຂ່າວ CNN ແລະ ເດລີເມວ ລາຍງານ ກ່ຽວກັບ ສະຖານະການສະພາບອາກາດຮ້ອນອົບເອົ້າ ໃນ ສະະຫະລັດອາເມລິກາ ວ່າ: ສູນບໍລິການສະພາບອາກາດແຫ່ງຊາດ ປະກາດເຕືອນໄພ ຄື້ນຄວາມຮ້ອນຮຸນແຮງ ຫຼັງພື້ນທີ່ພາກກາງ ແລະ ແຄມຝັ່ງພາກຕາເວັນອອກ ປະເຊີນບັນຫາອຸນຫະພູມ ເພີ່ມສູງຂຶ້ນຢ່າງຕໍ່ເນື່ອງ.
ພົບຜູ້ເສຍຊີວິດ ຈາກໄພຮ້ອນແລ້ວ 6 ຄົນ; ໃນຈຳນວນນີ້, 4 ຄົນ ເກີດຂຶ້ນ ໃນລັດແມຣີແລນ, 1 ຄົນ ໃນລັດອາຣິໂຊນາ ແລະ ອີກຄົນ ໃນລັດອາຄັນຊໍ; ຂະນະດຽວກັນ, ມີປະຊາຊົນຫຼາຍກວ່າ 200 ລ້ານຄົນ ໄດ້ຮັບຜົນກະທົບ.
ລາຍງານລະບຸ ວ່າ:
ພື້ນທີ່ເຊິ່ງໄດ້ຮັບຜົນກະທົບຈາກ ຄື້ນຄວາມຮ້ອນຫຼາຍທີ່ສຸດ ໄດ້ແກ່ ບັນດາເມືອງ ດັ່ງລຸ່ມນີ້:
- ເມືອງບັນຕິມໍ ລັດແມຣີແລນ ມີອຸນຫະພູມສູງເຖິງ 50 ອົງສາເຊ
- ນະຄອນຫຼວງວໍຊິງຕັນ ມີອຸນຫະພູມສູງ 42,7 ອົງສາເຊ
- ເມືອງແຄນຊັສຊິຕີ ລັດມິສຊູຣີ ມີອຸນຫະພູມສູງ 42 ອົງສາເຊ
- ເມືອງຟິລາເດວເຟຍ ລັດເພນຊິວວາເນຍ ມີອຸນຫະພູມ 41,6 ອົງສາເຊ
- ນະຄອນນິວຢອກ ແລະ ບອສຕັນ ມີອຸນຫະພູມຫຼາຍກວ່າ 40,5 ອົງສາເຊ.
ດ້ານທາງການທ້ອງຖິ່ນ ນະຄອນນິວຢອກ ໄດ້ເລັ່ງຈັດຕັ້ງ ສູນບັນເທົາໄພຮ້ອນ 500 ແຫ່ງ ກະຈາຍທົ່ວເມືອງ; ຂະນະທີ່ ທາງການລັດແມັດຊາຊູເຊັດ ຖະແຫຼງແນະນຳໃຫ້ປະຊາຊົນ ໃສ່ເຄື່ອງນຸ່ງທີ່ບາງແບບສະບາຍ ພ້ອມວິທີກວດສອບ ແລະ ຮັບມືກັບ ພາວະຮີດສະໂຕຣກ.